ଜୁଲାଇ ୧ରୁ ୧୭ ତାରିଖ ମଧ୍ୟରେ ଓଡ଼ିଶାରେ ସ୍ୱାଭାବିକଠାରୁ ୧୭ ପ୍ରତିଶତ ଅଧିକ ବର୍ଷା ରେକର୍ଡ ହୋଇଛି। ରାଜ୍ୟର ବିଭିନ୍ନ ଅଞ୍ଚଳରେ ପ୍ରବଳ ବର୍ଷା ଯୋଗୁ ସ୍ଥାନୀୟ ବନ୍ୟା ପରିସ୍ଥିତି ସୃଷ୍ଟି ହୋଇଥିବାବେଳେ ଜଳ ସମ୍ପଦ ବିଭାଗ ପକ୍ଷରୁ ନଦୀ ଓ ଜଳଭଣ୍ଡାରର ଜଳସ୍ତର ଉପରେ କଡ଼ା ନଜର ରଖାଯାଇଛି।

ଜଳ ସମ୍ପଦ ବିଭାଗର ମୁଖ୍ୟ ଯନ୍ତ୍ରୀ ଦିଲ୍ଲୀପ କୁମାର ରାଉତଙ୍କ ସୂଚନା ଅନୁଯାୟୀ, ଜୁଲାଇ ୧୭ ସୁଦ୍ଧା ରାଜ୍ୟରେ ସ୍ୱାଭାବିକ ଭାବେ ୩୯୧ ମିଲିମିଟର ବର୍ଷା ହେବା କଥା ଥିବାବେଳେ ବାସ୍ତବରେ ୪୧୬ ମିଲିମିଟର ବର୍ଷା ରେକର୍ଡ ହୋଇଛି। ଯାହା ସ୍ୱାଭାବିକଠାରୁ ୧୭ ପ୍ରତିଶତ ଅଧିକ।

ବଲାଙ୍ଗୀର ଜିଲ୍ଲାରେ ସର୍ବାଧିକ ବର୍ଷା ରେକର୍ଡ ହୋଇଛି। ବଙ୍ଗୋମୁଣ୍ଡା ଅଞ୍ଚଳରେ ୧୩୨ ମିଲିମିଟର ବର୍ଷା ହୋଇଥିବାବେଳେ ସପୁଆ ନଦୀର ଜଳସ୍ତର ୫୦ ବର୍ଷର ରେକର୍ଡ ଭାଙ୍ଗିଛି। ଏହା ଯୋଗୁ ମଧୁସୂଦନପାଟଣା ଓ କାକୁଡ଼ିଆ ଗ୍ରାମରେ ପାଣି ପଶିଥିଲା। ତେବେ ଶୁକ୍ରବାର ସକାଳଠାରୁ ଜଳସ୍ତର କମିବା ଆରମ୍ଭ କରିଛି। ଆଗାମୀ ଦିନରେ ପୁଣି ବର୍ଷା ହେଲେ ପରିସ୍ଥିତି ଜଟିଳ ହୋଇପାରେ ବୋଲି ପ୍ରଶାସନ ଚେତାବନୀ ଦେଇଛି।

ବାଲେଶ୍ୱର ଜିଲ୍ଲାର ମଥାନୀଠାରେ ଜଳସ୍ତର ୬.୫ ମିଟରରେ ପହଞ୍ଚିଛି, ଯାହା ବିପଦ ସଙ୍କେତର ନିକଟବର୍ତ୍ତୀ। ସମୁଦ୍ରରେ ଜୁଆର କମିବା ପରେ ପାଣି ନିଷ୍କାସନ ସ୍ୱାଭାବିକ ହେବ ବୋଲି ଅଧିକାରୀମାନେ ଆଶା ପ୍ରକାଶ କରିଛନ୍ତି। ମହାନଦୀ, ବ୍ରାହ୍ମଣୀ ଓ ବୈତରଣୀ ନଦୀରେ ବର୍ତ୍ତମାନ କୌଣସି ବଡ଼ ବନ୍ୟା ବିପଦ ନଥିବାବେଳେ ଜଳକା ନଦୀରେ କିଛି ପ୍ରଭାବ ପଡ଼ିଛି।

ହୀରାକୁଦ ଜଳଭଣ୍ଡାରର ବର୍ତ୍ତମାନ ଜଳସ୍ତର ୬୦୯.୭୫ ଫୁଟ୍ ରହିଛି। ବର୍ତ୍ତମାନ ସମସ୍ତ ଗେଟ୍ ବନ୍ଦ ରହିଥିବାବେଳେ ଜଳସ୍ତର ଆହୁରି ବଢ଼ିବାର ସମ୍ଭାବନା ରହିଛି। ଆବଶ୍ୟକ ପଡ଼ିଲେ ଜଳ ନିଷ୍କାସନ ପାଇଁ ଗେଟ୍ ଖୋଲାଯାଇପାରେ। ଜଳଭଣ୍ଡାରର ଜଳ ପରିଚାଳନା ପାଇଁ ଗଠିତ କମିଟି ଖୁବଶୀଘ୍ର ବୈଠକ କରି ଜୁଲାଇ ଓ ଅଗଷ୍ଟ ମାସ ପାଇଁ ଉପଯୁକ୍ତ ଜଳସ୍ତର ନିର୍ଦ୍ଧାରଣ କରିବ।