ଆନ୍ତର୍ଜାତିକ: ମଧ୍ୟପ୍ରାଚ୍ୟରେ ତୈଳ ପରିବହନକୁ ନେଇ ସଙ୍କଟ ଆହୁରି ଗଭୀର ହେଉଛି। ଡ୍ରୋନ୍ ଆକ୍ରମଣ ପରେ ସୁରକ୍ଷାମୂଳକ ପଦକ୍ଷେପ ସ୍ୱରୂପ ସାଉଦି ଆରବ ଏହାର ପୂର୍ବ-ପଶ୍ଚିମ ତୈଳ ପାଇପଲାଇନ୍‌କୁ ଅସ୍ଥାୟୀ ଭାବେ ବନ୍ଦ କରିଛି। ଏହି ପାଇପଲାଇନ୍ ସାଉଦି ଆରବର ପୂର୍ବ ଅଞ୍ଚଳର ତୈଳ ଉତ୍ପାଦନ କ୍ଷେତ୍ରରୁ ଲୋହିତ ସାଗର କୂଳରେ ଥିବା ୟାନବୁ ବନ୍ଦରକୁ ଅଶୋଧିତ ତେଲ ପରିବହନ କରେ।

ଏହି ପାଇପଲାଇନ୍‌ର ଗୁରୁତ୍ୱ ହେଉଛି, ଏହା ମାଧ୍ୟମରେ ସାଉଦି ଆରବ ହର୍ମୁଜ୍ ପ୍ରଣାଳୀକୁ ବାଇପାସ୍ କରି ବିଶ୍ୱ ବଜାରକୁ ତେଲ ପଠାଇପାରେ। କିନ୍ତୁ ଗୁରୁବାର ଅନେକ ଡ୍ରୋନ୍ ଏହି ପାଇପଲାଇନ୍‌କୁ ଟାର୍ଗେଟ୍ କରିବା ପରେ ସୁରକ୍ଷା ଦୃଷ୍ଟିରୁ ଏହାର କାର୍ଯ୍ୟକଳାପ ବନ୍ଦ କରାଯାଇଛି।

ସାଉଦି ଶକ୍ତି ମନ୍ତ୍ରଣାଳୟ ଅନୁସାରେ, ପାଇପଲାଇନ୍‌କୁ ସାମୟିକ ଭାବେ ବନ୍ଦ କରାଯାଇଛି। ଆମେରିକୀୟ ଅଧିକାରୀଙ୍କ ଅନୁସାରେ, ଆକ୍ରମଣରେ ପାଇପଲାଇନ୍‌ର ରାସ୍ତାରେ ଥିବା କିଛି ପମ୍ପିଂ ଷ୍ଟେସନ୍ କ୍ଷତିଗ୍ରସ୍ତ ହୋଇଛି। ସାଟେଲାଇଟ୍ ଚିତ୍ରରେ ଗୋଟିଏ ଷ୍ଟେସନ୍‌ରେ ଅଗ୍ନିକାଣ୍ଡର ଚିହ୍ନ ଏବଂ ଅନ୍ୟ ଏକ ଷ୍ଟେସନ୍‌ରୁ କଳା ଧୂଆଁ ବାହାରୁଥିବା ଦେଖାଯାଇଥିବା ରିପୋର୍ଟରେ କୁହାଯାଇଛି।

ସାଉଦି ବିଦେଶ ମନ୍ତ୍ରଣାଳୟର ଅଭିଯୋଗ ଅନୁସାରେ, ଡ୍ରୋନ୍‌ଗୁଡ଼ିକ ଇରାକରୁ ଆସିଥିଲା। ଆକ୍ରମଣରେ କିଛି ଲୋକ ଆହତ ହେବା ସହ କ୍ଷୟକ୍ଷତି ହୋଇଥିବା ମଧ୍ୟ କୁହାଯାଇଛି। କ୍ଷତିଗ୍ରସ୍ତ ଅଂଶର ମରାମତି କାମ ଚାଲିଛି। ଇରାକ ଏହି ଆକ୍ରମଣକୁ ନିନ୍ଦା କରିବା ସହ ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଛି।

ହର୍ମୁଜ୍ ସଙ୍କଟ ମଧ୍ୟରେ ପାଇପଲାଇନ୍‌ର ଗୁରୁତ୍ୱ ବଢ଼ିଛି

ଇରାନ ଆକ୍ରମଣ ଯୋଗୁଁ ହର୍ମୁଜ୍ ପ୍ରଣାଳୀ ଦେଇ ତୈଳ ପରିବହନ ପ୍ରାୟ ବନ୍ଦ ହୋଇଥିବା ପରିସ୍ଥିତିରେ ସାଉଦି ଆରବ ପାଇଁ ପୂର୍ବ-ପଶ୍ଚିମ ପାଇପଲାଇନ୍ ଏକ ବିକଳ୍ପ ମାର୍ଗ ଭାବେ ଗୁରୁତ୍ୱ ବହନ କରୁଛି।

ଜୁନ୍ ଆରମ୍ଭ ସୁଦ୍ଧା ଏହି ପାଇପଲାଇନ୍ ମାଧ୍ୟମରେ ୟାନବୁକୁ ଦୈନିକ ୫ ନିୟୁତ ବ୍ୟାରେଲ୍‌ରୁ ଅଧିକ ତେଲ ପରିବହନ କରାଯାଉଥିଲା ବୋଲି ରିପୋର୍ଟରେ ଦାବି କରାଯାଇଛି। ବିଶେଷଜ୍ଞଙ୍କ ମତରେ, ପାଇପଲାଇନ୍‌ର ମରାମତି ଅପେକ୍ଷା କ୍ଷତିଗ୍ରସ୍ତ ପମ୍ପିଂ ଷ୍ଟେସନ୍‌ଗୁଡ଼ିକୁ ଶୀଘ୍ର ମରାମତି କରିବା ସମ୍ଭବ ହୋଇପାରେ। ତେବେ କ୍ଷୟକ୍ଷତିର ସମ୍ପୂର୍ଣ୍ଣ ପରିମାଣ ଏପର୍ଯ୍ୟନ୍ତ ସ୍ପଷ୍ଟ ନୁହେଁ।

ଏହା ସହ ସାଉଦି ଆରବ OPECକୁ ଜଣାଇଛି ଯେ ଗତ ମାସରେ ଦେଶର ଅଶୋଧିତ ତୈଳ ଉତ୍ପାଦନ ୧୯୯୦ ପରଠାରୁ ସର୍ବନିମ୍ନ ସ୍ତରରେ ପହଞ୍ଚିଛି।

ବାବ୍ ଅଲ୍-ମାଣ୍ଡେବ ନେଇ ମଧ୍ୟ ଚିନ୍ତା

ଅନ୍ୟପଟେ, ୟେମେନର ହୁତି ବିଦ୍ରୋହୀମାନେ ମାୟୁନ୍ ଦ୍ୱୀପ ଉପରେ ନିୟନ୍ତ୍ରଣ ନେଇଥିବା ରିପୋର୍ଟ ଆସିଛି। ଏହି ଛୋଟ ଜ୍ୱାଳାମୁଖୀ ଦ୍ୱୀପଟି ବାବ୍ ଅଲ୍-ମାଣ୍ଡେବ୍ ପ୍ରଣାଳୀ ନିକଟରେ ଅବସ୍ଥିତ। ବିଶ୍ୱର ଏକ ପ୍ରମୁଖ ସାମୁଦ୍ରିକ ବାଣିଜ୍ୟ ମାର୍ଗ ଭାବେ ଏହି ପଥର ଗୁରୁତ୍ୱ ରହିଛି।

ହୁତି ଆକ୍ରମଣ ଯୋଗୁଁ ୨୦୨୩ ଶେଷ ପରଠାରୁ ବାବ୍ ଅଲ୍-ମାଣ୍ଡେବ୍ ଦେଇ ଜାହାଜ ଚଳାଚଳ ପ୍ରାୟ ୬୦ ପ୍ରତିଶତ ହ୍ରାସ ପାଇଥିବା ରିପୋର୍ଟରେ କୁହାଯାଇଛି। ଏହି ମାର୍ଗରେ ବିପଦ ବଢ଼ିଲେ ସାଉଦି ଆରବର ତୈଳ ପରିବହନ ଆହୁରି ଜଟିଳ ହୋଇପାରେ।

୧୦୦ ଡଲାର ପାର୍ କଲା ଅଶୋଧିତ ତୈଳ ଦର

ମଧ୍ୟପ୍ରାଚ୍ୟରେ ବଢ଼ୁଥିବା ଉତ୍ତେଜନା ଓ ତୈଳ ପରିବହନ ମାର୍ଗରେ ବାଧା ମଧ୍ୟରେ ଚଳିତ ସପ୍ତାହରେ ଅଶୋଧିତ ତୈଳ ଦର ପୁଣିଥରେ ବ୍ୟାରେଲ୍ ପିଛା ୧୦୦ ଡଲାର ଅତିକ୍ରମ କରିଛି।

ଇରାନ ହୁତି ବିଦ୍ରୋହୀଙ୍କୁ ସମର୍ଥନ କରୁଥିବାରୁ ତୈଳ ପରିବହନ ନେଇ ଭୂ-ରାଜନୈତିକ ଚିନ୍ତା ଆହୁରି ବଢ଼ିଛି। ଯଦି ଏହି ସଙ୍କଟ ଦୀର୍ଘସ୍ଥାୟୀ ହୁଏ, ତେବେ ବିଶ୍ୱ ତୈଳ ଯୋଗାଣ ଓ ମୂଲ୍ୟ ଉପରେ ଏହାର ପ୍ରଭାବ ପଡ଼ିପାରେ।