ବାଲେଶ୍ୱର: ୫ ଶିଶୁ ଓରାଙ୍ଗଉଟାନ୍‌ ଓଡ଼ିଶାକୁ କିପରି ଆସିଲେ, ସେନେଇ ଚାଲିଥିବା ରହସ୍ୟ ଏବେ ଆହୁରି ଘନୀଭୂତ ହୋଇଛି। ଘଟଣାର ତଦନ୍ତ କରୁଥିବା ସ୍ପେଶାଲ ଟାସ୍କ ଫୋର୍ସ (STF) ହାତରେ ନୂଆ CCTV ଫୁଟେଜ୍‌ ଲାଗିଛି। ଏହି ଫୁଟେଜ୍‌ରେ ଦୀଘାର ଏକ ହୋଟେଲ ନିକଟରେ ଏକ କଳା SUV ଦେଖାଯାଇଥିବାରୁ ତାହା ଏବେ STFର ସ୍କାନରରେ ରହିଛି।

CCTV ଫୁଟେଜ୍‌ ଅନୁସାରେ, ଏକ କଳା SUV ହୋଟେଲ ସମ୍ମୁଖରେ ଅଟକିଥିବା ଦେଖାଯାଇଛି। ଗାଡ଼ିରୁ କିଛି ଲୋକ ବାହାରି ପରସ୍ପର ମଧ୍ୟରେ କଥାବାର୍ତ୍ତା କରୁଥିବା ମଧ୍ୟ ଦେଖାଯାଇଛି। ତେବେ ସେହି ସମୟରେ ହୋଟେଲଟି ବନ୍ଦ ଥିବା ଜଣାପଡ଼ିଛି। ଏହାକୁ ନେଇ ସେଠାରେ ଲୋକଙ୍କ ଉପସ୍ଥିତି ଓ ଗାଡ଼ିର ଗତିବିଧିକୁ ନେଇ ତଦନ୍ତକାରୀଙ୍କ ସନ୍ଦେହ ବଢ଼ିଛି।

ହୋଟେଲ ମାଲିକ ଓ ପୁଅଙ୍କୁ ଖୋଜୁଛି STF

ଏହି ଘଟଣାରେ ଦୀଘାର ସମ୍ପୃକ୍ତ ହୋଟେଲ ମାଲିକ ଓ ତାଙ୍କ ପୁଅଙ୍କୁ STF ଖୋଜୁଥିବା ଜଣାପଡ଼ିଛି। ଉଭୟେ ଫେରାର ଥିବା ସୂଚନା ମିଳିଛି। ହୋଟେଲ ମାଲିକଙ୍କ ଫୋନ୍‌ ମଧ୍ୟ ସୁଇଚ୍‌ ଅଫ୍‌ ଥିବା କୁହାଯାଉଛି। ଅନ୍ୟପଟେ ହୋଟେଲ ମ୍ୟାନେଜରଙ୍କ ସମେତ ଆଉ ୩ ଜଣଙ୍କୁ STF ପଚରାଉଚରା କରୁଛି।

୩୯ ମିନିଟ୍‌ର CCTV ଲିଙ୍କ୍‌ ଖୋଜୁଛି STF

ତଦନ୍ତରେ ଆଉ ଏକ ଗୁରୁତ୍ୱପୂର୍ଣ୍ଣ CCTV ଫୁଟେଜ୍‌ ସାମ୍ନାକୁ ଆସିଛି। ରାତି ପ୍ରାୟ ୧୦ଟା ୫୬ ମିନିଟ୍‌ରେ ଦୀଘାର ଏକ ହୋଟେଲ ନିକଟ ଦେଇ ଏକ କଳା SUV ଯାଉଥିବା ଦେଖାଯାଇଛି। ପୂର୍ବରୁ ବିଚିତ୍ରପୁର ନିକଟରେ ମଧ୍ୟ ସମାନ ଧରଣର ଏକ କଳା SUVର ଫୁଟେଜ୍‌ ମିଳିଥିଲା।

ବିଚିତ୍ରପୁରର CCTVରେ ଗାଡ଼ିଟି ରାତି ପ୍ରାୟ ୧୧ଟା ୩୫ ମିନିଟ୍‌ରେ ଦେଖାଯାଇଥିଲା। ଅର୍ଥାତ୍ ଦୁଇଟି ଫୁଟେଜ୍‌ ମଧ୍ୟରେ ପ୍ରାୟ ୩୯ ମିନିଟ୍‌ର ବ୍ୟବଧାନ ରହିଛି। ଏହି ଦୁଇଟି ଗାଡ଼ି ସମାନ କି ନୁହେଁ ଏବଂ ସେହି ସମୟ ମଧ୍ୟରେ SUV କେଉଁ ରାସ୍ତା ଦେଇ ଯାଇଥିଲା, ତାହା ଖୋଜୁଛି STF।

୧୦୦ରୁ ଅଧିକ CCTV ଯାଞ୍ଚ

ତଦନ୍ତକାରୀମାନେ ଦୀଘା ଓ ଏହାର ଆଖପାଖ ଅଞ୍ଚଳର ହୋଟେଲ ଏବଂ ଗୁରୁତ୍ୱପୂର୍ଣ୍ଣ ସ୍ଥାନରେ ଲାଗିଥିବା ୧୦୦ରୁ ଅଧିକ CCTV କ୍ୟାମେରାର ଫୁଟେଜ୍‌ ଯାଞ୍ଚ କରିଛନ୍ତି। ଏହି ଯାଞ୍ଚ ସମୟରେ କିଛି ସନ୍ଦେହଜନକ ଗତିବିଧି ସମ୍ପର୍କରେ ତଥ୍ୟ ମିଳିଥିବା କୁହାଯାଉଛି।

ଏବେ STFର ମୁଖ୍ୟ ପ୍ରଶ୍ନ ହେଉଛି—କଳା SUVରେ କିଏ ଥିଲେ, ଗାଡ଼ିଟି କେଉଁଠାରୁ ଆସିଥିଲା, ୩୯ ମିନିଟ୍‌ ମଧ୍ୟରେ କେଉଁଠି ଅଟକିଥିଲା ଏବଂ ଏହାର ଓରାଙ୍ଗଉଟାନ୍‌ ଚୋରାଚାଲାଣ ସହ କୌଣସି ସମ୍ପର୍କ ଅଛି କି? ଏହି ସବୁ ଦିଗରୁ ତଦନ୍ତ ଜାରି ରହିଛି।