ନ୍ୟୁୟର୍କ: ୟୁଏସ୍‌ ଓପନ୍‌ରେ ଭାରତୀୟ ଟେନିସ୍‌ ଖେଳାଳିଙ୍କ ପାଇଁ ମିଶ୍ର ଫଳାଫଳ ସାମ୍ନାକୁ ଆସିଛି। ପୁରୁଷ ଯୁଗଳ ବର୍ଗର ପ୍ରଥମ ରାଉଣ୍ଡରୁ ୟୁକି ଭାମ୍ବ୍ରି ଓ ଅନିରୁଦ୍ଧ ଚନ୍ଦ୍ରଶେଖର ବିଦାୟ ନେଇଥିବା ବେଳେ ଏନ୍‌ ଶ୍ରୀରାମ ବାଲାଜୀ ଦ୍ୱିତୀୟ ରାଉଣ୍ଡକୁ ପ୍ରବେଶ କରିଛନ୍ତି।

ନ୍ୟୁଜିଲାଣ୍ଡର ମାଇକେଲ ଭେନସ୍‌ଙ୍କୁ ସାଥୀ କରି ଖେଳୁଥିବା ୟୁକି ଭାମ୍ବ୍ରି ଆମେରିକାର ରିୟାନ ସିଜରମାନ ଓ ପ୍ରତୀକ ଟିଅର୍‌ହାକ୍‌ଙ୍କ ଯୋଡ଼ି ବିପକ୍ଷରେ ପରାଜିତ ହୋଇଛନ୍ତି। ଭାମ୍ବ୍ରି-ଭେନସ୍‌ ଯୋଡ଼ି ଦୁଇଟିଯାକ ସେଟ୍‌ରେ ୬-୭, ୬-୭ ସ୍କୋରରେ ହାରିଥିଲେ। ଉଭୟ ସେଟ୍‌ରେ ଜୋରଦାର ଲଢ଼େଇ ହୋଇଥିଲେ ମଧ୍ୟ ଭାରତୀୟ-ନ୍ୟୁଜିଲାଣ୍ଡ ଯୋଡ଼ି ବିଜୟ ହାସଲ କରିପାରିନଥିଲେ।

ଗତ ସଂସ୍କରଣରେ ଭାମ୍ବ୍ରି ଓ ଭେନସ୍‌ ସେମିଫାଇନାଲ୍‌ ପର୍ଯ୍ୟନ୍ତ ଯାଇଥିଲେ। ତେଣୁ ଚଳିତ ସଂସ୍କରଣରେ ପ୍ରଥମ ରାଉଣ୍ଡରୁ ହିଁ ବିଦାୟ ନେବା ଉଭୟଙ୍କ ପାଇଁ ନିରାଶାଜନକ ଫଳାଫଳ ହୋଇଛି।

ଅନ୍ୟପକ୍ଷରେ, ଅନିରୁଦ୍ଧ ଚନ୍ଦ୍ରଶେଖର ଓ ତାଙ୍କ ବେଲାରୁଷ ସାଥୀ ଇଭାନ ଲିଉତାରେଭିକ୍‌ ମଧ୍ୟ ପ୍ରଥମ ରାଉଣ୍ଡରେ ପରାଜିତ ହୋଇଛନ୍ତି। ବ୍ରିଟିଶ ଯୋଡ଼ି ଅର୍ଥର ଫେରି ଓ ଜୋସୁଆ ପାରିସ୍‌ଙ୍କଠାରୁ ସେମାନେ ୪-୬, ୭-୫, ୪-୬ ସେଟ୍‌ରେ ହାରିଛନ୍ତି।

ତେବେ ୟୁଏସ୍‌ ଓପନ୍‌ରେ ଭାରତ ପାଇଁ ଆଶା ଜାରି ରହିଛି। ଏନ୍‌ ଶ୍ରୀରାମ ବାଲାଜୀ ଓ ତାଙ୍କ ଆମେରିକୀୟ ସାଥୀ ଇଭାନ କିଙ୍ଗ ଦ୍ୱିତୀୟ ରାଉଣ୍ଡକୁ ପ୍ରବେଶ କରିଛନ୍ତି। ଫଳରେ ଚଳିତ ଟୁର୍ଣ୍ଣାମେଣ୍ଟର ପୁରୁଷ ଯୁଗଳ ବର୍ଗରେ ଏବେ ବାଲାଜୀ ଏକମାତ୍ର ଭାରତୀୟ ଖେଳାଳି ଭାବେ ତିଷ୍ଠି ରହିଛନ୍ତି।