ଓଡ଼ିଶାରେ ଆଜି ୧୨ ଘଣ୍ଟିଆ ବନ୍ଦ ପାଳନ ହେଉଛି। INDIA ବ୍ଲକ୍‌ ପକ୍ଷରୁ ଦିଆଯାଇଥିବା ଏହି ବନ୍ଦ ଡାକରା ସକାଳ ୬ଟାରୁ ଆରମ୍ଭ ହୋଇ ସନ୍ଧ୍ୟା ୬ଟା ପର୍ଯ୍ୟନ୍ତ ଚାଲିବ। ବନ୍ଦର ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ସାଧାରଣ ଜୀବନ ପ୍ରଭାବିତ ହୋଇଛି।

ବିରୋଧୀ ଦଳଗୁଡ଼ିକ ପକ୍ଷରୁ MMDR Amendment Act, 2026 ପ୍ରତ୍ୟାହାର, ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା, ସ୍କୁଲ୍‌ ପାଠ୍ୟପୁସ୍ତକରେ ତ୍ରୁଟିକୁ ନେଇ ଓଡ଼ିଶାର ସ୍କୁଲ୍‌ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଏବଂ ବନ୍ୟା ପ୍ରଭାବିତ ପରିବାରଙ୍କୁ ତୁରନ୍ତ ରିଲିଫ୍‌ ଓ କ୍ଷତିପୂରଣ ଦାବି କରାଯାଇଛି।

​​​​​​​ଆହୁରି ପଢନ୍ତୁ: ବରିଷ୍ଠ ଅଭିନେତା ନାନା ପାଟେକରଙ୍କ ପରଲୋକ, ୭୫ ବର୍ଷ ବୟସରେ ଚାଲିଗଲେ ଅଭିନେତା

ବନ୍ଦର ସବୁଠାରୁ ଅଧିକ ପ୍ରଭାବ ପରିବହନ ବ୍ୟବସ୍ଥା ଉପରେ ପଡ଼ିଛି। ଅଟୋ ଚାଳକ ସଂଘ ବନ୍ଦକୁ ସମର୍ଥନ କରିଥିବାରୁ ଅଟୋ ଚଳାଚଳ ବନ୍ଦ ରହିଛି। ଘରୋଇ ବସ୍‌ ମାଲିକ ସଂଘ ବନ୍ଦକୁ ସମର୍ଥନ କରିନଥିଲେ ମଧ୍ୟ ବିଭିନ୍ନ ସ୍ଥାନରେ ବିକ୍ଷୋଭ ଓ ରାସ୍ତା ଅବରୋଧ ଯୋଗୁଁ ବସ୍‌ ସେବା ପ୍ରଭାବିତ ହୋଇଛି।

ହସ୍ପିଟାଲ, ଆମ୍ବୁଲାନ୍ସ, ଅଗ୍ନିଶମ ଓ ଉଦ୍ଧାର ସେବା, ଔଷଧ ଦୋକାନ, କ୍ଷୀର ଯୋଗାଣ, ପରୀକ୍ଷା ଏବଂ ଗଣମାଧ୍ୟମ ସେବାକୁ ବନ୍ଦରୁ ବାଦ ଦିଆଯାଇଛି।

ବନ୍ଦକୁ ଦୃଷ୍ଟିରେ ରଖି ରାଜ୍ୟର ବିଭିନ୍ନ ସ୍ଥାନରେ ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ପ୍ରତିବାଦ, ପିକେଟିଂ ଓ ରାସ୍ତା ଅବରୋଧ ଭଳି କାର୍ଯ୍ୟକ୍ରମ ହେବାର ଆଶଙ୍କା ଥିବାରୁ ଜିଲ୍ଲା ପ୍ରଶାସନକୁ ସତର୍କ ରହିବାକୁ କୁହାଯାଇଛି।