ଖରିଫ ଋତୁରେ ୭୮ ଲକ୍ଷ ମେଟ୍ରିକ୍ ଟନ୍ ଧାନ କିଣିବେ ସରକାର

ଭୁବନେଶ୍ୱର: ରାଜ୍ୟର ଧାନ ଚାଷୀଙ୍କ ପାଇଁ ବଡ଼ ଖବର। ଖରିଫ ବିପଣନ ଋତୁ ୨୦୨୬-୨୭ ପାଇଁ ଓଡ଼ିଶା ସରକାର ୭୮ ଲକ୍ଷ ମେଟ୍ରିକ୍ ଟନ୍ ଧାନ କିଣିବାକୁ ଲକ୍ଷ୍ୟ ରଖିଛନ୍ତି। ଏନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ ବୈଠକରେ ଖରିଫ ଋତୁ ପାଇଁ ଖାଦ୍ୟ ଓ ଧାନ କ୍ରୟ ନୀତିକୁ ଅନୁମୋଦନ ମିଳିଛି।

ଏହି ନୀତି ଅନୁସାରେ ୭୮ ଲକ୍ଷ ମେଟ୍ରିକ୍ ଟନ୍ ଧାନରୁ ପ୍ରାୟ ୫୩ ଲକ୍ଷ ମେଟ୍ରିକ୍ ଟନ୍ ଚାଉଳ ମିଳିବାର ଲକ୍ଷ୍ୟ ରହିଛି। ଚାଷୀଙ୍କଠାରୁ ଧାନ କିଣିବା ପ୍ରକ୍ରିୟାକୁ ଅଧିକ ସ୍ୱଚ୍ଛ, ସରଳ ଓ ପ୍ରଯୁକ୍ତିଭିତ୍ତିକ କରିବା ସହ ଠିକ୍ ସମୟରେ ଟଙ୍କା ପ୍ରଦାନ ଉପରେ ସରକାର ଗୁରୁତ୍ୱ ଦେଇଛନ୍ତି।

କ୍ୱିଣ୍ଟାଲ ପିଛା ମିଳିବ ୩୧୦୦ ଟଙ୍କା

ନୂଆ ଧାନ କ୍ରୟ ନୀତି ଅନୁସାରେ ଚାଷୀଙ୍କୁ କ୍ୱିଣ୍ଟାଲ ପିଛା ମୋଟ ୩,୧୦୦ ଟଙ୍କା ମିଳିବ। ଏହି ରାଶିରେ କେନ୍ଦ୍ର ସରକାରଙ୍କ ଧାର୍ଯ୍ୟ ସର୍ବନିମ୍ନ ସହାୟକ ମୂଲ୍ୟ (MSP) ସହ ରାଜ୍ୟ ସରକାରଙ୍କ ଇନ୍‌ପୁଟ୍ ସହାୟତା ଅନ୍ତର୍ଭୁକ୍ତ ରହିଛି।

ଧାନ ବିକ୍ରି ପରେ ଚାଷୀଙ୍କୁ ଟଙ୍କା ପାଇବା ପାଇଁ ଦୀର୍ଘ ସମୟ ଅପେକ୍ଷା କରିବାକୁ ପଡ଼ିବ ନାହିଁ। ଧାନ କିଣାଯିବାର ୨୪ରୁ ୪୮ ଘଣ୍ଟା ମଧ୍ୟରେ NPCI ବ୍ୟବସ୍ଥା ମାଧ୍ୟମରେ ଚାଷୀଙ୍କ ଆଧାର ସଂଯୁକ୍ତ ବ୍ୟାଙ୍କ୍ ଖାତାକୁ ସିଧାସଳଖ ଟଙ୍କା ପଠାଯିବ।

