ୱାଶିଂଟନ୍/ତେଲ୍ ଆଭିଭ୍: ଇରାନ ଯୁଦ୍ଧକୁ ନେଇ ଆମେରିକା ଓ ଇସ୍ରାଏଲ ମଧ୍ୟରେ ମତଭେଦ ତୀବ୍ର ହେବାରେ ଲାଗିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ମଧ୍ୟରେ ସପ୍ତାହାନ୍ତରେ ହୋଇଥିବା ଏକ ଫୋନ୍ ବାର୍ତ୍ତାଳାପ ତୀବ୍ର ଯୁକ୍ତିତର୍କରେ ପରିଣତ ହୋଇଥିବା ଇସ୍ରାଏଲର କିଛି ଗଣମାଧ୍ୟମ ରିପୋର୍ଟ କରିଛନ୍ତି। ଏହି ଆଲୋଚନାକୁ ଏକ ତୀବ୍ର ମୁହାଁମୁହିଁ ବୋଲି ବର୍ଣ୍ଣନା କରାଯାଇଛି।

ରିପୋର୍ଟ ଅନୁସାରେ, ଇରାନ ବିରୋଧରେ ପୁଣିଥରେ ଯୁଦ୍ଧ ଆରମ୍ଭ କରିବାକୁ ନେତାନ୍ୟାହୁ ଟ୍ରମ୍ପଙ୍କ ଉପରେ ଚାପ ପକାଇଥିଲେ। ଅନ୍ୟପଟେ ଟ୍ରମ୍ପ ଇରାନ ସହ ଚାଲିଥିବା ଶାନ୍ତି ଆଲୋଚନାକୁ ଆଉ କିଛି ସମୟ ଦେବାକୁ ଚାହୁଁଥିବା କୁହାଯାଇଛି।

ଯୁଦ୍ଧ ଚାହୁଁଛନ୍ତି ନେତାନ୍ୟାହୁ, ଆଲୋଚନା ସପକ୍ଷରେ ଟ୍ରମ୍ପ

ଇସ୍ରାଏଲର ଗଣମାଧ୍ୟମ Ynet ଓ Yedioth Ahronoth ରିପୋର୍ଟ ଅନୁସାରେ, ନେତାନ୍ୟାହୁ ଟ୍ରମ୍ପଙ୍କୁ ଇରାନ ବିରୋଧରେ ପୁଣି ସାମରିକ ଅଭିଯାନ ଆରମ୍ଭ କରିବାକୁ ବାରମ୍ବାର ଅନୁରୋଧ କରିଥିଲେ। କିନ୍ତୁ ଟ୍ରମ୍ପ ଏହି ପ୍ରସ୍ତାବରେ ରାଜି ନହୋଇ ଇରାନ ସହ ଚାଲିଥିବା କୂଟନୈତିକ ଆଲୋଚନାକୁ ଆଗକୁ ବଢ଼ାଇବାକୁ ଚାହୁଁଥିଲେ ।

ଉଭୟ ଗଣମାଧ୍ୟମର ସୂତ୍ର ଏହି ଫୋନ୍ ବାର୍ତ୍ତାଳାପକୁ ଅତ୍ୟନ୍ତ ଉତ୍ତେଜନାପୂର୍ଣ୍ଣ ବୋଲି ବର୍ଣ୍ଣନା କରିଛନ୍ତି। ତେବେ ଇସ୍ରାଏଲର ପ୍ରଧାନମନ୍ତ୍ରୀ କାର୍ଯ୍ୟାଳୟ ଏହି ଦାବିକୁ ଖଣ୍ଡନ କରିଛି। ଆଲୋଚନା ସମୟରେ କୌଣସି ମୁହାଁମୁହିଁ ସ୍ଥିତି ସୃଷ୍ଟି ହୋଇନଥିଲା ଏବଂ ଏହି ରିପୋର୍ଟଗୁଡ଼ିକୁ 'ଫେକ୍ ନ୍ୟୁଜ୍' ବୋଲି କୁହାଯାଇଛି।

ଇରାନରେ ଶାସନ ପରିବର୍ତ୍ତନ ଚାହୁଁଛନ୍ତି ନେତାନ୍ୟାହୁ

ନେତାନ୍ୟାହୁ ଦୀର୍ଘଦିନ ଧରି ଇରାନ ବିରୋଧରେ ଆମେରିକାକୁ ପୁଣି ସାମରିକ ଆକ୍ରମଣ ଆରମ୍ଭ କରିବାକୁ କହିଆସୁଛନ୍ତି। ତାଙ୍କ ମତରେ, ଇରାନର ବର୍ତ୍ତମାନର ଶାସନ ବ୍ୟବସ୍ଥାର ପରିବର୍ତ୍ତନ ହିଁ ଏହି ସମସ୍ୟାର ସ୍ଥାୟୀ ସମାଧାନ।

ମଙ୍ଗଳବାର ଇସ୍ରାଏଲର ୨୬ତମ କ୍ନେସେଟ୍ ଅଧିବେଶନକୁ ସମ୍ବୋଧିତ କରି ନେତାନ୍ୟାହୁ କହିଥିଲେ ଯେ ଇରାନର ପରମାଣୁ କାର୍ଯ୍ୟକ୍ରମ ଓ ଏହାରୁ ସୃଷ୍ଟି ହେଉଥିବା ବିପଦକୁ ସ୍ଥାୟୀ ଭାବେ ଦୂର କରିବା ପାଇଁ ଆୟାତୋଲ୍ଲା ଶାସନର ଅନ୍ତ ଆବଶ୍ୟକ।

ସେ କହିଥିଲେ, ଇରାନ ପୁଣିଥରେ ପରମାଣୁ ବିପଦ ସୃଷ୍ଟି କରିବାକୁ ଚେଷ୍ଟା କରୁଛି। ଏହି ବିପଦକୁ ସ୍ଥାୟୀ ଭାବେ ଦୂର କରିବାର ଏକମାତ୍ର ଉପାୟ ହେଉଛି ଆୟାତୋଲ୍ଲା ଶାସନର ପତନ ।

ଯୁଦ୍ଧ ପୁଣି ଆରମ୍ଭ କରିବାକୁ ଚାହୁଁନାହାନ୍ତି ଟ୍ରମ୍ପ

ଅନ୍ୟପଟେ ଡୋନାଲ୍ଡ ଟ୍ରମ୍ପ ଇରାନ ବିରୋଧରେ ପୁଣି ଯୁଦ୍ଧ ଆରମ୍ଭ କରିବାକୁ ଆଗ୍ରହୀ ନଥିବା ଜଣାପଡ଼ିଛି। ସେ ଇରାନ ଉପରେ ଆର୍ଥିକ ଚାପ ଜାରି ରଖି ଆଲୋଚନା ମାଧ୍ୟମରେ ନିଜ ସର୍ତ୍ତ ମନାଇବାକୁ ଚାହୁଁଛନ୍ତି।

ରବିବାର '60 Minutes' କାର୍ଯ୍ୟକ୍ରମରେ ଯୁଦ୍ଧ ପୁଣି ଆରମ୍ଭ ହେବ କି ବୋଲି ପଚରାଯିବାରୁ ଟ୍ରମ୍ପ କହିଥିଲେ ଯେ ଏହାର କୌଣସି କାରଣ ସେ ଦେଖୁନାହାନ୍ତି।

ଏହା ପୂର୍ବରୁ ଜୁନ୍ ମାସରେ ମଧ୍ୟ ଉଭୟ ନେତାଙ୍କ ମଧ୍ୟରେ ଇରାନ ଯୁଦ୍ଧକୁ ନେଇ ମତଭେଦ ହୋଇଥିବା ଖବର ଆସିଥିଲା। ଏକ ସାକ୍ଷାତକାରରେ ଟ୍ରମ୍ପ ନେତାନ୍ୟାହୁଙ୍କ ସହ ହୋଇଥିବା ଏକ ଫୋନ୍ କଥାବାର୍ତ୍ତା ସମ୍ପର୍କରେ ମଧ୍ୟ କଠୋର ମନ୍ତବ୍ୟ ଦେଇଥିଲେ ।

ରାଜନୈତିକ ଅନିଶ୍ଚିତତା ମଧ୍ୟରେ ନେତାନ୍ୟାହୁ

ଇସ୍ରାଏଲରେ ଅକ୍ଟୋବରରେ ହୋଇଥିବା ସାଧାରଣ ନିର୍ବାଚନ ପରେ ନେତାନ୍ୟାହୁଙ୍କ ରାଜନୈତିକ ସ୍ଥିତି ମଧ୍ୟ ଅନିଶ୍ଚିତତା ମଧ୍ୟରେ ରହିଛି। ଦେଶର ଦୀର୍ଘତମ ସମୟ ଧରି ପ୍ରଧାନମନ୍ତ୍ରୀ ଥିବା ନେତାନ୍ୟାହୁ ନିର୍ବାଚନରେ ଆସନ ହରାଇବା ପରେ ନିଜ ପଦ ବଜାୟ ରଖିବା ନେଇ ଚାପରେ ଅଛନ୍ତି ।

ଏଭଳି ସ୍ଥିତିରେ ଇରାନ ଯୁଦ୍ଧକୁ ନେଇ ଆମେରିକା ଓ ଇସ୍ରାଏଲ ମଧ୍ୟରେ ମତଭେଦ ଦୁଇ ଦେଶର ସମ୍ପର୍କକୁ ପ୍ରଭାବିତ କରିପାରେ। ଗୋଟିଏ ପଟେ ନେତାନ୍ୟାହୁ ସାମରିକ ଆକ୍ରମଣ ଓ ଶାସନ ପରିବର୍ତ୍ତନ ଉପରେ ଜୋର୍ ଦେଉଥିବା ବେଳେ ଟ୍ରମ୍ପ କୂଟନୀତି ଓ ଆର୍ଥିକ ଚାପ ମାଧ୍ୟମରେ ସମାଧାନ ଖୋଜୁଛନ୍ତି ।

ଏହି ମତଭେଦ ଆଗାମୀ ଦିନରେ ଇରାନ ଯୁଦ୍ଧର ଦିଗ ନିର୍ଦ୍ଧାରଣ କରିବାରେ ଗୁରୁତ୍ୱପୂର୍ଣ୍ଣ ହୋଇପାରେ ।