ଗତ ୩୯ ଦିନ ଧରି ଇରାନ ଏବଂ ଆମେରିକା ମଧ୍ୟରେ ଜାରି ରହିଥିବା ତୀବ୍ର ଉତ୍ତେଜନା ଏବଂ ଯୁଦ୍ଧ ଆଶଙ୍କା ମଧ୍ୟରେ ଏକ ଅପ୍ରତ୍ୟାଶିତ ପରିବର୍ତ୍ତନ ଦେଖିବାକୁ ମିଳିଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୂର୍ବରୁ ଇରାନକୁ ‘ପାଷାଣ ଯୁଗ’କୁ ପଠାଇବାକୁ ଧମକ ଦେଇଥିବା ବେଳେ, ବର୍ତ୍ତମାନ ସେ ଇରାନ ପାଇଁ ‘ସୁବର୍ଣ୍ଣ ଯୁଗ’ ଆଣିବାର କଥା କହୁଛନ୍ତି।

ମଙ୍ଗଳବାର ଦିନ ଇରାନ ଓ ଆମେରିକା ଦୁଇ ସପ୍ତାହର ଅସ୍ତ୍ରବିରତି ପାଇଁ ସହମତ ହୋଇଥିଲେ। ଏହା ସହିତ ଟ୍ରମ୍ପ ତାଙ୍କ ‘ଟ୍ରୁଥ୍ ସୋସିଆଲ’ ମାଧ୍ୟମରେ ଇରାନଙ୍କ ୧୦-ସୂତ୍ରୀ ପ୍ରସ୍ତାବକୁ ଗ୍ରହଣ କରିଥିବା ସୂଚନା ଦେଇଥିଲେ। ଏହି ପ୍ରସ୍ତାବ ଅନୁସାରେ ହର୍ମୁଜ୍ ପ୍ରଣାଳୀ ପୁନଃ ଖୋଲାଯିବ ଏବଂ ଇରାନ ଏହାର ନିୟନ୍ତ୍ରଣ ରଖିବ।

ଏହା ପୂର୍ବରୁ, ଏପ୍ରିଲ ୧ ତାରିଖରେ ଟ୍ରମ୍ପ ଇରାନକୁ କଠୋର ଚେତାବନୀ ଦେଇଥିଲେ। ସେ କହିଥିଲେ ଯେ ଯଦି ଚୁକ୍ତି ନ ହୁଏ, ତେବେ ଆମେରିକୀୟ ସେନା ଇରାନର ଭିତ୍ତିଭୂମିକୁ ଧ୍ୱଂସ କରିଦେବ।

ତେବେ ଏବେ ତାଙ୍କ ମତରେ ପୁରା ପରିବର୍ତ୍ତନ ଦେଖାଯାଇଛି। ସେ ଇରାନର ପୁନଃନିର୍ମାଣ ପାଇଁ ସହଯୋଗ ଓ ମଧ୍ୟପ୍ରାଚ୍ୟରେ ‘ସୁବର୍ଣ୍ଣ ଯୁଗ’ ଆଣିବାର ଆଶା ବ୍ୟକ୍ତ କରିଛନ୍ତି। ଏହି ଦୁଇଟି ଟୁଇଟ୍ରେ ତାଙ୍କର ମତରେ ଅକାଶ ପାତାଳ ତଫାତ ଦେଖାଯାଇଛି।

ଯଦିଓ ଏହି ଅସ୍ତ୍ରବିରତି କେବଳ ଦୁଇ ସପ୍ତାହ ପାଇଁ ରହିଛି, ତଥାପି ଏହା ବିଶ୍ୱରେ ଏକ ସକାରାତ୍ମକ ସଙ୍କେତ ଦେଇଛି ଏବଂ ଆଗାମୀ ଦିନରେ ଶାନ୍ତି ଆଲୋଚନା ପାଇଁ ପଥ ପ୍ରସ୍ତୁତ କରିପାରେ।