ରୁଷ ଓ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଆହୁରି ତୀବ୍ର ରୂପ ନେଇଛି। ଉଭୟ ଦେଶ ପରସ୍ପର ଉପରେ ରାତିସାରା ଡ୍ରୋନ୍ ଓ କ୍ଷେପଣାସ୍ତ୍ର ଆକ୍ରମଣ କରିଥିବା ବେଳେ ରୁଷର ତୈଳ ଭିତ୍ତିଭୂମିକୁ ବଡ଼ କ୍ଷତି ପହଞ୍ଚିଥିବା ଖବର ମିଳିଛି।

ପଶ୍ଚିମ ରୁଷର ଟଭର ଅଞ୍ଚଳରେ ଥିବା ଏକ ତୈଳ ଡିପୋ ଉପରେ ୟୁକ୍ରେନୀୟ ଡ୍ରୋନ୍ ଆକ୍ରମଣ ପରେ ଭୟଙ୍କର ଅଗ୍ନିକାଣ୍ଡ ଘଟିଥିବା ସୂଚନା ମିଳିଛି। ସେହିପରି ଆଜୋଭ ସାଗରରେ ଥିବା ଦୁଇଟି ତୈଳ ଟ୍ୟାଙ୍କରକୁ ମଧ୍ୟ ଡ୍ରୋନ୍ ମାଧ୍ୟମରେ ଟାର୍ଗେଟ କରାଯାଇଥିବାରୁ ସେଥିରେ ନିଆଁ ଲାଗିଯାଇଛି।

ରୁଷର ଆଞ୍ଚଳିକ କର୍ତ୍ତୃପକ୍ଷଙ୍କ କହିବା ଅନୁଯାୟୀ, ଷ୍ଟାଭ୍ରୋପୋଲ ଅଞ୍ଚଳର ଏକ ତୈଳ ଭଣ୍ଡାରରେ ମଧ୍ୟ ଡ୍ରୋନ୍ ଆକ୍ରମଣ ପରେ ଅଗ୍ନିକାଣ୍ଡ ଘଟିଛି। ପରିସ୍ଥିତିକୁ ଦୃଷ୍ଟିରେ ରଖି ଆଖପାଖ ଅଞ୍ଚଳର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି।

ଆଜୋଭ ସାଗରରେ ଆକ୍ରମଣରେ କ୍ଷତିଗ୍ରସ୍ତ ହୋଇଥିବା ଦୁଇଟି ତୈଳ ଟ୍ୟାଙ୍କର ମଧ୍ୟରୁ ଗୋଟିଏରେ ଏବେ ବି ନିଆଁ ଜଳୁଥିବା ବେଳେ ଜାହାଜର କର୍ମଚାରୀମାନଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।

ୟୁକ୍ରେନ ପକ୍ଷରୁ ରୁଷର ତୈଳ ବିଶୋଧନାଗାର ଓ ଇନ୍ଧନ ଭିତ୍ତିଭୂମିକୁ ଲଗାତାର ଟାର୍ଗେଟ କରାଯାଉଥିବାରୁ ରୁଷର କେତେକ ଅଞ୍ଚଳରେ ଇନ୍ଧନ ଯୋଗାଣ ପ୍ରଭାବିତ ହୋଇଥିବା ରିପୋର୍ଟ ସାମ୍ନାକୁ ଆସିଛି। ଅନେକ ସ୍ଥାନରେ ପେଟ୍ରୋଲ ଅଭାବ ଦେଖାଦେଇଥିବାରୁ ଲୋକମାନେ ଇନ୍ଧନ ପାଇଁ ଦୀର୍ଘ ସମୟ ଧରି ଅପେକ୍ଷା କରୁଛନ୍ତି।

ଏପଟେ ରୁଷର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ, ବୁଧବାର ବିଳମ୍ବିତ ରାତିରୁ ଗୁରୁବାର ସକାଳ ପର୍ଯ୍ୟନ୍ତ ୭୩ଟି ୟୁକ୍ରେନୀୟ ଡ୍ରୋନ୍‌କୁ ବାୟୁ ପ୍ରତିରକ୍ଷା ବ୍ୟବସ୍ଥା ଧ୍ୱଂସ କରିଛି।

ଅନ୍ୟପଟେ ୟୁକ୍ରେନ ବାୟୁସେନାର ସୂଚନା ଅନୁଯାୟୀ, ରୁଷ ରାତିସାରା ୯୪ଟି ଦୂରଗାମୀ ଡ୍ରୋନ୍ ଏବଂ ଦୁଇଟି ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରିଥିଲା। ସେଥିମଧ୍ୟରୁ ୭୨ଟି ଡ୍ରୋନ୍‌କୁ ପ୍ରତିହତ କରାଯାଇଥିବା ବେଳେ କେତେକ ଡ୍ରୋନ୍ ଓ କ୍ଷେପଣାସ୍ତ୍ର ୧୩ଟି ସ୍ଥାନକୁ କ୍ଷତି ପହଞ୍ଚାଇଛି।

ଏହି ଆକ୍ରମଣ ଆମେରିକା ପକ୍ଷରୁ ୟୁକ୍ରେନକୁ ଅତିରିକ୍ତ ବାୟୁ ପ୍ରତିରକ୍ଷା ସହାୟତା ଘୋଷଣା ପରେ ଘଟିଥିବାରୁ ଏହାକୁ ନେଇ ଆନ୍ତର୍ଜାତିକ ସ୍ତରରେ ମଧ୍ୟ ଚର୍ଚ୍ଚା ଜୋର ଧରିଛି।