ରାଜଧାନୀ ଦିଲ୍ଲୀର ଜନ୍ତର ମନ୍ତରରେ ଚାଲିଥିବା ଛାତ୍ର ଆନ୍ଦୋଳନ ଓ ଲାଠିଚାର୍ଜ ଘଟଣା ମଧ୍ୟରେ ଏନ୍‌ସିପି (ଶରଦ ପାୱାର ଗୋଷ୍ଠୀ) ମୁଖ୍ୟ ଶରଦ ପାୱାର ଏବଂ ତାଙ୍କ ଝିଅ ତଥା ସାଂସଦ ସୁପ୍ରିୟା ସୁଲେ ବୁଧବାର ସଂସଦ ଭବନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛନ୍ତି।

ସାକ୍ଷାତ ସମୟରେ ପ୍ରଧାନମନ୍ତ୍ରୀ ମୋଦୀ ଶରଦ ପାୱାରଙ୍କୁ ସ୍ୱାଗତ କରି ତାଙ୍କ ହାତ ଧରି ବୈଠକ ସ୍ଥଳକୁ ନେଉଥିବା ଦୃଶ୍ୟ ସାମ୍ନାକୁ ଆସିଛି। ଏହି ବୈଠକ ଶରଦ ପାୱାର ଓ ସୁପ୍ରିୟା ସୁଲେଙ୍କ ଜନ୍ତର ମନ୍ତର ଗସ୍ତର ଗୋଟିଏ ଦିନ ପରେ ହୋଇଥିବାରୁ ଏହାକୁ ନେଇ ରାଜନୈତିକ ମହଲରେ ବିଭିନ୍ନ ଆଲୋଚନା ଆରମ୍ଭ ହୋଇଛି।

ଏହାପୂର୍ବରୁ ଶରଦ ପାୱାର ଓ ସୁପ୍ରିୟା ସୁଲେ ପ୍ରତିବାଦ କରୁଥିବା ଛାତ୍ରମାନଙ୍କୁ ସମର୍ଥନ ଜଣାଇଥିଲେ ଏବଂ ଲାଠିଚାର୍ଜ ଘଟଣାକୁ ନିନ୍ଦା କରିଥିଲେ। ସଂସଦର ମୌସୁମୀ ଅଧିବେଶନ ଚାଲିଥିବା ସମୟରେ ହୋଇଥିବା ଏହି ସାକ୍ଷାତ ଏବେ ରାଜନୈତିକ ଚର୍ଚ୍ଚାକୁ ଆହୁରି ତୀବ୍ର କରିଛି।

ତେବେ ଏହି ବୈଠକର ଉଦ୍ଦେଶ୍ୟ କ’ଣ ଥିଲା କିମ୍ବା ପ୍ରଧାନମନ୍ତ୍ରୀ ମୋଦୀ, ଶରଦ ପାୱାର ଓ ସୁପ୍ରିୟା ସୁଲେଙ୍କ ମଧ୍ୟରେ କେଉଁ ପ୍ରସଙ୍ଗରେ ଆଲୋଚନା ହୋଇଛି, ସେନେଇ କୌଣସି ସରକାରୀ ସୂଚନା ପ୍ରକାଶ ପାଇନାହିଁ।

ଏହାରି ମଧ୍ୟରେ କିଛି ଦିନ ଧରି ଏପରି ଚର୍ଚ୍ଚା ହେଉଛି ଯେ, ଶରଦ ପାୱାରଙ୍କ ଗୋଷ୍ଠୀ ସଂସଦରେ ଆସୁଥିବା କେତେକ ଗୁରୁତ୍ୱପୂର୍ଣ୍ଣ ବିଲ୍‌ରେ ଏନ୍‌ଡିଏ ସରକାରକୁ ସମର୍ଥନ କରିପାରେ। ବିଶେଷ କରି ମହିଳା ସଂରକ୍ଷଣ ବିଲ୍ ଓ ସୀମା ନିର୍ଦ୍ଧାରଣ ବିଲ୍‌କୁ ନେଇ ବିଭିନ୍ନ ବିରୋଧୀ ଦଳ ସହ ଏନ୍‌ଡିଏର ଆଲୋଚନା ଚାଲିଥିବା ଚର୍ଚ୍ଚା ହେଉଛି।