ଭାରତୀୟ କ୍ରିକେଟ୍‌ ଦଳରେ ଦ୍ରୁତ ବୋଲରଙ୍କ ଫିଟନେସ୍‌କୁ ନେଇ ଚିନ୍ତା ମଧ୍ୟରେ ମହମ୍ମଦ ଶାମି ଘରୋଇ କ୍ରିକେଟ୍‌ରେ ନିଜ ଦମଦାର ପ୍ରଦର୍ଶନ ଜାରି ରଖିଛନ୍ତି। ଦୀର୍ଘ ସମୟ ଆହତ ରହିବା ପରେ ଶାମି ଏବେ ପୁଣି ନିଜ ଲୟକୁ ଫେରିଥିବା ଦେଖାଯାଉଛି।

୨୦୨୩ ଦିନିକିଆ ବିଶ୍ୱକପ୍‌ ପରେ ଶାମିଙ୍କ ଗୋଡ଼ ଗଣ୍ଠିରେ ଗୁରୁତର ଆଘାତ ଲାଗିଥିଲା। ଏଥିପାଇଁ ତାଙ୍କୁ ଅସ୍ତ୍ରୋପଚାର କରାଇବାକୁ ପଡ଼ିଥିଲା। ଫଳରେ ସେ ଦୀର୍ଘ ସମୟ ଧରି କ୍ରିକେଟ୍‌ରୁ ଦୂରେ ରହିଥିଲେ।

୨୦୨୫ ଆରମ୍ଭରେ ଶାମି ଅନ୍ତର୍ଜାତୀୟ କ୍ରିକେଟ୍‌କୁ ଫେରିଥିଲେ। ଏହାପରେ ସେ ଭାରତର ଚାମ୍ପିଅନ୍ସ ଟ୍ରଫି ବିଜୟରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ। ତେବେ ଏହା ପରେ ତାଙ୍କୁ ଭାରତୀୟ ଦଳରୁ ବାଦ୍‌ ପଡ଼ିବାକୁ ପଡ଼ିଥିଲା।

ଶାମିଙ୍କ ବର୍ତ୍ତମାନର ସ୍ଥିତିକୁ ନେଇ ଭାରତୀୟ କ୍ରିକେଟ୍‌ର ଜଣେ ଅଭିଜ୍ଞ ତାରକା ତାଙ୍କ ସମର୍ଥନରେ ମତ ରଖିଛନ୍ତି। ତାଙ୍କ ମତରେ, ଶାମିଙ୍କୁ ଚୟନକର୍ତ୍ତାମାନେ ‘ନେଗ୍ଲେକ୍ଟ’ ବା ଅବହେଳା କରୁନାହାନ୍ତି। ବରଂ ତାଙ୍କ ବୟସ ଓ ଫିଟନେସ୍‌କୁ ନେଇ ଦଳ ପକ୍ଷରୁ ଚିନ୍ତା ରହିଛି।

ବର୍ତ୍ତମାନ ଶାମିଙ୍କ ବୟସ ୩୬ ବର୍ଷ। ଟେଷ୍ଟ କ୍ରିକେଟ୍‌ର କଠିନ ଏବଂ ଦୀର୍ଘ ଫର୍ମାଟ୍‌ରେ ସେ ଲଗାତାର ଖେଳିବାର ଚାପ ସହିପାରିବେ କି ନାହିଁ, ତାହା ଚୟନ କମିଟିର ମୁଖ୍ୟ ଚିନ୍ତା ବୋଲି କୁହାଯାଇଛି।

ଏହି ମଧ୍ୟରେ ଘରୋଇ କ୍ରିକେଟ୍‌ରେ ଶାମିଙ୍କ ପ୍ରଦର୍ଶନ ତାଙ୍କ ଫିଟନେସ୍‌ ଓ ବୋଲିଂ କ୍ଷମତା ନେଇ ଆଶା ସୃଷ୍ଟି କରିଛି। ତେଣୁ ଆଗାମୀ ସମୟରେ ତାଙ୍କୁ ପୁଣି ଭାରତୀୟ ଦଳରେ ସୁଯୋଗ ମିଳିବ କି ନାହିଁ, ତାହା ଉପରେ କ୍ରିକେଟ୍‌ପ୍ରେମୀଙ୍କ ନଜର ରହିଛି।