ପୃଥିବୀ ପରେ ଏବେ ଚନ୍ଦ୍ରକୁ ନେଇ ଆରମ୍ଭ ହେବାକୁ ଯାଉଛି ନୂଆ ମହାକାଶ ପ୍ରତିଯୋଗିତା। ଚନ୍ଦ୍ରରେ ନିଜର ସ୍ଥାୟୀ ଉପସ୍ଥିତି ସ୍ଥାପନ କରିବା ସହ ମହାକାଶ ଅନୁସନ୍ଧାନରେ ନେତୃତ୍ୱ ନେବାକୁ ଆମେରିକା ନୂଆ ଯୋଜନା ଘୋଷଣା କରିଛି। ଆମେରିକାର ମଧ୍ୟାବଧି ନିର୍ବାଚନ ସମୟରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ‘ଦି ଆମେରିକାନ୍ ଡିକ୍ଲାରେସନ୍ ଅଫ୍ ଫ୍ରିଡମ୍ ଇନ୍ ସ୍ପେସ୍’ ନାମରେ ଏକ ଘୋଷଣା ଜାରି କରିଛନ୍ତି।
ଏହି ଘୋଷଣାରେ ୨୦୨୮ ସୁଦ୍ଧା ଚନ୍ଦ୍ରକୁ ମଣିଷ ପଠାଇବା, ଚନ୍ଦ୍ରରେ ସ୍ଥାୟୀ ଆମେରିକୀୟ ଉପସ୍ଥିତି ସ୍ଥାପନ କରିବା ଏବଂ ଭବିଷ୍ୟତରେ ମଙ୍ଗଳ ଗ୍ରହକୁ ମାନବ ଅଭିଯାନ ପଠାଇବାର ଲକ୍ଷ୍ୟ ରଖାଯାଇଛି। ମହାକାଶରେ ଆମେରିକାର ନେତୃତ୍ୱକୁ ଦେଶର ଅର୍ଥନୈତିକ ସମୃଦ୍ଧି ଓ ଜାତୀୟ ସୁରକ୍ଷା ସହ ଯୋଡ଼ିଛି ଏହି ଘୋଷଣା ।
ଟ୍ରମ୍ପଙ୍କ ଏହି ଘୋଷଣା ପରେ ମହାକାଶର ଭବିଷ୍ୟତ ନିୟନ୍ତ୍ରଣ ଓ ନିୟମକୁ ନେଇ ନୂଆ ଆଲୋଚନା ଆରମ୍ଭ ହୋଇଛି। ମହାକାଶ ସମସ୍ତ ମାନବଜାତିର ସମ୍ପତ୍ତି ଭାବେ ରହିବ ନା ଏହା ଶକ୍ତିଶାଳୀ ଦେଶମାନଙ୍କ ମଧ୍ୟରେ ପ୍ରଭାବ ବିସ୍ତାରର ନୂଆ କ୍ଷେତ୍ର ହେବ, ତାହା ଏବେ ବଡ଼ ପ୍ରଶ୍ନ ।
ମହାକାଶ ଗବେଷଣା ସଂସ୍ଥା Spaceport SARABHAIର ମହାନିର୍ଦ୍ଦେଶିକା ସୁସ୍ମିତା ମହାନ୍ତିଙ୍କ ମତରେ, ଟ୍ରମ୍ପ ମହାକାଶକୁ ସମସ୍ତ ମାନବଜାତିର କ୍ଷେତ୍ର ବୋଲି କହୁଥିବା ବେଳେ ଏକାସାଙ୍ଗରେ ସେଠାରେ ସ୍ଥାୟୀ ଆମେରିକୀୟ ଉପସ୍ଥିତି ସ୍ଥାପନ କରିବାର ଲକ୍ଷ୍ୟ ରଖୁଛନ୍ତି। ଏହି ଦୁଇଟି ଆଭିମୁଖ୍ୟ ମଧ୍ୟରେ ବିରୋଧାଭାସ ରହିଥିବା ସେ ମତ ଦେଇଛନ୍ତି।
ସେ ଏହା ମଧ୍ୟ ମନେ ପକାଇଛନ୍ତି ଯେ, ମହାକାଶ ଅନୁସନ୍ଧାନ କେବଳ ଗୋଟିଏ ଦେଶର ଉଦ୍ୟମରେ ଆଗକୁ ବଢ଼ିନାହିଁ। ରୁଷ୍ ଦୀର୍ଘ ସମୟ ଧରି ଆମେରିକାର ମାନବ ମହାକାଶ ଅଭିଯାନରେ ସହଯୋଗ କରିଥିଲା। ଅନ୍ୟପଟେ ଚୀନ୍ ମଧ୍ୟ ମହାକାଶ ଗବେଷଣାରେ ନିଜର କ୍ଷମତା ବଢ଼ାଇଛି।
