ନୂଆଦିଲ୍ଲୀ: ଦୃଢ଼ ଇଚ୍ଛାଶକ୍ତି, ମେଧା ଓ କଠିନ ପରିଶ୍ରମ ମଣିଷକୁ କେତେ ଉଚ୍ଚ ସ୍ଥାନରେ ପହଞ୍ଚାଇପାରେ, ତାହାର ଏକ ଉଦାହରଣ ହେଉଛନ୍ତି ଡ. ଶିବକୁମାର କଲ୍ୟାଣରମଣ। ୧୯୮୯ରେ IIT-JEE ପରୀକ୍ଷାରେ ସାରା ଦେଶରେ ତୃତୀୟ ସ୍ଥାନ ହାସଲ କରିଥିବା ଏହି ମେଧାବୀ ଛାତ୍ର ଆଜି ଭାରତର ଗବେଷଣା ଓ ନବସୃଜନ କ୍ଷେତ୍ରର ଏକ ପ୍ରମୁଖ ସଂସ୍ଥାର ନେତୃତ୍ୱ ନେଉଛନ୍ତି।

ସେ ବର୍ତ୍ତମାନ Anusandhan National Research Foundation (ANRF)ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO) ଭାବେ କାର୍ଯ୍ୟ କରୁଛନ୍ତି। ଶିକ୍ଷାନୁଷ୍ଠାନ, ଗବେଷଣା କେନ୍ଦ୍ର, ଶିଳ୍ପ ସଂସ୍ଥା ଓ ଷ୍ଟାର୍ଟଅପ୍‌ଗୁଡ଼ିକୁ ଏକାଠି କରି ଭାରତରେ ଗବେଷଣା ଓ ନୂଆ ପ୍ରଯୁକ୍ତିର ବିକାଶ କରିବା ତାଙ୍କ ସଂସ୍ଥାର ମୁଖ୍ୟ ଉଦ୍ଦେଶ୍ୟ।

IIT-JEEରେ ଅଲ୍ ଇଣ୍ଡିଆ ତୃତୀୟ ରାଙ୍କ୍

ବେଙ୍ଗାଲୁରୁରେ ଜନ୍ମଗ୍ରହଣ କରିଥିବା ଶିବକୁମାର ୧୯୮୯ରେ IIT-JEE ପରୀକ୍ଷାରେ ଅଲ୍ ଇଣ୍ଡିଆ ତୃତୀୟ ରାଙ୍କ୍ ହାସଲ କରିଥିଲେ। ଏହାପରେ ସେ IIT ମାଡ୍ରାସରେ କମ୍ପ୍ୟୁଟର ସାଇନ୍ସ ପଢ଼ିଥିଲେ। ୧୯୯୩ରେ BTech ଡିଗ୍ରୀ ହାସଲ କରିବା ପରେ ଉଚ୍ଚଶିକ୍ଷା ପାଇଁ ଆମେରିକା ଯାଇଥିଲେ।

ସେଠାରେ Ohio State Universityରୁ ୧୯୯୭ ମସିହାରେ Computer and Information Sciencesରେ ମାଷ୍ଟର୍ସ ଓ PhD ଡିଗ୍ରୀ ହାସଲ କରିଥିଲେ। ପରେ Rensselaer Polytechnic Instituteରୁ Executive MBA ମଧ୍ୟ ସମ୍ପୂର୍ଣ୍ଣ କରିଥିଲେ।

ଆମେରିକାରେ ପ୍ରଫେସରରୁ IBM Research ପର୍ଯ୍ୟନ୍ତ

ଶିବକୁମାର ୧୯୯୭ ମସିହାରେ ଆମେରିକାର Rensselaer Polytechnic Instituteରେ ପ୍ରଫେସର ଭାବେ ନିଜର କ୍ୟାରିୟର ଆରମ୍ଭ କରିଥିଲେ। ପ୍ରାୟ ୧୦ ବର୍ଷ ଧରି ସେଠାରେ ଶିକ୍ଷାଦାନ ଓ ଗବେଷଣା କରିଥିଲେ।

୨୦୦୮ରେ ସେ IBM Research Indiaରେ ଯୋଗ ଦେଇଥିଲେ। ନେଟୱର୍କିଂ, ୱାୟାରଲେସ୍ ଟେକ୍ନୋଲୋଜି ଓ ବଡ଼ କମ୍ପ୍ୟୁଟିଂ ସିଷ୍ଟମ୍‌ରେ ଗବେଷଣା ସହ ବରିଷ୍ଠ ଦାୟିତ୍ୱ ତୁଲାଇଥିଲେ। ୨୦୧୩ରୁ ୨୦୧୫ ପର୍ଯ୍ୟନ୍ତ IBM Research Australiaରେ Chief Scientist ଭାବେ କାମ କରିଥିଲେ।

GE Power ଓ Microsoftରେ ମଧ୍ୟ ଦେଖାଇଥିଲେ ଦକ୍ଷତା

୨୦୧୮ରେ ସେ GE Power Conversionରେ ଯୋଗ ଦେଇଥିଲେ। ଏଠାରେ ଇଲେକ୍ଟ୍ରିକ୍ ମୋବିଲିଟି, ସୋଲାର ପାୱାର ଓ ଡିଜିଟାଲ୍ ଟେକ୍ନୋଲୋଜି କ୍ଷେତ୍ରରେ ବ୍ୟବସାୟିକ ବିକାଶ ସମ୍ପର୍କିତ କାର୍ଯ୍ୟ କରିଥିଲେ।

