ଉଡ଼ାଣ ସମୟରେ ବିମାନ ଭିତରେ ହଠାତ୍ ଏକ ରହସ୍ୟମୟ ଦୁର୍ଗନ୍ଧ ବ୍ୟାପିଯିବାରୁ ଆମେରିକା ଏୟାରଲାଇନ୍ସର ଏକ ଆନ୍ତର୍ଜାତୀୟ ବିମାନରେ ଆତଙ୍କ ସୃଷ୍ଟି ହୋଇଥିଲା। ଏହି ଦୁର୍ଗନ୍ଧ କାରଣରୁ କ୍ରୁ ମେମ୍ବର ଓ କିଛି ଯାତ୍ରୀ ଅସୁସ୍ଥ ଅନୁଭବ କରିବା ପରେ ବିମାନକୁ ଜରୁରୀ ଅବତରଣ କରାଯାଇଥିଲା।

ରିପୋର୍ଟ ଅନୁସାରେ, ଆମେରିକା ଏୟାରଲାଇନ୍ସର ଫ୍ଲାଇଟ୍ ୭୧୯ ଇଟାଲୀର ରାଜଧାନୀ ରୋମରୁ ଆମେରିକାର ଫିଲାଡେଲଫିଆ ଅଭିମୁଖେ ଯାଉଥିଲା। ବିମାନରେ ମୋଟ ୨୮୧ ଜଣ ଯାତ୍ରୀ ଏବଂ ୯ ଜଣ କ୍ରୁ ମେମ୍ବର ଥିଲେ।

ଉଡ଼ାଣ ଆରମ୍ଭ ହେବାର ପ୍ରାୟ ତିନି ଘଣ୍ଟା ପରେ ବିମାନର କ୍ୟାବିନ୍‌ରେ ହଠାତ୍ ଏକ ଅଜଣା ଗନ୍ଧ ବ୍ୟାପିବାକୁ ଲାଗିଥିଲା। କିଛି ସମୟ ମଧ୍ୟରେ ୯ ଜଣ ଫ୍ଲାଇଟ୍ ଆଟେଣ୍ଡାଣ୍ଟଙ୍କ ମଧ୍ୟରୁ ୬ ଜଣ ମୁଣ୍ଡ ବୁଲାଇବା, ଅସ୍ୱସ୍ଥତା ଓ ଶ୍ୱାସକଷ୍ଟ ଭଳି ଲକ୍ଷଣ ଅନୁଭବ କରିଥିଲେ। କିଛି ଯାତ୍ରୀ ମଧ୍ୟ ଅସହଜ ଅନୁଭବ କରିଥିଲେ।

ଘଟଣା ପରେ ପାଇଲଟ୍ ଯାତ୍ରୀଙ୍କ ସୁରକ୍ଷାକୁ ପ୍ରାଥମିକତା ଦେଇ ବିମାନର ମାର୍ଗ ପରିବର୍ତ୍ତନ କରି ଆୟରଲ୍ୟାଣ୍ଡର ରାଜଧାନୀ ଡବଲିନ୍ ବିମାନବନ୍ଦରରେ ଜରୁରୀ ଅବତରଣ କରିଥିଲେ। ଅବତରଣ ପରେ ପ୍ରଭାବିତ କ୍ରୁ ମେମ୍ବରଙ୍କୁ ତୁରନ୍ତ ଚିକିତ୍ସା ଯୋଗାଇ ଦିଆଯାଇଥିଲା।

ଏୟାରଲାଇନ୍ସ ପକ୍ଷରୁ ପ୍ରାଥମିକ ଯାଞ୍ଚରେ ଜଣାପଡ଼ିଛି ଯେ ଏହି ଗନ୍ଧ ବିମାନରେ ଥିବା ଓଭାନ୍ରୁ ଆସିଥିଲା। ତେବେ ଏହାର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ଏବଂ ତଦନ୍ତ ଜାରି ରହିଛି।

ଅବତରଣ ପରେ ସମସ୍ତ ଯାତ୍ରୀଙ୍କୁ ବିନା ଅତିରିକ୍ତ ଶୁଳ୍କରେ ହୋଟେଲ୍ ବ୍ୟବସ୍ଥା କରାଯାଇଥିଲା। ଏୟାରଲାଇନ୍ସ କହିଛି ଯେ ପରିସ୍ଥିତି ବର୍ତ୍ତମାନ ସମ୍ପୂର୍ଣ୍ଣ ନିୟନ୍ତ୍ରଣରେ ରହିଛି ଏବଂ ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି।