ଛୋଟବେଳେ ବାପାଙ୍କ ହାତ ଧରି ଚୀନରେ ବ୍ୟାଡମିଣ୍ଟନ୍ କୋର୍ଟକୁ ଯାଉଥିଲେ। ସେତେବେଳେ ହୁଏତ କେହି ଭାବିନଥିଲେ ଯେ ଦିନେ ସେହି ଝିଅ ଅନ୍ତର୍ଜାତୀୟ ମଞ୍ଚରେ ଭାରତ ପାଇଁ ଇତିହାସ ରଚିବେ। ଓଡ଼ିଶାର ଝିଅ ତନ୍‌ଭୀ ପାତ୍ରୀ ଏବେ ୟୁଥ୍ ଅଲିମ୍ପିକ୍ସରେ ରୌପ୍ୟ ପଦକ ଜିତି ଦେଶ ପାଇଁ ଗୌରବ ଆଣିଛନ୍ତି। ମାତ୍ର ୧୫ ବର୍ଷ ବୟସରେ ତାଙ୍କର ଏହି ସଫଳତା ଭାରତୀୟ ବ୍ୟାଡମିଣ୍ଟନ୍‌ରେ ଏକ ଐତିହାସିକ ମୁହୂର୍ତ୍ତ।

ଚୀନରେ ଆରମ୍ଭ ହୋଇଥିଲା ଖେଳ ଯାତ୍ରା

ତନ୍‌ଭୀଙ୍କ ବାପା ରବିନାରାୟଣ ପାତ୍ରୀ ଚାକିରି ପାଇଁ ଚୀନର ଜିଆଙ୍ଗସୁ ପ୍ରଦେଶରେ ରହୁଥିଲେ। ସେ ନିଜେ ମଧ୍ୟ ବ୍ୟାଡମିଣ୍ଟନ୍ ଖେଳିବାକୁ ଭଲ ପାଉଥିଲେ। ହେଲେ ପିଲାଦିନେ ଆର୍ଥିକ ସମସ୍ୟା ଓ ଉପଯୁକ୍ତ ଖେଳ ଭିତ୍ତିଭୂମିର ଅଭାବ ଯୋଗୁଁ ନିଜର ଏହି ଇଚ୍ଛା ପୂରଣ କରିପାରିନଥିଲେ।

ଚୀନରେ ରହିବା ସମୟରେ ସେ ଝିଅ ତନ୍‌ଭୀଙ୍କୁ ବ୍ୟାଡମିଣ୍ଟନ୍ ସହ ପରିଚିତ କରାଇଥିଲେ। ସ୍ଥାନୀୟ ଏକ କ୍ଲବ୍‌ରେ ଜଣେ ଚୀନ୍ କୋଚ୍ ତାଙ୍କୁ ଖେଳର ମୌଳିକ କୌଶଳ ଶିଖାଇଥିଲେ। କେବଳ ତନ୍‌ଭୀ ନୁହେଁ, ସେହି କୋଚ୍ ତାଙ୍କ ବାପାଙ୍କ ଖେଳିବା ଶୈଳୀକୁ ମଧ୍ୟ ସୁଧାରିଥିଲେ, ଯାହାଫଳରେ ବାପା-ଝିଅ ଏକାଠି ଅଭ୍ୟାସ କରିପାରୁଥିଲେ।

୨୦୧୯ରେ ତନ୍‌ଭୀ ଚୀନରେ ବିଭିନ୍ନ ପ୍ରାଦେଶିକ ଓ ଜାତୀୟସ୍ତରୀୟ ପ୍ରତିଯୋଗିତାରେ ଭାଗ ନେଇଥିଲେ। ସେହି ବର୍ଷ ପ୍ରାୟ ୧୦ଟି ପ୍ରତିଯୋଗିତାରୁ ୯ଟିରେ ବିଜୟୀ ହୋଇଥିବା କଥା ତାଙ୍କ ବାପା ରବିନାରାୟଣ କହିଛନ୍ତି।

ଝିଅର ସ୍ୱପ୍ନ ପାଇଁ ବାପାଙ୍କ ବଡ଼ ତ୍ୟାଗ

କୋଭିଡ୍ ମହାମାରୀ ସମୟରେ ପାତ୍ରୀ ପରିବାର ଚୀନରୁ ଭାରତ ଫେରି ଭୁବନେଶ୍ୱରରେ ରହିଥିଲେ। ତନ୍‌ଭୀଙ୍କ ଖେଳ ଜାରି ରହିଥିଲେ ମଧ୍ୟ ନିୟମିତ ଅଭ୍ୟାସ ପାଇଁ ଉପଯୁକ୍ତ ପ୍ରତିଦ୍ୱନ୍ଦ୍ୱୀ ଓ ପରିବେଶ ମିଳିବାରେ ସମସ୍ୟା ହେଉଥିଲା।

ଝିଅର ପ୍ରତିଭାକୁ ଆଗକୁ ନେବା ପାଇଁ ରବିନାରାୟଣ ଚୀନରେ ଥିବା ଭଲ ଚାକିରି ଛାଡ଼ି ଭାରତ ଫେରିବାର ନିଷ୍ପତ୍ତି ନେଇଥିଲେ। ଏହା ତାଙ୍କ ପାଇଁ ଏକ ବଡ଼ ଆର୍ଥିକ ଓ ପାରିବାରିକ ନିଷ୍ପତ୍ତି ଥିଲା। ପରେ ତନ୍‌ଭୀଙ୍କ ମା’ ମଧ୍ୟ ଝିଅର ଅଭ୍ୟାସ, ଖାଦ୍ୟ ଓ ଦୈନନ୍ଦିନ ଯତ୍ନ ପାଇଁ ନିଜ ଚାକିରି ଛାଡ଼ିଥିଲେ।

ବେଙ୍ଗାଲୁରୁରେ ମିଳିଲା ନୂଆ ଦିଗ

୨୦୨୧ରେ ମାତ୍ର ୧୦ ବର୍ଷ ବୟସରେ ତନ୍‌ଭୀ ବେଙ୍ଗାଲୁରୁର ପ୍ରକାଶ ପାଦୁକୋଣ ବ୍ୟାଡମିଣ୍ଟନ୍ ଏକାଡେମୀରେ ଟ୍ରାଏଲ୍ ଦେଇ ଚୟନ ହୋଇଥିଲେ। ପରେ ଏହି ଏକାଡେମୀ ସେଣ୍ଟର ଫର୍ ବ୍ୟାଡମିଣ୍ଟନ୍ ଏକ୍ସଲେନ୍ସ ନାମରେ ପରିଚିତ ହୋଇଛି। ସେଠାରେ କୋଚ୍‌ମାନେ ତାଙ୍କ ଫୁଟ୍‌ୱର୍କ, ଷ୍ଟ୍ରୋକ୍ ଓ ବଲ୍‌ର ସମୟ ନିର୍ଣ୍ଣୟ କରିବାର ଦକ୍ଷତାକୁ ଚିହ୍ନଟ କରିଥିଲେ।

କୋଚ୍ ସାଗର ଚୋପ୍ରାଙ୍କ ମତରେ, ତନ୍‌ଭୀଙ୍କ ଫୁଟ୍‌ୱର୍କ ଓ ଖେଳର ସମୟ ନିର୍ଣ୍ଣୟ କରିବାର ଦକ୍ଷତା ତାଙ୍କୁ ଅନ୍ୟ ଖେଳାଳିଙ୍କଠାରୁ ଅଲଗା କରେ। ଏହି ପ୍ରଶିକ୍ଷଣ ସହ ଅଲିମ୍ପିକ୍ ଗୋଲ୍ଡ କ୍ୱେଷ୍ଟ (OGQ) ମଧ୍ୟ ତାଙ୍କ ଖେଳ ଯାତ୍ରାକୁ ସମର୍ଥନ କରିଆସୁଛି।

