ପାକିସ୍ତାନ ଅଧିକୃତ କାଶ୍ମୀର (POK)ରେ ବଢ଼ୁଥିବା ଜନଅସନ୍ତୋଷ ଓ ହିଂସା ଘଟଣା ମଧ୍ୟରେ ପାକିସ୍ତାନ ପୁଣିଥରେ କାଶ୍ମୀର ପ୍ରସଙ୍ଗକୁ ଅନ୍ତର୍ଜାତୀୟ ସ୍ତରରେ ଉଠାଇବାକୁ ଉଦ୍ୟମ କରିଛି। ପାକିସ୍ତାନ ସରକାର ମିଳିତ ଜାତିସଂଘ (UN) ଏବଂ ଆନ୍ତର୍ଜାତୀୟ ସମୁଦାୟର ସମର୍ଥନ ଲୋଡ଼ିଥିବା ଜଣାପଡ଼ିଛି।

ମିଳିତ ଜାତିସଂଘ ସୁରକ୍ଷା ପରିଷଦ ସମ୍ବନ୍ଧୀୟ ସୂଚନା ଅନୁଯାୟୀ, କାଶ୍ମୀର ବିବାଦର ସମାଧାନ ପାଇଁ ପାକିସ୍ତାନ ବିଶ୍ୱ ସମୁଦାୟର ହସ୍ତକ୍ଷେପ ଚାହୁଁଛି। ଏହି ପଦକ୍ଷେପକୁ POKରେ ବଢ଼ୁଥିବା ଅସନ୍ତୋଷରୁ ନଜର ହଟାଇବାର ଉଦ୍ୟମ ବୋଲି ବିଶ୍ଳେଷକମାନେ ମତ ପ୍ରକାଶ କରୁଛନ୍ତି।

ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ଶରିଫ ଏବଂ ରାଷ୍ଟ୍ରପତି ଆସିଫ ଅଲି ଜରଦାରୀ ଭିନ୍ନ ଭିନ୍ନ ବିବୃତ୍ତିରେ କାଶ୍ମୀର ପ୍ରସଙ୍ଗରେ ଭାରତ ବିରୋଧରେ ବୟାନ ଦେଇଛନ୍ତି। ସେମାନେ କହିଛନ୍ତି ଯେ, କାଶ୍ମୀର ବିବାଦର ସମାଧାନ ପାଇଁ ଜାତିସଂଘର ପ୍ରସ୍ତାବ ଅନୁଯାୟୀ ପଦକ୍ଷେପ ଗ୍ରହଣ କରାଯିବା ଆବଶ୍ୟକ।

ରାଷ୍ଟ୍ରପତି ଆସିଫ ଅଲି ଜରଦାରୀ କହିଛନ୍ତି ଯେ, ପାକିସ୍ତାନ ସଦା ଶାନ୍ତିପୂର୍ଣ୍ଣ ସମାଧାନକୁ ସମର୍ଥନ କରିଆସିଛି ଏବଂ କାଶ୍ମୀର ଜନତାଙ୍କ ଆକାଂକ୍ଷାକୁ ସମ୍ମାନ ଦେବା ଉଚିତ। ସେ ଏହି ପ୍ରସଙ୍ଗରେ ଜାତିସଂଘ ଓ ଆନ୍ତର୍ଜାତୀୟ ସମୁଦାୟକୁ ସକ୍ରିୟ ଭୂମିକା ନେବାକୁ ଆହ୍ୱାନ କରିଛନ୍ତି।

ସେହିପରି ପ୍ରଧାନମନ୍ତ୍ରୀ ଶେହବାଜ ଶରିଫ କହିଛନ୍ତି ଯେ, ଦକ୍ଷିଣ ଏସିଆରେ ସ୍ଥାୟୀ ଶାନ୍ତି ପ୍ରତିଷ୍ଠା ପାଇଁ କାଶ୍ମୀର ପ୍ରସଙ୍ଗର ସମାଧାନ ଆବଶ୍ୟକ। ସେ ପାକିସ୍ତାନ କାଶ୍ମୀରବାସୀଙ୍କ ଆତ୍ମନିର୍ଣ୍ଣୟ ଅଧିକାର ପ୍ରତି ଅଟଳ ଥିବା ଦାବି କରିଛନ୍ତି।