ଭୁବନେଶ୍ୱର: ବିବାହର କିଛି ଦିନ ପରେ ଶ୍ୱଶୁର ଘରେ ଚୋରି ଅଭିଯୋଗ। ପ୍ରାୟ ୫ ଲକ୍ଷ ଟଙ୍କାର ସୁନା ଅଳଙ୍କାର ଚୋରି ଏବଂ ଶ୍ୱଶୁରଙ୍କ ମୋଟରସାଇକେଲ ନେଇଯାଇଥିବା ଅଭିଯୋଗରେ ନାୟାପଲ୍ଲୀ ପୁଲିସ ଜଣେ ନବବିବାହିତ ଯୁବକଙ୍କୁ ଗିରଫ କରିଛି।

ପୁଲିସ ସୂଚନା ଅନୁସାରେ, ଗିରଫ ଯୁବକଙ୍କ ନାମ ରାଜେଶ କୁମାର ନାୟକ। ତାଙ୍କ ଘର ନୟାଗଡ଼ ଜିଲ୍ଲାରେ ହୋଇଥିବା ବେଳେ ସେ ଭୁବନେଶ୍ୱର ୟୁନିଟ୍-୮ ଅଞ୍ଚଳରେ ଭଡ଼ା ଘରେ ରହୁଥିଲେ। କିଛି ଦିନ ତଳେ ସେ ୟୁନିଟ୍-୮ ଅଞ୍ଚଳର ଜଣେ ଯୁବତୀଙ୍କୁ ବିବାହ କରିଥିଲେ।

ପୁଲିସର କହିବା ଅନୁସାରେ, ବିବାହ ପରେ ପ୍ରଥମ ଥର ପାଇଁ ଶ୍ୱଶୁର ଘରକୁ ଯାଇଥିବା ସମୟରେ ରାଜେଶ ଆଲମାରିରେ ରଖାଯାଇଥିବା ସୁନା ଅଳଙ୍କାର ଦେଖିଥିଲେ। ଘରେ କେହି ନଥିବା ସମୟର ସୁଯୋଗ ନେଇ ସେ ପ୍ରାୟ ୫ ଲକ୍ଷ ଟଙ୍କା ମୂଲ୍ୟର ସୁନା ଅଳଙ୍କାର ନେଇଯାଇଥିବା ଅଭିଯୋଗ ହୋଇଛି।

ପରେ ଘରରୁ ସୁନା ଅଳଙ୍କାର ନିଖୋଜ ଥିବା ଜଣାପଡ଼ିବା ପରେ ପରିବାର ପକ୍ଷରୁ ନାୟାପଲ୍ଲୀ ଥାନାରେ ଅଭିଯୋଗ କରାଯାଇଥିଲା। ଅଭିଯୋଗ ଆଧାରରେ ପୁଲିସ ତଦନ୍ତ ଆରମ୍ଭ କରି ରାଜେଶଙ୍କୁ ଗିରଫ କରିଛି।

କେବଳ ସୁନା ଅଳଙ୍କାର ନୁହେଁ, ଶ୍ୱଶୁରଙ୍କ ମୋଟରସାଇକେଲ ମଧ୍ୟ ନେଇଯାଇ ଅନ୍ୟତ୍ର ବନ୍ଧକ ରଖିଥିବା ନେଇ ଅଭିଯୋଗ ରହିଛି। ଏହି ଘଟଣାରେ ପୁଲିସ ଆହୁରି ତଦନ୍ତ ଜାରି ରଖିଛି।

ବିବାହର କିଛି ଦିନ ପରେ ନିଜ ଶ୍ୱଶୁର ଘରେ ଏଭଳି ଚୋରି ଅଭିଯୋଗ ଆସିବା ଘଟଣା ଚର୍ଚ୍ଚାରେ ରହିଛି। ତେବେ ମାମଲାର ସମସ୍ତ ଦିଗ ନେଇ ପୁଲିସ ତଦନ୍ତ କରୁଥିବା ଜଣାପଡ଼ିଛି।