ହସ୍ପିଟାଲଗୁଡ଼ିକରେ ଥରେ ବ୍ୟବହାର ପାଇଁ ଉଦ୍ଦିଷ୍ଟ ମେଡିକାଲ ଡିଭାଇସ୍‌ ଓ ଡିସ୍ପୋଜେବଲ୍ ସର୍ଜିକାଲ୍ ସାମଗ୍ରୀକୁ ପୁଣିଥରେ ବ୍ୟବହାର କରିବା ନେଇ କେନ୍ଦ୍ର ସରକାର କଡ଼ା ପଦକ୍ଷେପ ନେଇଛନ୍ତି। ସରକାରୀ ଓ ଘରୋଇ—ଉଭୟ ପ୍ରକାରର ସ୍ୱାସ୍ଥ୍ୟ ପ୍ରତିଷ୍ଠାନରେ ସିଙ୍ଗଲ୍-ୟୁଜ୍ ଡିଭାଇସ୍‌ର ପୁନଃବ୍ୟବହାର ରୋକିବାକୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ କେନ୍ଦ୍ର ନିର୍ଦ୍ଦେଶ ଦେଇଛି।

ଡାଇରେକ୍ଟରେଟ୍ ଜେନେରାଲ୍ ଅଫ୍ ହେଲ୍ଥ ସର୍ଭିସେସ୍‌ (DGHS) ଅକ୍ଟୋବର ୧୬ ତାରିଖର ଏକ ଚିଠିରେ କିଛି ଘରୋଇ ଓ କର୍ପୋରେଟ୍ ହସ୍ପିଟାଲରେ ଥରେ ବ୍ୟବହାର ପାଇଁ ତିଆରି ଡିଭାଇସ୍‌କୁ ଷ୍ଟେରିଲାଇଜ୍ କରି ପୁଣି ବ୍ୟବହାର କରାଯାଉଥିବା ରିପୋର୍ଟ ଉପରେ ଚିନ୍ତା ପ୍ରକାଶ କରିଛି। ଏପରି ଘଟଣା କାର୍ଡିଓଲୋଜି, ନେଫ୍ରୋଲୋଜି, ଅଙ୍କୋଲୋଜି, କାର୍ଡିଓଥୋରାସିକ୍ ଓ ଭାସ୍କୁଲାର ସର୍ଜରୀ ଏବଂ ନ୍ୟୁରୋସର୍ଜରୀ ଭଳି ଗୁରୁତ୍ୱପୂର୍ଣ୍ଣ ବିଭାଗରେ ଚିହ୍ନଟ ହୋଇଥିବା କୁହାଯାଇଛି।

କେଉଁ ସାମଗ୍ରୀ ଉପରେ ରୋକ୍?

ରିପୋର୍ଟ ଅନୁସାରେ ଏହି ତାଲିକାରେ କାର୍ଡିଆକ୍ କ୍ୟାଥେଟର୍, ଗାଇଡ୍‌ୱାୟାର୍, ବେଲୁନ୍ ଓ ଆବ୍ଲେସନ୍ କ୍ୟାଥେଟର୍, ଇଣ୍ଟ୍ରୋଡ୍ୟୁସର୍ ସିଥ୍, ଡାଏଲାଇଜର୍, ବ୍ଲଡ୍ ଟ୍ୟୁବିଂ, ସର୍ଜିକାଲ୍ ଷ୍ଟାପଲର୍, ଲାପାରୋସ୍କୋପିକ୍ ଟ୍ରୋକାର୍ ଏବଂ ଅର୍ଥୋପେଡିକ୍ ଡ୍ରିଲ୍ ବିଟ୍ ଭଳି ଉପକରଣ ରହିଛି। Association of Indian Medical Device Industry ଅନୁସାରେ ସିରିଞ୍ଜ ଓ ଛୁଞ୍ଚି ମଧ୍ୟ ପୁନଃବ୍ୟବହାର ହେଉଥିବା ସାମଗ୍ରୀ ମଧ୍ୟରେ ରହିଛି। 

କାହିଁକି ନିଆଗଲା ଏହି ପଦକ୍ଷେପ?

