ମଧ୍ୟପ୍ରାଚ୍ୟରେ ଚାଲୁଥିବା ତଣାପୋଡ଼ ଓ ଅସ୍ଥିରତାକୁ କମାଇବା ପାଇଁ ଆମେରିକା ଏବଂ ଇରାନ ମଧ୍ୟରେ ଆଜି ଗୁରୁତ୍ୱପୂର୍ଣ୍ଣ ଶାନ୍ତି ଆଲୋଚନା ହେବାକୁ ଯାଉଛି। ଏହି ବୈଠକ ଇସଲାମାବାଦରେ ଆୟୋଜିତ ହେବ ଓ ଶେହବାଜ ଶରିଫ ମଧ୍ୟସ୍ଥ ଭାବେ ଯୋଗଦେବେ।

ଆମେରିକା ପକ୍ଷରୁ ଜେଡି ଭାନ୍ସ, ଷ୍ଟିଭ୍ ୱିଟକଫ ଏବଂ ଜାରେଡ୍ କୁଶନର ଅଂଶଗ୍ରହଣ କରିବେ। ଇରାନ ପକ୍ଷରୁ ମହମ୍ମଦ ବାଘେର ଗାଲିବାଫ ଓ ଆବାସ ଆରାଘଚି ପ୍ରତିନିଧିତ୍ୱ କରିବେ।

ଆଲୋଚନା ପୂର୍ବରୁ ଇସଲାମାବାଦରେ ସୁରକ୍ଷା ବ୍ୟବସ୍ଥାକୁ ବହୁତ କଡା କରାଯାଇଛି। ସହରଟିକୁ ଏକ ଅଭେଦ୍ୟ ଦୁର୍ଗରେ ପରିଣତ କରାଯାଇଛି। ରେଡ୍ ଜୋନରେ ସେନା ମୁତୟନ, ଏକ୍ସପ୍ରେସୱେ ବନ୍ଦ ଓ ସାଧାରଣ ଲୋକଙ୍କ ପ୍ରବେଶ ନିଷେଧ ହୋଇଛି। ତେହରିକ-ଏ-ତାଲିବାନ ପାକିସ୍ତାନ ପକ୍ଷରୁ ଆକ୍ରମଣ ଆଶଙ୍କା ଥିବାରୁ ଏହି ପଦକ୍ଷେପ ଗ୍ରହଣ କରାଯାଇଛି।

ଏହି ବୈଠକରେ ଇରାନର ଆଣବିକ କାର୍ଯ୍ୟକ୍ରମ, ୨୦୧୫ର ଆଣବିକ ଚୁକ୍ତି ପୁନର୍ଜୀବନ, ପ୍ରତିବନ୍ଧକ ହଟାଇବା ଓ ଅଟକ ନାଗରିକଙ୍କ ମୁକ୍ତି ଭଳି ମୁଖ୍ୟ ବିଷୟ ଉପରେ ଆଲୋଚନା ହେବ।

ଆମେରିକା ପକ୍ଷରୁ ଇରାନକୁ ଆଣବିକ ଅସ୍ତ୍ର ଉନ୍ନୟନ ରୋକିବା, ବାଲିଷ୍ଟିକ ମିସାଇଲ ନିୟନ୍ତ୍ରଣ ଓ ହିଜବୁଲ୍ଲା, ହମାସ ଓ ହୁତି ଭଳି ସଂଗଠନକୁ ସହାୟତା ବନ୍ଦ କରିବା ଦାବି ରଖାଯାଇପାରେ।

ଅନ୍ୟପଟେ, ଇରାନ ଆର୍ଥିକ ପ୍ରତିବନ୍ଧକ ହଟାଇବା, ତୈଳ ରପ୍ତାନି ସୁବିଧା ଓ ବିଦେଶୀ ବ୍ୟାଙ୍କରେ ଅଟକିଥିବା ସମ୍ପତ୍ତି ମୁକ୍ତି ଉପରେ ଜୋର ଦେଇପାରେ।