ଡାକାରରେ ରୌପ୍ୟ, ଫାଇନାଲ୍‌ରେ ଦେଖାଇଲେ ଲଢ଼ୁଆ ମନୋଭାବ

୨୦୨୬ ଡାକାର ୟୁଥ୍ ଅଲିମ୍ପିକ୍ସର ମହିଳା ସିଙ୍ଗଲ୍ସ ଫାଇନାଲ୍‌ରେ ତନ୍‌ଭୀ ଚୀନର ଝାଙ୍ଗ୍ ୟି ଜିନ୍‌ଙ୍କୁ ଭେଟିଥିଲେ। ପ୍ରାୟ ୮୨ ମିନିଟ୍ ଧରି ଚାଲିଥିବା ଏହି ରୋମାଞ୍ଚକର ମ୍ୟାଚ୍‌ରେ ତନ୍‌ଭୀ ପ୍ରଥମ ଗେମ୍‌କୁ ୨୧-୧୫ରେ ଜିତିଥିଲେ। କିନ୍ତୁ ପରବର୍ତ୍ତୀ ଦୁଇଟି ଗେମ୍‌ରେ ଝାଙ୍ଗ୍ ୨୧-୧୩ ଓ ୨୬-୨୪ରେ ବିଜୟୀ ହୋଇ ସ୍ୱର୍ଣ୍ଣ ପଦକ ହାସଲ କରିଥିଲେ।

ନିର୍ଣ୍ଣାୟକ ଗେମ୍‌ରେ ତନ୍‌ଭୀ ଏକ ସମୟରେ ୧୦-୧୯ରେ ପଛୁଆ ଥିଲେ। ପରେ ଜବରଦସ୍ତ ପ୍ରତ୍ୟାବର୍ତ୍ତନ କରି ସ୍କୋରକୁ ୨୦-୨୦ରେ ପହଞ୍ଚାଇଥିଲେ। ଏପରିକି ପାଞ୍ଚଟି ମ୍ୟାଚ୍ ପଏଣ୍ଟ ବଞ୍ଚାଇ ମ୍ୟାଚ୍‌କୁ ଶେଷ ପର୍ଯ୍ୟନ୍ତ ଲଢ଼ିଥିଲେ। ଶେଷରେ ଅତି ସାମାନ୍ୟ ବ୍ୟବଧାନରେ ମ୍ୟାଚ୍ ହାରି ରୌପ୍ୟ ପଦକରେ ସନ୍ତୁଷ୍ଟ ହୋଇଥିଲେ।

​​​​​​​ଏହି ସଫଳତା ସହ ତନ୍‌ଭୀ ୟୁଥ୍ ଅଲିମ୍ପିକ୍ସରେ ବ୍ୟାଡମିଣ୍ଟନ୍‌ରେ ପଦକ ଜିତିଥିବା ପ୍ରଥମ ଭାରତୀୟ ମହିଳା ଶଟଲର୍ ଭାବେ ଇତିହାସ ରଚିଛନ୍ତି। ଏହା ପୂର୍ବରୁ ସେ ୨୦୨୪ରେ ଏସିଆନ୍ ଅଣ୍ଡର-୧୫ ଟାଇଟଲ୍ ଏବଂ ୨୦୨୬ରେ ଏସିଆନ୍ ଅଣ୍ଡର-୧୭ ଟାଇଟଲ୍ ଜିତିଥିଲେ।

ତନ୍‌ଭୀଙ୍କ ଏହି ସଫଳତା ପଛରେ ରହିଛି ବାପାଙ୍କ ସ୍ୱପ୍ନ, ପରିବାରର ତ୍ୟାଗ, ଚୀନରେ ମିଳିଥିବା ପ୍ରାରମ୍ଭିକ ପ୍ରଶିକ୍ଷଣ ଏବଂ ଭାରତରେ ମିଳିଥିବା ଉଚ୍ଚସ୍ତରୀୟ ଅଭ୍ୟାସ। ମାତ୍ର ୧୫ ବର୍ଷ ବୟସରେ ଏହି ରୌପ୍ୟ ପଦକ ତାଙ୍କ ଯାତ୍ରାର ଏକ ବଡ଼ ମାଇଲଖୁଣ୍ଟ। ଆଗକୁ ତାଙ୍କଠାରୁ ଆହୁରି ବଡ଼ ସଫଳତା ଆଶା କରୁଛି ଦେଶ।