ନୂଆଦିଲ୍ଲୀ: ICSE ଓ ISC ବୋର୍ଡ ପରୀକ୍ଷା ଦେବାକୁ ଥିବା ଛାତ୍ରଛାତ୍ରୀଙ୍କ ପାଇଁ ବଡ଼ ଖବର। ୨୦୨୭ ଶିକ୍ଷାବର୍ଷର ଦଶମ ଓ ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷାର ତାରିଖ ଘୋଷଣା କରିଛି CISCE। ନୂଆ କାର୍ଯ୍ୟସୂଚୀ ଅନୁସାରେ, ICSE ଦଶମ ପରୀକ୍ଷା ଫେବୃଆରୀ ୧୫ରୁ ଆରମ୍ଭ ହେବ। ଅନ୍ୟପଟେ ISC ଦ୍ୱାଦଶ ପରୀକ୍ଷା ଫେବୃଆରୀ ୯ରୁ ଆରମ୍ଭ ହେବ।

ବୋର୍ଡ ପକ୍ଷରୁ ଜାରି ହୋଇଥିବା ସୂଚୀ ଅନୁସାରେ, ଦଶମ ପରୀକ୍ଷା ମାର୍ଚ୍ଚ ୩୧ରେ ଶେଷ ହେବ। ଦ୍ୱାଦଶ ପରୀକ୍ଷା ଏପ୍ରିଲ୍ ୮ରେ ଶେଷ ହେବ। ଛାତ୍ରଛାତ୍ରୀମାନେ CISCEର ଅଫିସିଆଲ୍ ୱେବସାଇଟ୍ରୁ ବିଷୟଭିତ୍ତିକ ପରୀକ୍ଷା ତାରିଖ ଓ ସମୟ ଜାଣିପାରିବେ।

ICSE ଦଶମ ପରୀକ୍ଷା ଫେବୃଆରୀ ୧୫ରୁ

CISCEର ସୂଚୀ ଅନୁସାରେ, ICSE ଦଶମ ଶ୍ରେଣୀର ପରୀକ୍ଷା ୧୫ ଫେବୃଆରୀ ୨୦୨୭ରୁ ଆରମ୍ଭ ହୋଇ ୩୧ ମାର୍ଚ୍ଚରେ ଶେଷ ହେବ। ଏହି ପରୀକ୍ଷାରେ ପ୍ରାୟ ୨.୭୦ ଲକ୍ଷ ଛାତ୍ରଛାତ୍ରୀ ୩,୧୦୬ଟି ଅନୁବନ୍ଧିତ ସ୍କୁଲ୍ରୁ ଅଂଶଗ୍ରହଣ କରିବେ। ମୋଟ ୭୬ଟି ବିଷୟରେ ପରୀକ୍ଷା ହେବାକୁ ଥିବା ବେଳେ ଦେଶ ଓ ବିଦେଶର ୨,୮୩୫ଟି କେନ୍ଦ୍ରରେ ପରୀକ୍ଷା ଆୟୋଜିତ ହେବ।

ISC ଦ୍ୱାଦଶ ପରୀକ୍ଷା ଫେବୃଆରୀ ୯ରୁ

ସେହିପରି ISC ଦ୍ୱାଦଶ ଶ୍ରେଣୀର ପରୀକ୍ଷା ୯ ଫେବୃଆରୀରୁ ଆରମ୍ଭ ହୋଇ ୮ ଏପ୍ରିଲ୍ ୨୦୨୭ରେ ଶେଷ ହେବ। ଏଥିରେ ୧,୬୫୧ଟି ସ୍କୁଲ୍ରୁ ୧,୧୦,୦୨୫ ଜଣ ଛାତ୍ରଛାତ୍ରୀ ୬୦ଟି ବିଷୟରେ ପରୀକ୍ଷା ଦେବେ। ଦେଶ ଓ ବିଦେଶର ୧,୪୭୭ଟି ପରୀକ୍ଷା କେନ୍ଦ୍ରରେ ଏହି ପରୀକ୍ଷା ହେବ।

ଏଥର ପରୀକ୍ଷା ସମୟରେ ପରିବର୍ତ୍ତନ

୨୦୨୭ ICSE ପରୀକ୍ଷାରେ ସମୟ ସମ୍ପର୍କିତ ଏକ ପରିବର୍ତ୍ତନ ହୋଇଛି। ନୂଆ ନିୟମ ଅନୁସାରେ, ପରୀକ୍ଷାର୍ଥୀଙ୍କ ପାଇଁ ପ୍ରଶ୍ନପତ୍ର ପଢ଼ିବା ସମୟ ସକାଳ ୧୦ଟାରୁ ଆରମ୍ଭ ହେବ ଏବଂ ଲେଖିବା ସମୟ ୧୦ଟା ୧୫ରୁ ଆରମ୍ଭ ହେବ। ଛାତ୍ରଛାତ୍ରୀଙ୍କୁ ସକାଳ ୯ଟା ୪୫ ସୁଦ୍ଧା ପରୀକ୍ଷା ହଲ୍ରେ ବସିବାକୁ ପଡ଼ିବ। ତେଣୁ ପରୀକ୍ଷାର୍ଥୀମାନେ ନିଜ ଆଡମିଟ୍ କାର୍ଡ ଓ ଅଫିସିଆଲ୍ ନିର୍ଦ୍ଦେଶାବଳୀ ଭଲଭାବେ ଯାଞ୍ଚ କରିବା ଜରୁରୀ।

କେମିତି ଡାଉନଲୋଡ୍ କରିବେ ପରୀକ୍ଷା ସୂଚୀ?

ଛାତ୍ରଛାତ୍ରୀମାନେ ନିମ୍ନଲିଖିତ ପଦକ୍ଷେପ ଅନୁସରଣ କରି ୨୦୨୭ ପରୀକ୍ଷା ସୂଚୀ ଡାଉନଲୋଡ୍ କରିପାରିବେ:

1. CISCEର ଅଫିସିଆଲ୍ ୱେବସାଇଟ୍ www.cisce.org ଖୋଲନ୍ତୁ।

2. ୱେବସାଇଟ୍ରେ ଥିବା ‘Examination’ ବିଭାଗକୁ ଯାଆନ୍ତୁ।

3. ICSE 2027 କିମ୍ବା ISC 2027 ଟାଇମ୍ଟେବୁଲ୍ ଲିଙ୍କ୍ ଉପରେ କ୍ଲିକ୍ କରନ୍ତୁ।

4. ପରୀକ୍ଷା ସୂଚୀର PDF ଡାଉନଲୋଡ୍ କରି ବିଷୟଭିତ୍ତିକ ତାରିଖ, ସମୟ ଓ ନିର୍ଦ୍ଦେଶାବଳୀ ଯାଞ୍ଚ କରନ୍ତୁ।

ଏବେଠାରୁ ଛାତ୍ରଛାତ୍ରୀମାନେ ନିଜ ପରୀକ୍ଷା ତାରିଖ ଅନୁସାରେ ପଢ଼ା ଓ ପୁନରାବୃତ୍ତି ପାଇଁ ଯୋଜନା ପ୍ରସ୍ତୁତ କରିପାରିବେ। ବିଷୟ ଅନୁସାରେ ପଢ଼ା ସମୟ ବାଣ୍ଟିବା ସହ ମକ୍ ଟେଷ୍ଟ୍ ଓ ରିଭିଜନ୍ ଉପରେ ଗୁରୁତ୍ୱ ଦେବାକୁ ଶିକ୍ଷାବିତ୍ମାନେ ପରାମର୍ଶ ଦେଉଛନ୍ତି।