ତେଲ୍ ଆଭିଭ୍: ଇରାନ ଉପରେ ପୁଣିଥରେ ଆକ୍ରମଣ କରିବାକୁ ପ୍ରସ୍ତୁତ ହେଉଛି ଇସ୍ରାଏଲ! ସମ୍ଭାବ୍ୟ ସାମରିକ ଅଭିଯାନ ପାଇଁ ନିଜ ସେନାକୁ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦେଇଛି ଇସ୍ରାଏଲର ସୁରକ୍ଷା କ୍ୟାବିନେଟ୍ । ଏହାକୁ ନେଇ ଇସ୍ରାଏଲରେ ରାଜନୈତିକ ମହଲରେ ହଟଚମଟ ସୃଷ୍ଟି ହୋଇଛି। ଅନ୍ୟପଟେ, ନୂଆ ସରକାର ଗଠନ ହେବା ପର୍ଯ୍ୟନ୍ତ କୌଣସି ଅନାବଶ୍ୟକ ସାମରିକ ଅଭିଯାନ ନକରିବାକୁ କାମଚଳା ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କୁ ଚେତାବନୀ ଦେଇଛନ୍ତି ବିରୋଧୀ ନେତା ଗାଦି ଆଇଜେନକୋଟ୍ ।

ଇସ୍ରାଏଲର ସୁରକ୍ଷା କ୍ୟାବିନେଟ୍ ବୁଧବାର ସେନାକୁ ଏହି ନିର୍ଦ୍ଦେଶ ଦେଇଥିବା ଜଣାପଡ଼ିଛି। ଇସ୍ରାଏଲର ସରକାରୀ ପ୍ରସାରଣ ସଂସ୍ଥା KAN ରିପୋର୍ଟ ଅନୁସାରେ, ସୁରକ୍ଷା କ୍ୟାବିନେଟ୍ ପକ୍ଷରୁ ଜାରି ନିର୍ଦ୍ଦେଶ ଏଭଳି ସାମରିକ କାର୍ଯ୍ୟକଳାପର ରାସ୍ତା ଖୋଲିପାରେ, ଯାହା ଏକ ବଡ଼ ଯୁଦ୍ଧର କାରଣ ହୋଇପାରେ ।

ଉଲ୍ଲେଖଯୋଗ୍ୟ, ଅକ୍ଟୋବର ୫ ତାରିଖରେ ଇସ୍ରାଏଲର ସୁରକ୍ଷା କ୍ୟାବିନେଟ୍‌ର ଶେଷ ବୈଠକ ବସିଥିଲା। ଏହାର କିଛି ସପ୍ତାହ ପରେ ଅକ୍ଟୋବର ୨୭ରେ ଦେଶରେ ନିର୍ବାଚନ ହୋଇଥିଲା। ଏବେ ନୂଆ ସରକାର ଗଠନ ପ୍ରକ୍ରିୟା ଚାଲିଥିବା ବେଳେ ସେନାକୁ ଦିଆଯାଇଥିବା ଏହି ନିର୍ଦ୍ଦେଶକୁ ନେଇ ପ୍ରଶ୍ନ ଉଠିଛି ।

ନେତାନ୍ୟାହୁଙ୍କୁ ସତର୍କ କରାଇଲେ ଆଇଜେନକୋଟ୍

ଇସ୍ରାଏଲର ପରବର୍ତ୍ତୀ ସରକାର ଗଠନ ଦାୟିତ୍ୱ ପାଇଥିବା ଗାଦି ଆଇଜେନକୋଟ୍ ନେତାନ୍ୟାହୁଙ୍କୁ ଏକ ଚିଠି ଲେଖି ସତର୍କ କରାଇଛନ୍ତି। ତତ୍କାଳ ଓ ପ୍ରତ୍ୟକ୍ଷ ବିପଦ ନଥିଲେ କୌଣସି ସାମରିକ କିମ୍ବା ସୁରକ୍ଷା ଅଭିଯାନ ଆରମ୍ଭ ନକରିବାକୁ ସେ ଅନୁରୋଧ କରିଛନ୍ତି।

ଇସ୍ରାଏଲର ଗଣମାଧ୍ୟମ Ynet ଅନୁସାରେ, ଆଇଜେନକୋଟ୍ କହିଛନ୍ତି ଯେ ନେତାନ୍ୟାହୁ ଏବେ ଏକ କାମଚଳା ସରକାରର ନେତୃତ୍ୱ ନେଉଛନ୍ତି। ଇସ୍ରାଏଲ ସଂସଦ କ୍ନେସେଟ୍‌ରେ ତାଙ୍କ ସରକାରଙ୍କ ପାଖରେ ଆଉ ପୂର୍ବଭଳି ସମର୍ଥନ ନାହିଁ।

ଆଇଜେନକୋଟ୍ ନେତାନ୍ୟାହୁଙ୍କୁ କହିଛନ୍ତି, ମାତ୍ର ୪୬ ଜଣ ସାଂସଦ ଏବେ ମଧ୍ୟ ଆପଣଙ୍କ ପ୍ରଧାନମନ୍ତ୍ରୀ ପଦରେ ରହିବାକୁ ସମର୍ଥନ କରୁଛନ୍ତି। ତେଣୁ ଏଭଳି ରାଜନୈତିକ ପରିବର୍ତ୍ତନ ସମୟରେ ଦେଶର ସୁରକ୍ଷା ସମ୍ପର୍କିତ ନିଷ୍ପତ୍ତି ନେବା ବେଳେ ବିଶେଷ ସତର୍କତା ଅବଲମ୍ବନ କରିବା ଆବଶ୍ୟକ ।

ସାମରିକ ପଦକ୍ଷେପ ଗଣତନ୍ତ୍ର ପାଇଁ ବିପଦ!

ସୋସିଆଲ ମିଡିଆ ପ୍ଲାଟଫର୍ମ Xରେ ଏକ ପୋଷ୍ଟ କରି ଆଇଜେନକୋଟ୍ କହିଛନ୍ତି ଯେ ସରକାର ପରିବର୍ତ୍ତନ ସମୟରେ ସୁରକ୍ଷା ଓ ଜାତୀୟ ନିଷ୍ପତ୍ତି ନେବା ବେଳେ ନେତାନ୍ୟାହୁଙ୍କ ଉପରେ ଅଧିକ ଦାୟିତ୍ୱ ରହିଛି।

ସେ ଚେତାବନୀ ଦେଇ କହିଛନ୍ତି ଯେ କୌଣସି ପ୍ରତ୍ୟକ୍ଷ ଓ ତତ୍କାଳ ବିପଦ ନଥିବା ସ୍ଥିତିରେ ସୁରକ୍ଷା ବାହିନୀକୁ ନିୟୋଜିତ କରିବା ଇସ୍ରାଏଲର ଗଣତନ୍ତ୍ର ଏବଂ ସରକାରୀ ସଂସ୍ଥାଗୁଡ଼ିକ ଉପରେ ଲୋକଙ୍କ ବିଶ୍ୱାସକୁ ଗୁରୁତର ଭାବେ ପ୍ରଭାବିତ କରିପାରେ ।

ନୂଆ ସରକାର କ୍ନେସେଟ୍‌ର ସମର୍ଥନ ସହ ଶପଥ ନେବା ପର୍ଯ୍ୟନ୍ତ ନେତାନ୍ୟାହୁଙ୍କୁ ଧୈର୍ଯ୍ୟ ରଖିବା ସହ ଅପେକ୍ଷା କରିପାରୁଥିବା ବିପଜ୍ଜନକ ନିଷ୍ପତ୍ତିରୁ ଦୂରେଇ ରହିବାକୁ ସେ ଅନୁରୋଧ କରିଛନ୍ତି।

ନୂଆ ସରକାର ଗଠନ ଦାୟିତ୍ୱ ଆଇଜେନକୋଟ୍‌ଙ୍କୁ

ଇସ୍ରାଏଲର ରାଷ୍ଟ୍ରପତି ଆଇଜାକ୍ ହର୍ଜୋଗ୍ ରବିବାର ଗାଦି ଆଇଜେନକୋଟ୍‌ଙ୍କୁ ନୂଆ ସରକାର ଗଠନ କରିବାର ଆନୁଷ୍ଠାନିକ ଦାୟିତ୍ୱ ଦେଇଛନ୍ତି।

ସଂସଦର ୬୭ ଜଣ ସଦସ୍ୟ ଆଇଜେନକୋଟ୍‌ଙ୍କୁ ସମର୍ଥନ କରିଥିବା ବେଳେ ୪୬ ଜଣ ସଦସ୍ୟ ନେତାନ୍ୟାହୁଙ୍କୁ ସମର୍ଥନ କରିଥିଲେ। ଅନ୍ୟ ୭ ଜଣ ସାଂସଦ କୌଣସି ପ୍ରାର୍ଥୀଙ୍କୁ ସମର୍ଥନ କରିନଥିଲେ । 

ନୂଆ ସରକାର ଗଠନ ପାଇଁ ଆଇଜେନକୋଟ୍‌ଙ୍କୁ ୨୮ ଦିନ ସମୟ ମିଳିଛି। ଆବଶ୍ୟକ ପଡ଼ିଲେ ଆଉ ୧୪ ଦିନ ସମୟ ବୃଦ୍ଧି କରାଯାଇପାରିବ ।

ଏଭଳି ସ୍ଥିତିରେ ଇରାନ ବିରୋଧରେ ପୁଣି ସାମରିକ ପଦକ୍ଷେପ ନେବାକୁ ଇସ୍ରାଏଲର ପ୍ରସ୍ତୁତି ଏବଂ ନୂଆ ସରକାର ଗଠନ ପୂର୍ବରୁ ନେତାନ୍ୟାହୁଙ୍କୁ ଦିଆଯାଇଥିବା ଚେତାବନୀ ଆଗାମୀ ଦିନରେ ଇସ୍ରାଏଲର ରାଜନୀତି ଓ ମଧ୍ୟପ୍ରାଚ୍ୟର ସୁରକ୍ଷା ସ୍ଥିତିକୁ ଆହୁରି ଜଟିଳ କରିପାରେ ।