ଭୁବନେଶ୍ୱର: ଆର୍ଥିକ ଠକେଇ ମାମଲାରେ ED ଚଢ଼ାଉ ଚାଲିଥିବା ବେଳେ ଘରୁ ମିଳିଲା ବନ୍ୟଜନ୍ତୁଙ୍କ ଅବଶେଷ। ୧୨୨ କୋଟି ଟଙ୍କାର ଠକେଇ ମାମଲାରେ ତଦନ୍ତ କରୁଥିବା ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଅଧିକାରୀଙ୍କ ଚଢ଼ାଉ ସମୟରେ ହାତୀ ଦାନ୍ତ ଓ ହରିଣ ଶିଙ୍ଗ ମିଳିବା ପରେ ଘଟଣା ନୂଆ ମୋଡ଼ ନେଇଛି। ଏହି ମାମଲାରେ ମୟୂରଭଞ୍ଜ ଜିଲ୍ଲାର ଈଶ୍ୱର ବିନ୍ଧାଣୀଙ୍କୁ ବନ ବିଭାଗ ଗିରଫ କରିଛି।

୧୨୨ କୋଟି ଠକେଇ ମାମଲାରେ ED ଚଢ଼ାଉ

ସୂଚନା ଅନୁସାରେ, ‘କଳ୍ପନା ଫାଇନାନ୍ସ ସର୍ଭିସେସ୍’ ନାମକ ଏକ ସଂସ୍ଥା ଜରିଆରେ ପ୍ରାୟ ୧୨୨ କୋଟି ଟଙ୍କାର ଆର୍ଥିକ ଠକେଇ ହୋଇଥିବା ଅଭିଯୋଗ ରହିଛି। ଏହି ମାମଲାର ତଦନ୍ତ କରିବାକୁ ED ପକ୍ଷରୁ ମୟୂରଭଞ୍ଜ ଜିଲ୍ଲାର କପ୍ତିପଦା ଥାନା ଅନ୍ତର୍ଗତ ବିଶୋଳ ଗାଁରେ ଚଢ଼ାଉ କରାଯାଇଥିଲା।

ପ୍ରାୟ ୧୭ ଘଣ୍ଟା ଧରି ଚାଲିଥିବା ଏହି ଯାଞ୍ଚ ସମୟରେ ଘରେ ଥିବା କାଗଜପତ୍ର, ବ୍ୟାଙ୍କ ପାସବୁକ୍ ଓ ଅଳଙ୍କାର ଆଦି ଯାଞ୍ଚ କରାଯାଇଥିଲା।

ଘରୁ ମିଳିଲା ହାତୀ ଦାନ୍ତ ଓ ହରିଣ ଶିଙ୍ଗ

ED ଚଢ଼ାଉ ସମୟରେ ଘର ଭିତରେ ହାତୀ ଦାନ୍ତ ଓ ହରିଣ ଶିଙ୍ଗ ଥିବା ଜଣାପଡ଼ିଥିଲା। ଏହା ପରେ ବନ ବିଭାଗକୁ ଏ ସମ୍ପର୍କରେ ଖବର ଦିଆଯାଇଥିଲା। ବନ ବିଭାଗର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ବନ୍ୟଜନ୍ତୁଙ୍କ ଅବଶେଷ ଜବତ କରିଥିଲେ।

ଏହି ଅବଶେଷଗୁଡ଼ିକୁ ବେଆଇନ ଭାବେ ରଖାଯାଇଥିବା ଅଭିଯୋଗରେ ବିଶୋଳ ଗାଁର ଈଶ୍ୱର ବିନ୍ଧାଣୀଙ୍କୁ ବନ ବିଭାଗ ଗିରଫ କରିଛି।

ED ଜବତ କଲା ଜମିପଟ୍ଟା ଓ ବ୍ୟାଙ୍କ ଦସ୍ତାବିଜ

ଅନ୍ୟପଟେ, ଆର୍ଥିକ ଠକେଇ ମାମଲାର ତଦନ୍ତକୁ ଆଗକୁ ବଢ଼ାଇ ED ଅଧିକାରୀମାନେ ଜମିପଟ୍ଟା, ଗୁରୁତ୍ୱପୂର୍ଣ୍ଣ ଦସ୍ତାବିଜ ଓ ବ୍ୟାଙ୍କ ପାସବୁକ୍ ଜବତ କରିଛନ୍ତି। ଏହି କାଗଜପତ୍ର ଆଧାରରେ ଆର୍ଥିକ କାରବାରର ଖୋଳତାଡ଼ କରାଯାଉଛି।

ଉଭୟ ମାମଲାରେ ତଦନ୍ତ ଜାରି

ଗୋଟିଏ ପଟେ ୧୨୨ କୋଟି ଟଙ୍କାର ଆର୍ଥିକ ଠକେଇ ମାମଲାରେ ED ତଦନ୍ତ ଚଳାଇଥିବା ବେଳେ ଅନ୍ୟପଟେ ବନ୍ୟଜନ୍ତୁଙ୍କ ଅବଶେଷ ରଖିବା ଅଭିଯୋଗରେ ବନ ବିଭାଗ ତଦନ୍ତ କରୁଛି। ଜବତ ହୋଇଥିବା ହାତୀ ଦାନ୍ତ ଓ ହରିଣ ଶିଙ୍ଗର ଉତ୍ସ ଏବଂ ଏହା ପଛରେ ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ, ସେନେଇ ଅଧିକ ତଦନ୍ତ ହେବା ସମ୍ଭାବନା ରହିଛି।

ଏହି ଘଟଣା ଏବେ ମୟୂରଭଞ୍ଜ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି।