୦୦ ଦିନିଆ ଟିବି ମୁକ୍ତ ଭାରତ ଅଭିଯାନର ସଫଳତା ଓ ଆଗାମୀ ରଣନୀତି ନେଇ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣମନ୍ତ୍ରୀ ଜଗତ ପ୍ରକାଶ ନଡ୍ଡା ଓଡ଼ିଶା ଓ ଝାଡ଼ଖଣ୍ଡର ସାଂସଦମାନଙ୍କ ସହ ଆଲୋଚନା କରିଛନ୍ତି। ସଂସଦର ମୌସୁମୀ ଅଧିବେଶନ ଅବସରରେ ଏହି ଆଲୋଚନା ହୋଇଥିଲା।

୨୦୨୬ ମାର୍ଚ୍ଚ ୨୪ରୁ ଆରମ୍ଭ ହୋଇଥିବା ଅଭିଯାନର ଦ୍ୱିତୀୟ ପର୍ଯ୍ୟାୟରେ ଦେଶର ପ୍ରାୟ ୧.୫୮ ଲକ୍ଷ ଉଚ୍ଚ ବିପଦପ୍ରବଣ ଗ୍ରାମ ଓ ସହରାଞ୍ଚଳକୁ ସାମିଲ କରାଯାଇଥିଲା। ଜୁଲାଇ ୨୦୨୬ରେ ଏହି ପର୍ଯ୍ୟାୟ ଶେଷ ହୋଇଛି।

ଅଭିଯାନ ସମୟରେ ଦେଶବ୍ୟାପୀ ୨.୨ କୋଟିରୁ ଅଧିକ ଲୋକଙ୍କ ସ୍କ୍ରିନିଂ କରାଯାଇଥିଲା। ଏଥିରେ ୭ ଲକ୍ଷରୁ ଅଧିକ ନୂଆ ଟିବି ମାମଲା ଚିହ୍ନଟ ହୋଇଥିବାବେଳେ ୧.୯୭ ଲକ୍ଷ ଲକ୍ଷଣବିହୀନ ଟିବି ମାମଲା ମଧ୍ୟ ଚିହ୍ନଟ ହୋଇଛି। ଏହି ପଦକ୍ଷେପ ଉଚ୍ଚ ବିପଦପ୍ରବଣ ଲୋକଙ୍କ ମଧ୍ୟରେ ଶୀଘ୍ର ଟିବି ଚିହ୍ନଟ କରିବାରେ ସହାୟକ ହୋଇଛି।

ଓଡ଼ିଶାରେ ୧୫,୨୬୮ ଟିବି ରୋଗୀ ଚିହ୍ନଟ

୧୦୦ ଦିନିଆ ଅଭିଯାନରେ ଓଡ଼ିଶାରେ ମୋଟ ୧୫,୨୬୮ ଜଣ ଟିବି ରୋଗୀଙ୍କୁ ଚିହ୍ନଟ କରାଯାଇଛି। ଏଥିରୁ ୩,୫୧୪ ଜଣଙ୍କଠାରେ ଲକ୍ଷଣ ନଥିବା ସତ୍ତ୍ୱେ ଟିବି ଚିହ୍ନଟ ହୋଇଛି।

ଝାଡ଼ଖଣ୍ଡରେ ଏହି ସମୟ ମଧ୍ୟରେ ୧୬,୭୫୪ ଜଣ ଟିବି ରୋଗୀ ଚିହ୍ନଟ ହୋଇଥିବାବେଳେ ୪,୫୭୪ଟି ଲକ୍ଷଣବିହୀନ ମାମଲା ରହିଛି।

ଖଣି ଓ ଶିଳ୍ପାଞ୍ଚଳ, ଧୂଳି ପ୍ରଦୂଷଣ, ପ୍ରବାସୀ ଶ୍ରମିକ, ଆଦିବାସୀ ଜନସଂଖ୍ୟା, ପୁଷ୍ଟିହୀନତା, ସହରାଞ୍ଚଳର ବସ୍ତି ଓ ଅନ୍ୟାନ୍ୟ କାରଣରୁ ଓଡ଼ିଶା ଓ ଝାଡ଼ଖଣ୍ଡକୁ ଟିବି ନିୟନ୍ତ୍ରଣ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ରାଜ୍ୟ ଭାବେ ଗଣାଯାଉଛି।