୨୦୨୦ରେ ସେ Microsoftରେ ଯୋଗ ଦେଇଥିଲେ। ପ୍ରଥମେ Microsoft Indiaରେ Energy and Mobility ବିଭାଗର Chief Technology Officer (CTO) ଭାବେ କାମ କରିଥିଲେ। ପରେ ଏସିଆ ଅଞ୍ଚଳର Energy Industryର CTO ଦାୟିତ୍ୱ ତୁଲାଇଥିଲେ। ୨୦୨୫ ମାର୍ଚ୍ଚ ପର୍ଯ୍ୟନ୍ତ ସେ ଏହି ପଦବୀରେ ରହିଥିଲେ।

୨୦୨୫ରୁ ANRFର CEO ଦାୟିତ୍ୱ

୧୭ ମାର୍ଚ୍ଚ ୨୦୨୫ରେ ଶିବକୁମାର କଲ୍ୟାଣରମଣ Anusandhan National Research Foundationର CEO ଭାବେ ଦାୟିତ୍ୱ ଗ୍ରହଣ କରିଥିଲେ।

ANRFର ସ୍ଥାପନା ANRF Act, 2023 ଅନୁସାରେ ହୋଇଛି। ଦେଶର ବିଶ୍ୱବିଦ୍ୟାଳୟ, କଲେଜ, ଗବେଷଣା ପ୍ରତିଷ୍ଠାନ ଓ ପରୀକ୍ଷାଗାରରେ ଗବେଷଣା ଓ ବିକାଶକୁ ଉତ୍ସାହିତ କରିବା ଏହାର ଲକ୍ଷ୍ୟ।

ଏହି ସଂସ୍ଥା ମାଧ୍ୟମରେ ସରକାରୀ ଓ ଘରୋଇ ଶିଳ୍ପ, ଷ୍ଟାର୍ଟଅପ୍, ବିଶ୍ୱବିଦ୍ୟାଳୟ ଏବଂ ବୈଜ୍ଞାନିକମାନଙ୍କ ମଧ୍ୟରେ ସହଯୋଗ ବୃଦ୍ଧି କରାଯାଉଛି।

AI, ଇଲେକ୍ଟ୍ରିକ୍ ଯାନ ଓ ନୂଆ ପ୍ରଯୁକ୍ତି ଉପରେ ଗୁରୁତ୍ୱ

ANRF ଅଧୀନରେ AI, ଆଡଭାନ୍ସଡ୍ ମ୍ୟାଟେରିଆଲ୍ସ, ଇଲେକ୍ଟ୍ରିକ୍ ମୋବିଲିଟି, ମେଡଟେକ୍ ଓ ଅନ୍ୟାନ୍ୟ ଆଧୁନିକ କ୍ଷେତ୍ରରେ ଗବେଷଣାକୁ ଗୁରୁତ୍ୱ ଦିଆଯାଉଛି।

ଏହାର PAIR (Partnerships for Accelerated Innovation and Research) କାର୍ଯ୍ୟକ୍ରମ ମାଧ୍ୟମରେ ଅଗ୍ରଣୀ ଗବେଷଣା ପ୍ରତିଷ୍ଠାନ ଓ ଅନ୍ୟ ବିଶ୍ୱବିଦ୍ୟାଳୟ ମଧ୍ୟରେ ସହଭାଗିତା ବଢ଼ାଇବାର ଯୋଜନା ରହିଛି।

ଏହାସହ Prime Minister Early Career Research Grant ଭଳି କାର୍ଯ୍ୟକ୍ରମ ଯୁବ ଗବେଷକମାନଙ୍କୁ ନୂଆ ଗବେଷଣା ପାଇଁ ସୁଯୋଗ ଦେଉଛି।

ବହୁ ସମ୍ମାନରେ ସମ୍ମାନିତ

ବିଜ୍ଞାନ ଓ ପ୍ରଯୁକ୍ତି କ୍ଷେତ୍ରରେ ଶିବକୁମାରଙ୍କ ଅବଦାନ ପାଇଁ ତାଙ୍କୁ ଅନେକ ସମ୍ମାନ ମିଳିଛି। ସେ Institute of Electrical and Electronics Engineers (IEEE)ର Fellow, Indian National Academy of Engineering (INAE)ର Fellow ଏବଂ ACM Distinguished Scientist ଭାବେ ସ୍ୱୀକୃତି ପାଇଛନ୍ତି।

୧୯୯୯ରେ MIT Technology Review ପକ୍ଷରୁ ତାଙ୍କୁ TR100 Young Innovator ଭାବେ ମନୋନୀତ କରାଯାଇଥିଲା। ୨୦୨୧ରେ IIT ମାଡ୍ରାସ ଓ Ohio State University ପକ୍ଷରୁ ମଧ୍ୟ Distinguished Alumnus Award ମିଳିଥିଲା।

ଶିକ୍ଷା, ଗବେଷଣା ଓ କର୍ପୋରେଟ୍ ଜଗତରେ ଦୀର୍ଘ ଅନୁଭବ ରଖିଥିବା ଶିବକୁମାରଙ୍କ ନେତୃତ୍ୱରେ ଭାରତକୁ ଏକ ବିଶ୍ୱସ୍ତରୀୟ ଗବେଷଣା ଓ ନବସୃଜନ କେନ୍ଦ୍ରରେ ପରିଣତ କରିବାକୁ ANRF ଲକ୍ଷ୍ୟ ରଖିଛି।