ଭାରତୀୟ ମହାକାଶ ସଂଘ (ISpA)ର ମହାନିର୍ଦ୍ଦେଶକ ଅବସରପ୍ରାପ୍ତ ଲେଫ୍ଟନାଣ୍ଟ ଜେନେରାଲ୍ ଏ.କେ. ଭାଟ୍ଙ୍କ ମତରେ, ଟ୍ରମ୍ପଙ୍କ ଘୋଷଣା ମହାକାଶ କାର୍ଯ୍ୟକଳାପକୁ ନେଇ ଦୁଇଟି ଭିନ୍ନ ଆନ୍ତର୍ଜାତୀୟ ଢାଞ୍ଚା ମଧ୍ୟରେ ପ୍ରତିଯୋଗିତାର ସଙ୍କେତ ଦେଉଛି।
ଗୋଟିଏ ପଟେ ଆମେରିକା ନେତୃତ୍ୱାଧୀନ Artemis କାର୍ଯ୍ୟକ୍ରମ ରହିଥିବା ବେଳେ ଅନ୍ୟପଟେ ଚୀନ୍ ଓ ରୁଷ୍ର International Lunar Research Station (ILRS) ଯୋଜନା ରହିଛି। ଚନ୍ଦ୍ରରେ ମାନବ ବସତି, ସମ୍ପଦର ବ୍ୟବହାର ଓ ନିୟନ୍ତ୍ରଣକୁ ନେଇ ଆଗାମୀ ଦିନରେ ଦେଶଗୁଡ଼ିକ ମଧ୍ୟରେ ମତଭେଦ ଏବଂ ପ୍ରତିଯୋଗିତା ବଢ଼ିପାରେ ବୋଲି ସେ ଆଶଙ୍କା ପ୍ରକାଶ କରିଛନ୍ତି।
୧୯୬୭ ମସିହାର Outer Space Treaty ଅନୁଯାୟୀ, ମହାକାଶ ସମଗ୍ର ମାନବଜାତିର ହିତ ପାଇଁ ବ୍ୟବହାର ହେବା ଉଚିତ। ଏହାର ଧାରା-୩ ଅନୁସାରେ ମହାକାଶୀୟ ପିଣ୍ଡ ବା ଚନ୍ଦ୍ର ଭଳି ଆକାଶୀୟ ବସ୍ତୁ ଉପରେ କୌଣସି ଦେଶ ଜାତୀୟ ମାଲିକାନା ଦାବି କରିପାରିବ ନାହିଁ।
ଟ୍ରମ୍ପଙ୍କ ଘୋଷଣାରେ ଚନ୍ଦ୍ରରେ ସ୍ଥାୟୀ ଆମେରିକୀୟ ଉପସ୍ଥିତି ଓ ସମ୍ପଦ ବିକାଶ କଥା କୁହାଯାଇଛି। ତେବେ ଏହି ଘୋଷଣା ନିଜେ ଚନ୍ଦ୍ରର କୌଣସି ଅଞ୍ଚଳ ଉପରେ ଆମେରିକାକୁ ମାଲିକାନା ଅଧିକାର ଦେଉନାହିଁ।
ମହାକାଶ କ୍ଷେତ୍ରରେ ଭାରତର ନିଜସ୍ୱ ଦୀର୍ଘମିଆଦୀ ଲକ୍ଷ୍ୟ ରହିଛି। ଭାରତ ୨୦୨୩ ଜୁନ୍ରେ Artemis Accordsରେ ସ୍ୱାକ୍ଷର କରିଥିବା ବେଳେ ୧୯୭୯ର Moon Agreementରେ ମଧ୍ୟ ସ୍ୱାକ୍ଷର କରିଛି, ଯଦିଓ ଏହାକୁ ଏପର୍ଯ୍ୟନ୍ତ ଅନୁମୋଦନ କରିନାହିଁ। ଏହି ଦୁଇଟି ଢାଞ୍ଚାରେ ଚନ୍ଦ୍ରର ସମ୍ପଦ ପରିଚାଳନା ସମ୍ପର୍କରେ ଭିନ୍ନ ଆଭିମୁଖ୍ୟ ରହିଛି।