ଟିବି ନିରାକରଣରେ ଟେକ୍ନୋଲୋଜିର ବ୍ୟବହାର

ଟିବି ଚିହ୍ନଟ ଓ ଚିକିତ୍ସା ବ୍ୟବସ୍ଥାକୁ ଅଧିକ ଦୃଢ଼ କରିବା ପାଇଁ ଦେଶରେ ମଲିକ୍ୟୁଲାର ଟେଷ୍ଟିଂ କ୍ଷମତା ବଢ଼ାଯାଇଛି। ବର୍ତ୍ତମାନ ୯,୦୦୦ରୁ ଅଧିକ ମେସିନ୍ ଉପଲବ୍ଧ ରହିଛି। ଏହା ସହ ପ୍ରାୟ ୩,୦୦୦ ଏଆଇ-ସକ୍ଷମ ହ୍ୟାଣ୍ଡହେଲ୍ଡ ଏକ୍ସ-ରେ ୟୁନିଟ୍ ମଧ୍ୟ କ୍ଷେତ୍ରସ୍ତରରେ ଟିବି ଚିହ୍ନଟରେ ବ୍ୟବହାର କରାଯାଉଛି।

କେନ୍ଦ୍ରମନ୍ତ୍ରୀ ନଡ୍ଡା କହିଛନ୍ତି ଯେ ଟିବି ମୁକ୍ତ ଭାରତ ଲକ୍ଷ୍ୟ ହାସଲ ପାଇଁ ନିରନ୍ତର ରାଜନୈତିକ ଓ ପ୍ରଶାସନିକ ସହଯୋଗ ଆବଶ୍ୟକ। ଶୀଘ୍ର ରୋଗ ଚିହ୍ନଟ, ଉନ୍ନତ ଚିକିତ୍ସା, ରୋଗୀକୈନ୍ଦ୍ରିକ ସେବା ଏବଂ ଜନସାଧାରଣଙ୍କ ସହଭାଗିତା ଉପରେ ସେ ଗୁରୁତ୍ୱ ଦେଇଛନ୍ତି।

ସାଂସଦମାନଙ୍କୁ ନିଜ ନିର୍ବାଚନମଣ୍ଡଳୀରେ ଜିଲ୍ଲାପାଳ ଓ ସ୍ୱାସ୍ଥ୍ୟକେନ୍ଦ୍ର ସହ ସମନ୍ୱୟ ରଖି ଟିବି ସେବାର ଉପଲବ୍ଧତା ଓ ଗୁଣବତ୍ତା ସମୀକ୍ଷା କରିବାକୁ ନଡ୍ଡା ଆହ୍ୱାନ ଦେଇଛନ୍ତି।

ଓଡ଼ିଶା ଓ ଝାଡ଼ଖଣ୍ଡର ସାଂସଦମାନେ ମଧ୍ୟ ଟିବି ସମ୍ପର୍କିତ ସଚେତନତା, କଳଙ୍କ ଦୂରୀକରଣ, ଶୀଘ୍ର ଚିହ୍ନଟ ପାଇଁ ନି-କ୍ଷୟ ଶିବିର ଏବଂ ଜିଲ୍ଲା ଓ ବ୍ଲକ୍ ସ୍ତରରେ ଟିବି ସେବାକୁ ଆହୁରି ସୁଦୃଢ଼ କରିବା ନେଇ ପ୍ରତିବଦ୍ଧତା ପ୍ରକାଶ କରିଛନ୍ତି। ଟିବି ପ୍ରଭାବିତ ଲୋକଙ୍କୁ ପୁଷ୍ଟିକର, ମାନସିକ ଓ ଜୀବିକା ସହାୟତା ଯୋଗାଇବା ଉପରେ ମଧ୍ୟ ଗୁରୁତ୍ୱ ଦିଆଯାଇଛି।