ସମ୍ବଲପୁର: ସମ୍ବଲପୁର ଜିଲ୍ଲାରେ ବଢ଼ୁଥିବା ଗୁଳିକାଣ୍ଡ ଘଟଣା ଏବେ ଚିନ୍ତାର କାରଣ ପାଲଟିଛି। ବିଶେଷକରି ଦେଶୀ ବନ୍ଧୁକର ବ୍ୟବହାର କରି ହତ୍ୟା ଭଳି ଅପରାଧ ଘଟୁଥିବାରୁ ଜିଲ୍ଲାରେ ବେଆଇନ ଅସ୍ତ୍ରଶସ୍ତ୍ର ଉପଲବ୍ଧତାକୁ ନେଇ ପ୍ରଶ୍ନ ଉଠିଛି।

ସେପ୍ଟେମ୍ବର ୧୦ ତାରିଖରେ ରେଢ଼ାଖୋଲ ଅଞ୍ଚଳର ଲାଣ୍ଡିମାଲ ଗାଁର ଡମ୍ବରୁ ମିର୍ଦ୍ଧା ମିର୍ଦ୍ଧା ଗାଁ ଜଙ୍ଗଲ ପଟୁ ଘରକୁ ଫେରୁଥିବା ସମୟରେ ପୁଲିସ ତାଙ୍କ ହାତରେ ଏକ ଦେଶୀ ବନ୍ଧୁକ ଦେଖିଥିଲା। ପୁଲିସକୁ ଦେଖି ଡମ୍ବରୁ ଖସିଯିବାକୁ ଚେଷ୍ଟା କରିଥିବା ବେଳେ ତାଙ୍କୁ କାବୁ କରାଯାଇଥିଲା। ବନ୍ଧୁକର ବୈଧ ଲାଇସେନ୍ସ ଦେଖାଇ ନପାରିବାରୁ ପୁଲିସ ତାଙ୍କୁ ଗିରଫ କରିଛି।

ତେବେ ଏହା ପ୍ରଥମ ଘଟଣା ନୁହେଁ। ସେପ୍ଟେମ୍ବର ୭ରେ ରେଢ଼ାଖୋଲ ନାକଟିଦେଉଳ ଅଞ୍ଚଳର ଲାଣ୍ଡିମାଲ ଗାଁରେ ଗୁଳିକାଣ୍ଡ ଘଟିଥିଲା। ନିଶାସକ୍ତ ଅବସ୍ଥାରେ ସ୍ୱାମୀ ଚରଣ ମିର୍ଦ୍ଧା ନିଜ ସ୍ତ୍ରୀ ଅମ୍ବିକା ମିର୍ଦ୍ଧାଙ୍କୁ ଦେଶୀ ବନ୍ଧୁକରେ ଗୁଳି କରି ହତ୍ୟା କରିଥିବା ଅଭିଯୋଗ ହୋଇଥିଲା।

ଏହା ପୂର୍ବରୁ ଅଗଷ୍ଟ ୨୯ରେ ବୁର୍ଲା କିର୍ବା ଛକରେ ମାଂସ ବ୍ୟବସାୟୀ ଏମ୍‌ଡି ଅନିଶଙ୍କୁ ଦେଶୀ ବନ୍ଧୁକରେ ଗୁଳି କରି ହତ୍ୟା କରାଯାଇଥିଲା। ଏହି ଘଟଣାରେ ରଜା ସ୍ୱାମୀ ନାମକ ଜଣେ ଯୁବକଙ୍କ ନାଁ ସାମ୍ନାକୁ ଆସିଥିଲା।

ସେହିପରି ଜୁଲାଇ ୨୪ରେ ରେଢ଼ାଖୋଲ ଡଇଁଚା ହିନ୍ତରାଇ ଗାଁରେ ପୂର୍ବ ଶତ୍ରୁତାକୁ କେନ୍ଦ୍ର କରି ଭରତ ଦଣ୍ଡସେନାଙ୍କୁ ଗୁଳି କରି ହତ୍ୟା କରାଯାଇଥିଲା। ଏହି ମାମଲାରେ କରୁଣାକର ମାଝୀଙ୍କୁ ପୁଲିସ ଗିରଫ କରି କୋର୍ଟଚାଲାଣ କରିଥିଲା।

ଲଗାତାର ଏଭଳି ଘଟଣା ସାମ୍ନାକୁ ଆସିବା ପରେ ସମ୍ବଲପୁରରେ ବେଆଇନ ଦେଶୀ ବନ୍ଧୁକ କେଉଁଠୁ ଆସୁଛି, କିଏ ଏହାର ଯୋଗାଣ କରୁଛି ଏବଂ ଏହା ପଛରେ କୌଣସି ବଡ଼ ଅସ୍ତ୍ର ଯୋଗାଣ ନେଟୱର୍କ ରହିଛି କି ନାହିଁ, ତାହା ନେଇ ପ୍ରଶ୍ନ ଉଠୁଛି।

ଅନ୍ୟପଟେ, ଅପରାଧ ଘଟିବା ପୂର୍ବରୁ ବେଆଇନ ବନ୍ଧୁକ ଚିହ୍ନଟ ଓ ଜବତ କରିବାରେ ପୁଲିସର ଗୁଇନ୍ଦା ବ୍ୟବସ୍ଥା କେତେ ପ୍ରଭାବଶାଳୀ, ସେନେଇ ମଧ୍ୟ ଆଲୋଚନା ଆରମ୍ଭ ହୋଇଛି। ବେଆଇନ ଅସ୍ତ୍ରଶସ୍ତ୍ର କାରବାର ରୋକିବା ଏବଂ ଅସ୍ତ୍ର ଯୋଗାଣକାରୀଙ୍କ ପାଖରେ ପହଞ୍ଚିବା ପାଇଁ ପୁଲିସ ପକ୍ଷରୁ ଅଧିକ ତଦନ୍ତ ଓ ସ୍ୱତନ୍ତ୍ର ଅଭିଯାନର ଆବଶ୍ୟକତା ନେଇ ପ୍ରଶ୍ନ ଉଠୁଛି।