ମାଓବାଦୀ ପ୍ରଭାବିତ ଅଞ୍ଚଳରୁ ଆସିଥିବା ଜଣେ ଆଦିବାସୀ ଛାତ୍ର ନିଜର ଅଦମ୍ୟ ଇଚ୍ଛାଶକ୍ତି ଓ ପରିଶ୍ରମ ବଳରେ ଭାରତର ଶ୍ରେଷ୍ଠ ଶିକ୍ଷାନୁଷ୍ଠାନ ମଧ୍ୟରୁ ଗୋଟିଏ ଆଇଆଇଟିରେ ସ୍ଥାନ ହାସଲ କରି ସମସ୍ତଙ୍କ ପାଇଁ ପ୍ରେରଣା ସାଜିଛନ୍ତି।

ମୟୂରଭଞ୍ଜ ଜିଲ୍ଲାର ବିଜାତଳା ବ୍ଲକ୍ ଅଧୀନ ଡୁମୁରିକୁଦର ଗାଁର ବାସିନ୍ଦା ସାଗ୍ରାମ ମାରାଣ୍ଡି JEE ଆଡଭାନ୍ସଡ୍ ପରୀକ୍ଷାରେ ସଫଳତା ହାସଲ କରି IIT ଧନବାଦରେ ଆଡମିଶନ୍ ପାଇଛନ୍ତି।

ସାଗ୍ରାମ ଏହା ପୂର୍ବରୁ ