ନୂଆଦିଲ୍ଲୀ: ୧୧ ବର୍ଷର ଦୀର୍ଘ ରାଜନୈତିକ ପ୍ରଭାବ ପରେ ବିଜେପିକୁ ଲୋକସଭାରେ ଏକ ବଡ଼ ଝଟକା ଲାଗିଛି। ଦୀର୍ଘଦିନ ଧରି ଚର୍ଚ୍ଚାରେ ଥିବାସୀମା ନିର୍ଦ୍ଧାରଣ ବିଲ୍ଓମହିଳା ସଂରକ୍ଷଣ ବିଧେୟକଲୋକସଭାରେ ପାରିତ ହୋଇପାରିନଥିବାରୁ ଦେଶର ରାଜନୀତିରେ ଏକ ନୂଆ ବିତର୍କ ସୃଷ୍ଟି ହୋଇଛି।

ରାଜନୈତିକ ବିଶ୍ଳେଷକଙ୍କ ମତରେ, ଏହି ଘଟଣା ମୋଦୀ ସରକାର ପାଇଁ ସଂସଦ ଭିତରେ ଗତ ୧୧ ବର୍ଷରେ ସବୁଠାରୁ ବଡ଼ ରାଜନୈତିକ ପଛଘାତ ଭାବେ ଦେଖାଯାଉଛି। ଏହି ବିଧେୟକକୁ ସରକାର ମହିଳାମାନଙ୍କ ରାଜନୈତିକ ଭାଗିଦାରୀ ବଢ଼ାଇବା ନିମିତ୍ତେ ଏକ ଐତିହାସିକ ପଦକ୍ଷେପ ଭାବେ ପ୍ରସ୍ତୁତ କରିଥିଲେ, କିନ୍ତୁ ଆବଶ୍ୟକ ଦୁଇ-ତୃତୀୟାଂଶ ସମର୍ଥନ ମିଳିନଥିବାରୁ ଏହା ଅଟକିଯାଇଛି।

ବିରୋଧୀ ଦଳଗୁଡ଼ିକ ଏହି ବିଲ୍କୁ ନେଇ ସରକାରକୁ ତୀବ୍ର ଭାବେ ଘେରିଥିବା ବେଳେ କହିଛନ୍ତି ଯେ, ମହିଳା ସଶକ୍ତିକରଣ ନାଁରେ ଏହା କେବଳ ଏକ ରାଜନୈତିକ ପଦକ୍ଷେପ ଥିଲା। ବିରୋଧୀଙ୍କ ଅଭିଯୋଗ ଅନୁସାରେ, ଯଦି ସରକାର ସତରେ ଗମ୍ଭୀର ଥାଆନ୍ତେ, ତେବେ ସମସ୍ତ ଦଳଙ୍କ ସହ ଆଗୁଆ ସହମତି ନେଇ ଏହି ବିଧେୟକକୁ ପାରିତ କରାଇଥାନ୍ତେ।

ଏହାସହ କିଛି ଆଞ୍ଚଳିକ ଦଳ ଓବିସି ଏବଂ ଅନ୍ୟାନ୍ୟ ବର୍ଗ ପାଇଁ ପୃଥକ କୋଟା ଦାବି କରି ବିଧେୟକର ବିରୋଧ କରିଥିଲେ। ଫଳସ୍ୱରୂପ ସରକାର ପାଇଁ ଆବଶ୍ୟକ ସମର୍ଥନ ଯୋଗାଡ଼ କରିବା କଷ୍ଟକର ହୋଇପଡ଼ିଥିଲା।

ବିଲ୍ରେ ଉଲ୍ଲେଖ ଥିଲା ଯେ ଜନଗଣନା ଏବଂ ସୀମା ପୁନଃନିର୍ଦ୍ଧାରଣ ପରେ ମହିଳା ସଂରକ୍ଷଣ ଲାଗୁ ହେବ। ଏହାକୁ ବିରୋଧୀମାନେ “ନିର୍ବାଚନୀ ଜୁମଲା” ବୋଲି ଅଭିହିତ କରି ତୁରନ୍ତ ଲାଗୁ କରିବା ପାଇଁ ଦାବି କରିଥିଲେ।

ଅନ୍ୟପଟେ, ବିଜେପି ନେତାମାନେ କହିଛନ୍ତି ଯେ ସରକାର ମହିଳା ସଂରକ୍ଷଣ ନେଇ ପ୍ରତିବଦ୍ଧ ଓ ଆଗାମୀ ଦିନରେ ସମସ୍ତ ପକ୍ଷ ସହ ଆଲୋଚନା କରି ଏହି ବିଧେୟକକୁ ପୁଣିଥରେ ଆଗକୁ ନେଇଯିବା ପାଇଁ ପ୍ରୟାସ କରାଯିବ।

ରାଜନୈତିକ ବିଶ୍ଳେଷକଙ୍କ ମତରେ, ଏହି ଘଟଣା ସ୍ପଷ୍ଟ କରିଛି ଯେ ସଂସଦରେ କେବଳ ବହୁମତ ନୁହେଁ, ବରଂ ସମ୍ମତି ଓ ସଠିକ୍ ରଣନୀତି ମଧ୍ୟ ଅତ୍ୟନ୍ତ ଆବଶ୍ୟକ। ମହିଳା ସଂରକ୍ଷଣ ଭଳି ସମ୍ବେଦନଶୀଳ ବିଷୟରେ ବିଲ୍ ଅଟକିଯିବା ନିଶ୍ଚିତ ଭାବେ ଆଗାମୀ ନିର୍ବାଚନୀ ସମୀକରଣକୁ ପ୍ରଭାବିତ କରିପାରେ ବୋଲି ଚର୍ଚ୍ଚା ଜୋର ଧରିଛି।