ନଭେମ୍ବର ୧ରୁ ଆରମ୍ଭ ହୋଇ ମାର୍ଚ୍ଚ ୩୧ ଯାଏଁ ଚାଲିବ ଧାନ କିଣା

ସରକାରଙ୍କ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ, ୨୦୨୬ ନଭେମ୍ବର ୧ରୁ ୨୦୨୭ ମାର୍ଚ୍ଚ ୩୧ ପର୍ଯ୍ୟନ୍ତ ଖରିଫ ଧାନ କ୍ରୟ ଚାଲିବ। ପ୍ରାଥମିକ କୃଷି ସମବାୟ ସମିତି (PACS), ଲାର୍ଜ ଏରିଆ ମଲ୍ଟିପର୍ପୋଜ୍ କୋଅପରେଟିଭ୍ ସୋସାଇଟି (LAMPCS) ଏବଂ ପାଣି ପଞ୍ଚାୟତ ମାଧ୍ୟମରେ ଧାନ କ୍ରୟ କେନ୍ଦ୍ର ପରିଚାଳନା କରାଯିବ।

ଚାଷୀମାନଙ୍କୁ ଧାନ ବିକ୍ରିର ତାରିଖ ଓ କେତେ ପରିମାଣର ଧାନ କିଣାଯିବ, ସେନେଇ ଓଡ଼ିଆ ଭାଷାରେ ଆଗୁଆ SMS ପଠାଯିବ। ଏହାଦ୍ୱାରା ମଣ୍ଡିରେ ଅଯଥା ଅପେକ୍ଷା ଓ ଅସୁବିଧା କମିବା ଆଶା କରାଯାଉଛି।

ଉପଗ୍ରହ ଚିତ୍ର ଓ ଡିଜିଟାଲ୍ ସର୍ଭେରେ ଯାଞ୍ଚ ହେବ ଜମି

ଧାନ କିଣା ପ୍ରକ୍ରିୟାରେ ଅନିୟମିତତା ରୋକିବା ପାଇଁ ସରକାର ନୂଆ ପ୍ରଯୁକ୍ତି ବ୍ୟବହାର କରିବେ। Paddy Procurement Automation System (P-PAS) ସହ ଆଧାର e-KYC, ଭୂଲେଖ ଜମି ରେକର୍ଡ ଏବଂ National Payments Corporation of India (NPCI) ବ୍ୟବସ୍ଥାକୁ ଯୋଡ଼ାଯିବ।

ଏହାସହ ଧାନ ଚାଷ ହୋଇଥିବା ଜମିର ୧୦୦ ପ୍ରତିଶତ କ୍ଷେତ୍ରସ୍ତରୀୟ ଯାଞ୍ଚ କରାଯିବ। ଉପଗ୍ରହ ଚିତ୍ର ଓ ଡିଜିଟାଲ୍ କ୍ରପ୍ ସର୍ଭେ (DCS) ତଥ୍ୟ ମାଧ୍ୟମରେ ଚାଷୀଙ୍କ ପଞ୍ଜୀକୃତ ଜମିରେ ପ୍ରକୃତରେ ଧାନ ଚାଷ ହୋଇଛି କି ନାହିଁ, ତାହା ଯାଞ୍ଚ କରାଯିବ। ଏହାଦ୍ୱାରା ଭୁଲ୍ ତଥ୍ୟ ଦେଇ ଧାନ ବିକ୍ରି କରିବା ଭଳି ଅନିୟମିତତା ରୋକିବାକୁ ଲକ୍ଷ୍ୟ ରଖାଯାଇଛି।

ଭାଗଚାଷୀଙ୍କୁ ମଧ୍ୟ ମିଳିବ ଧାନ ବିକ୍ରିର ସୁଯୋଗ

ନୂଆ ନୀତିରେ ଯୋଗ୍ୟ ଭାଗଚାଷୀଙ୍କୁ ମଧ୍ୟ ଧାନ ବିକ୍ରି ପ୍ରକ୍ରିୟାରେ ସାମିଲ କରିବାର ବ୍ୟବସ୍ଥା ରହିଛି। ଜମି ମାଲିକଙ୍କ ସହମତି ଓ ଡିଜିଟାଲ୍ ଅନୁମତି ମାଧ୍ୟମରେ ଭାଗଚାଷୀଙ୍କ ପଞ୍ଜୀକରଣ ଓ ଧାନ କ୍ରୟ କରାଯାଇପାରିବ।

ଏଥିପାଇଁ ବାୟୋମେଟ୍ରିକ୍ କିମ୍ବା ମୋବାଇଲ୍ ଆଧାରିତ ପ୍ରମାଣୀକରଣ ବ୍ୟବସ୍ଥା ରହିବ। ଏହାଦ୍ୱାରା ପ୍ରକୃତରେ ଚାଷ କରୁଥିବା ଯୋଗ୍ୟ ଭାଗଚାଷୀମାନେ ମଧ୍ୟ ସରକାରୀ ଧାନ କ୍ରୟ ବ୍ୟବସ୍ଥାର ସୁବିଧା ପାଇପାରିବେ।

ମଣ୍ଡିରେ AI ମେସିନ୍ ଓ CCTV ନଜରଦାରି

ଧାନର ଗୁଣବତ୍ତା ଯାଞ୍ଚ ଓ ମଣ୍ଡିରେ ସ୍ୱଚ୍ଛତା ରକ୍ଷା ପାଇଁ ମଧ୍ୟ ନୂଆ ବ୍ୟବସ୍ଥା କରାଯାଇଛି। FAQ (Fair Average Quality) ମାନଦଣ୍ଡ ଅନୁସାରେ ଧାନର ଗୁଣବତ୍ତା ପରୀକ୍ଷା କରାଯିବ। ୫,୦୦୦ ମେଟ୍ରିକ୍ ଟନ୍‌ରୁ ଅଧିକ ଧାନ କିଣୁଥିବା କେନ୍ଦ୍ରଗୁଡ଼ିକରେ AI ଆଧାରିତ ଧାନ ବିଶ୍ଳେଷଣ ଯନ୍ତ୍ର ଲଗାଯିବ।

ଏହାସହ ମଣ୍ଡିରେ CCTV କ୍ୟାମେରା ଓ ଲାଇଭ୍ ମନିଟରିଂ ବ୍ୟବସ୍ଥା ରହିବ। ଧାନ ମିଲ୍‌କୁ ପଠାଇବା ଓ ପରିବହନ ବ୍ୟବସ୍ଥାକୁ ସୁଗମ କରିବା ପାଇଁ ମିଲ୍ ଟ୍ୟାଗିଂ ଏବଂ ରୁଟ୍ ଅପ୍ଟିମାଇଜେସନ୍ ମଧ୍ୟ କରାଯିବ।

ଅଭିଯୋଗ ପାଇଁ ଟୋଲ୍‌ ଫ୍ରି ନମ୍ବର ୧୯୬୭

ଧାନ ବିକ୍ରି ସମୟରେ ଚାଷୀମାନେ କୌଣସି ସମସ୍ୟାର ସମ୍ମୁଖୀନ ହେଲେ ଅଭିଯୋଗ ଜଣାଇବା ପାଇଁ ଜିଲ୍ଲାସ୍ତରରେ କଣ୍ଟ୍ରୋଲ୍ ରୁମ୍ ଖୋଲାଯିବ। ଏହାସହ ୧୯୬୭ ଟୋଲ୍‌ ଫ୍ରି ହେଲ୍ପଲାଇନ୍ ନମ୍ବର ମଧ୍ୟ ଉପଲବ୍ଧ ରହିବ।

ଅନ୍ୟ ରାଜ୍ୟରୁ ଅନଧିକୃତ ଭାବେ ଧାନ ଓଡ଼ିଶାକୁ ଆସିବା ରୋକିବା ପାଇଁ ସୀମାନ୍ତ ଯାଞ୍ଚ ଓ CCTV ନଜରଦାରିକୁ ମଧ୍ୟ କଡ଼ାକଡ଼ି କରାଯିବ। ସରକାରଙ୍କ ଲକ୍ଷ୍ୟ ହେଉଛି ପ୍ରକୃତ ଚାଷୀଙ୍କଠାରୁ ଧାନ କିଣିବା ସହ ରାଜ୍ୟରେ ଚାଉଳ ଯୋଗାଣକୁ ସୁନିଶ୍ଚିତ କରିବା।