ପେଟ୍ରୋଲ ଓ ଡିଜେଲ ଚାଳିତ ଯାନର ଯୁଗ ଶେଷ ଦିଗକୁ ଯାଉଛି ବୋଲି ସ୍ପଷ୍ଟ ସନ୍ଦେଶ ଦେଇଛନ୍ତି କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ନିତିନ ଗଡକରୀ। ବସ୍ୱର୍ଲ୍ଡ ଇଣ୍ଡିଆ କନ୍କ୍ଲେଭରେ ଯୋଗଦେଇ ସେ କହିଛନ୍ତି ଯେ ଭବିଷ୍ୟତ ସ୍ୱଚ୍ଛ ଓ ପରିବେଶବନ୍ଧବ ଇନ୍ଧନର।

ବୃଦ୍ଧିଶୀଳ ଇନ୍ଧନ ଆମଦାନୀ ଓ ପରିବେଶ ପ୍ରଦୂଷଣ ଦେଶ ପାଇଁ ବଡ଼ ଚ୍ୟାଲେଞ୍ଜ ହୋଇଥିବାରୁ ପାରମ୍ପରିକ ଫସିଲ ଫ୍ୟୁଏଲ ଉପରେ ନିର୍ଭରତା କମାଇବାକୁ ଗଡକରୀ ଜୋର ଦେଇଛନ୍ତି। ସେ କହିଛନ୍ତି, ଅଟୋମୋବାଇଲ ନିର୍ମାତାମାନେ ବାୟୋଫ୍ୟୁଏଲ, CNG, LNG, ଇଲେକ୍ଟ୍ରିକ ଭେହିକଲ ଓ ହାଇଡ୍ରୋଜେନ ଭିତ୍ତିକ ଯାନ ଉନ୍ନୟନକୁ ଦ୍ରୁତ କରିବା ଆବଶ୍ୟକ।

ହାଇଡ୍ରୋଜେନକୁ “ଭବିଷ୍ୟତର ଇନ୍ଧନ” ବୋଲି ବର୍ଣ୍ଣନା କରି ଗଡକରୀ କହିଛନ୍ତି, ଦେଶର ବିଭିନ୍ନ ରୁଟରେ ହାଇଡ୍ରୋଜେନ ଟ୍ରକ୍ ଓ ବସ୍ ପରୀକ୍ଷାମୂଳକ ଭାବେ ଚାଲୁଛି। ଟାଟା ମୋଟର୍ସ, ଭଲ୍ଭୋ, ଅଶୋକ ଲେଲାଣ୍ଡ ଓ ମହିନ୍ଦ୍ରା ଭଳି ଅଗ୍ରଣୀ କମ୍ପାନୀ ଏହି ପରୀକ୍ଷଣରେ ଯୁକ୍ତ ଅଛନ୍ତି।

ସେ ଏଥାନଲ ମିଶ୍ରିତ ଇନ୍ଧନ ବ୍ୟବହାରକୁ ମଧ୍ୟ ଗୁରୁତ୍ୱ ଦେଇ E20 ଫ୍ୟୁଏଲ ଉପରେ ଚାଲୁଥିବା ଫ୍ଲେକ୍ସ-ଫ୍ୟୁଏଲ ଇଞ୍ଜିନ ଉନ୍ନୟନ ଚାଲିଥିବା କଥା କହିଛନ୍ତି।

ଗଡକରୀ ଉତ୍ପାଦକମାନଙ୍କୁ ସୁରକ୍ଷା, ଗୁଣବତ୍ତା ଓ ଯାତ୍ରୀ ସୁବିଧାକୁ ପ୍ରାଥମିକତା ଦେବାକୁ କହିଛନ୍ତି। ଆଗାମୀ ତିନି ବର୍ଷରେ ୧.୫ ଲକ୍ଷ ଇଲେକ୍ଟ୍ରିକ ବସ୍ର ଚାହିଦା ରହିବ ବୋଲି ସେ ଆଶା ପ୍ରକାଶ କରିଥିବାବେଳେ ବର୍ତ୍ତମାନ ବାର୍ଷିକ ଉତ୍ପାଦନ କ୍ଷମତା ୭୦ ହଜାର ପାଖାପାଖି ରହିଛି ବୋଲି ଉଲ୍ଲେଖ କରିଛନ୍ତି।

ଭାରତର ସ୍ୱଚ୍ଛ ଶକ୍ତି ଓ ଗ୍ରୀନ୍ ମୋବିଲିଟି ଲକ୍ଷ୍ୟ ପୂରଣ ପାଇଁ ଏହି ପରିବର୍ତ୍ତନ ଦୂରଗାମୀ ପ୍ରଭାବ ପକାଇବ ବୋଲି ମନେ କରାଯାଉଛି।