ଓଡ଼ିଆଙ୍କ ପାଇଁ ଗର୍ବର ଖବର । ବଲିଉଡ୍‌ର ବହୁଚର୍ଚ୍ଚିତ ଫିଲ୍ମ ‘ରାମାୟଣ’ରେ ନିଜ ପ୍ରତିଭାର ଛାପ ଛାଡ଼ିଛନ୍ତି ତିନି ଓଡ଼ିଆ। ଫିଲ୍ମର VFX, ଚରିତ୍ର ଡିଜାଇନ୍ ଓ ଭିଜୁଆଲ୍ ଆର୍ଟସ୍‌ରେ କାମ କରି ଓଡ଼ିଶା ପାଇଁ ଗୌରବ ଆଣିଛନ୍ତି ରାଉରକେଲାର ଶ୍ୟାମ ମହାନନ୍ଦ, ଭୁବନେଶ୍ୱରର ପ୍ରତୀକ ପଣ୍ଡା ଓ କେନ୍ଦ୍ରାପଡ଼ାର ଭ୍ରମରବର ଦାଶ ।

VFXରେ କମାଲ ଦେଖାଇଛନ୍ତି ଶ୍ୟାମ

ରାଉରକେଲାର ଶ୍ୟାମ ମହାନନ୍ଦ ଫିଲ୍ମର ଭିଜୁଆଲ୍ ଇଫେକ୍ଟସ୍ (VFX) କ୍ଷେତ୍ରରେ କାମ କରିଛନ୍ତି। ଫିଲ୍ମର ଆକର୍ଷଣୀୟ ଦୃଶ୍ୟ ଓ କଳାତ୍ମକ ଉପସ୍ଥାପନା ପଛରେ ତାଙ୍କର ଗୁରୁତ୍ୱପୂର୍ଣ୍ଣ ଯୋଗଦାନ ରହିଛି।

ଏହି ପ୍ରୋଜେକ୍ଟକୁ ନେଇ ଶ୍ୟାମ କହିଛନ୍ତି, ଏହା ତାଙ୍କ ପାଇଁ ଏକ ବଡ଼ ସୁଯୋଗ ଏବଂ ସ୍ୱପ୍ନର ପ୍ରୋଜେକ୍ଟ। ଏହାର ଅଂଶ ହୋଇ ନିଜ ଯୋଗଦାନ ଦେଇପାରିଥିବାରୁ ସେ ବେଶ୍ ଖୁସି ।

ଚରିତ୍ର ଡିଜାଇନ୍‌ରେ ପ୍ରତୀକଙ୍କ ଯୋଗଦାନ

ସେହିପରି ଭୁବନେଶ୍ୱରର ପ୍ରତୀକ ପଣ୍ଡା ଫିଲ୍ମରେ ଚରିତ୍ର କନ୍‌ସେପ୍ଟ ଆର୍ଟିଷ୍ଟ ଭାବେ କାମ କରିଛନ୍ତି। ଫିଲ୍ମର ବିଭିନ୍ନ ଚରିତ୍ରର କଳ୍ପନା, ରୂପରେଖା ଓ ଭିଜୁଆଲ୍ ଡିଜାଇନ୍ ପ୍ରସ୍ତୁତିରେ ତାଙ୍କର ଭୂମିକା ରହିଛି।

ପ୍ରତୀକ କହିଛନ୍ତି, ବ୍ୟାସ, କପିଳ, ବାଲ୍ମୀକି ଓ କାଳିଦାସ ତାଙ୍କର ପ୍ରିୟ ଲେଖକ। ରାମାୟଣ ଓ ମହାଭାରତ ଭଳି ଭାରତୀୟ ମହାକାବ୍ୟଗୁଡ଼ିକୁ ସିନେମାରେ ଉପଯୁକ୍ତ ଭାବେ ଉପସ୍ଥାପନ କରାଯାଇନଥିବା ନେଇ ସେ ପୂର୍ବରୁ ଅନେକଥର ଭାବିଛନ୍ତି। ଏଭଳି ପ୍ରୋଜେକ୍ଟରେ ନିଜେ କାମ କରିବାର ସୁଯୋଗ ମିଳିବ ବୋଲି ସେ ଆଶା ରଖିଥିଲେ ।

ପୌରାଣିକ ଚରିତ୍ରକୁ ଜୀବନ୍ତ କରୁଛନ୍ତି ଭ୍ରମରବର

କେନ୍ଦ୍ରାପଡ଼ାର ଭ୍ରମରବର ଦାଶ ଫିଲ୍ମରେ ଭିଜୁଆଲ୍ ଆର୍ଟିଷ୍ଟ ଭାବେ କାମ କରିବା ସହ VFXରେ ମଧ୍ୟ ଯୋଗଦାନ ଦେଇଛନ୍ତି। ପୌରାଣିକ ଚରିତ୍ର ଓ କଳ୍ପିତ ଜୀବମାନଙ୍କୁ 3D ମଡେଲିଂ ମାଧ୍ୟମରେ ପରଦାରେ ଜୀବନ୍ତ କରିବାରେ ତାଙ୍କର ଭୂମିକା ରହିଛି।

ଭ୍ରମରବରଙ୍କ କହିବା ଅନୁସାରେ, ଇନ୍ଦ୍ରଙ୍କ ହାତୀ ଐରାବତର ଡେଣା ଥିବା ଭଳି ପୌରାଣିକ କଳ୍ପନାକୁ ପ୍ରଥମେ ମନରେ ରୂପ ଦିଆଯାଏ। ପରେ ଏହାକୁ 3D ମଡେଲିଂ ମାଧ୍ୟମରେ ଆକାର ଦିଆଯାଏ। ସେହିପରି କୁମ୍ଭକର୍ଣ୍ଣ, ଜଟାୟୁ, ସୁନା ହରିଣ ଓ ରାକ୍ଷସୀ ତାଡ଼କା ଭଳି ଚରିତ୍ରକୁ ମଧ୍ୟ 3D ମାଧ୍ୟମରେ ତିଆରି କରି ଫିଲ୍ମର ଲାଇଭ୍-ଆକ୍ସନ୍ ଦୃଶ୍ୟ ସହ ମିଶାଯାଏ ।

ପ୍ରାୟ ୬ ମାସ ଧରି ରାମାୟଣ ପାଇଁ କାମ କରିଛନ୍ତି

ସବୁଠାରୁ ଖୁସିର କଥା ହେଉଛି, ଏହି ତିନି ଓଡ଼ିଆ କଳାକାର ପ୍ରାୟ ୬ ମାସ ଧରି ‘ରାମାୟଣ’ ଫିଲ୍ମ ପାଇଁ କାମ କରିଛନ୍ତି। ଫିଲ୍ମର ଭିଜୁଆଲ୍ ଓ କଳାତ୍ମକ ଉପସ୍ଥାପନାକୁ ଆକର୍ଷଣୀୟ କରିବାରେ ସେମାନଙ୍କର ଅବଦାନ ରହିଛି।

ଓଡ଼ିଶାର ତିନି ଜଣ ପ୍ରତିଭାବାନ କଳାକାରଙ୍କ ଏହି ସଫଳତା ରାଜ୍ୟ ପାଇଁ ନିଶ୍ଚିତ ଭାବେ ଗର୍ବର ବିଷୟ ।