DGHS ଅନୁସାରେ, ଥରେ ବ୍ୟବହାର ପାଇଁ ତିଆରି ଡିଭାଇସ୍‌କୁ ଷ୍ଟେରିଲାଇଜେସନ୍ ପରେ ମଧ୍ୟ ପୁନଃବ୍ୟବହାର କରିବା ସବୁବେଳେ ସୁରକ୍ଷିତ ନୁହେଁ। ଅପର୍ଯ୍ୟାପ୍ତ ସଫେଇ କିମ୍ବା ଷ୍ଟେରିଲାଇଜେସନ୍ ଏବଂ ଡିଭାଇସ୍‌ର ଗୁଣମାନ ହ୍ରାସ ଯୋଗୁଁ ଏହାର କାର୍ଯ୍ୟକ୍ଷମତା ପ୍ରଭାବିତ ହୋଇପାରେ। ଫଳରେ କ୍ରସ୍-ଇନ୍‌ଫେକ୍ସନ୍, ଡିଭାଇସ୍ ବିଫଳତା ଏବଂ ଚିକିତ୍ସା ସମୟରେ ଅନ୍ୟାନ୍ୟ ଜଟିଳତା ସୃଷ୍ଟି ହୋଇପାରେ। ହେପାଟାଇଟିସ୍ B, ହେପାଟାଇଟିସ୍ C, HIV ଓ ବ୍ୟାକ୍ଟେରିଆଲ୍ ସଂକ୍ରମଣର ଝୁମ୍ପ ମଧ୍ୟ ରହିପାରେ। 

ଏଥିସହ କିଛି ମାମଲାରେ ପୁନଃବ୍ୟବହୃତ ଉପକରଣ ପାଇଁ ରୋଗୀଙ୍କଠାରୁ ପୂରା ମୂଲ୍ୟ ନିଆଯାଇଥିବା କିମ୍ବା ସରକାରୀ ଯୋଜନା ଅଧୀନରେ ସେହି ଖର୍ଚ୍ଚ ପୂରଣ କରାଯାଇଥିବା ନେଇ ମଧ୍ୟ DGHS ଚିନ୍ତା ପ୍ରକାଶ କରିଛି। 

ନିୟମ ନମାନିଲେ କାର୍ଯ୍ୟାନୁଷ୍ଠାନ

ସିଙ୍ଗଲ୍-ୟୁଜ୍ ମେଡିକାଲ ଡିଭାଇସ୍‌ ପୁନଃବ୍ୟବହାର Drugs and Cosmetics Act, 1940, Medical Devices Rules, 2017 ଏବଂ Clinical Establishments Act, 2010 ସମେତ ସଂକ୍ରମଣ ନିୟନ୍ତ୍ରଣ ଓ ବାୟୋମେଡିକାଲ୍ ୱେଷ୍ଟ୍ ମ୍ୟାନେଜମେଣ୍ଟ ସମ୍ପର୍କିତ ନିୟମର ଉଲ୍ଲଂଘନ ହୋଇପାରେ। 

ରାଜ୍ୟ ସ୍ୱାସ୍ଥ୍ୟ ବିଭାଗ, ସ୍ୱାସ୍ଥ୍ୟ ନିର୍ଦ୍ଦେଶାଳୟ, Drug Controller General of India ଏବଂ ରାଜ୍ୟ/UT ଡ୍ରଗ୍ କଣ୍ଟ୍ରୋଲରଙ୍କୁ ହସ୍ପିଟାଲରେ ଯାଞ୍ଚ ଓ ନିରୀକ୍ଷଣ ବଢ଼ାଇ ନିୟମ ପାଳନ ସୁନିଶ୍ଚିତ କରିବାକୁ କୁହାଯାଇଛି। ଉଲ୍ଲଂଘନ ମିଳିଲେ ପ୍ରଯୁଜ୍ୟ ଆଇନ ଅନୁସାରେ ପଦକ୍ଷେପ ନିଆଯିବ।