୨୦୨୬ ଅଗଷ୍ଟରେ ନାସା ଭାରତୀୟ ମହାକାଶ ଗବେଷଣା ସଂସ୍ଥା ISROକୁ ନିଜର Moon Base କାର୍ଯ୍ୟକ୍ରମରେ ଯୋଗଦେବାକୁ ଆମନ୍ତ୍ରଣ କରିଥିଲା। ଏହା ଭାରତ-ଆମେରିକା ମହାକାଶ ସହଯୋଗକୁ ଆହୁରି ମଜବୁତ କରିପାରେ ।
ଅନ୍ୟପଟେ, ଭାରତର ‘ସ୍ପେସ୍ ଭିଜନ୍ ୨୦୪୭’ ଅନୁଯାୟୀ ୨୦୩୫ ସୁଦ୍ଧା ଭାରତୀୟ ଅନ୍ତରୀକ୍ଷ ଷ୍ଟେସନ୍ ସ୍ଥାପନ ଏବଂ ୨୦୪୦ ସୁଦ୍ଧା ଚନ୍ଦ୍ରରେ ମାନବ ଅବତରଣ କରାଇବାର ଲକ୍ଷ୍ୟ ରହିଛି।
ବିଶେଷଜ୍ଞଙ୍କ ମତରେ, ଭାରତକୁ ଆମେରିକା ଓ ଚୀନ୍ର ମହାକାଶ ରଣନୀତି ମଧ୍ୟରେ ନିଜର ସ୍ୱାଧୀନ ନିଷ୍ପତ୍ତି ନେବାର କ୍ଷମତା ବଜାୟ ରଖିବାକୁ ହେବ। Artemis Accordsରେ ଭାରତର ସ୍ୱାକ୍ଷର ଆମେରିକା ସହ ସହଯୋଗ ପ୍ରତି ଆଗ୍ରହର ସଙ୍କେତ ଦେଇଥିଲେ ମଧ୍ୟ ଦେଶ ମଧ୍ୟରେ ଏହାର ରଣନୈତିକ ପ୍ରଭାବ ନେଇ ଆଲୋଚନା ଆବଶ୍ୟକ ବୋଲି ମତ ପ୍ରକାଶ ପାଇଛି।
ତେଣୁ ଭାରତ ପାଇଁ ମୁଖ୍ୟ ଚ୍ୟାଲେଞ୍ଜ ହେଉଛି ଆମେରିକା ସମେତ ବିଭିନ୍ନ ମହାକାଶ ଶକ୍ତି ସହ ସହଯୋଗ ଜାରି ରଖିବା, କିନ୍ତୁ କୌଣସି ଗୋଟିଏ ଦେଶର ଭୂ-ରାଜନୈତିକ ନିଷ୍ପତ୍ତି ଉପରେ ନିର୍ଭରଶୀଳ ନ ହେବା। ଚନ୍ଦ୍ର ଓ ମହାକାଶର ଭବିଷ୍ୟତ ନିୟମ ନିର୍ଦ୍ଧାରଣରେ ଭାରତ ନିଜର ସ୍ୱର ଓ ପ୍ରଭାବ ବଜାୟ ରଖିବା ମଧ୍ୟ ଅତ୍ୟନ୍ତ ଜରୁରୀ।
ଓଡ଼ିଶାର ଉଚ୍ଚଶିକ୍ଷା କ୍ଷେତ୍ରରେ କଲେଜ ପରିଚାଳନାକୁ ଅଧିକ...
ବିହାର ବୋର୍ଡର ଦଶମ ଓ ଦ୍ୱାଦଶ ଶ୍ରେଣୀର ୨୦୨୭ ବାର୍ଷିକ ପରୀ...
ଗବେଷଣା ଓ ଉଚ୍ଚଶିକ୍ଷା କ୍ଷେତ୍ରରେ ନୂଆ ସହଯୋଗ ଉଚ୍ଚଶିକ...
ଦୀପାବଳିକୁ ସୁରକ୍ଷିତ ଓ ଶାନ୍ତିପୂର୍ଣ୍ଣ ଭାବେ ପାଳନ କରିବା...
ଦେଶରେ ଗବେଷଣା ଓ ନୂତନ ଉଦ୍ଭାବନକୁ ଉତ୍ସାହିତ କରିବା ଲକ୍ଷ୍...
ଓଡ଼ିଶାର ଉଚ୍ଚଶିକ୍ଷା କ୍ଷେତ୍ରରେ କଲେଜ ପରିଚାଳନାକୁ ଅଧିକ...
‘ଅରାଜକତା ହଟାଅ, ଗଣତନ୍ତ୍ର ବଞ୍ଚାଅ’ ସ୍ଲୋଗା...
କାଠଯୋଡ଼ି ନଦୀପଠାରେ ଅଭିଯୁକ୍ତଙ୍କୁ ନେଇ ତଦନ୍ତ ...
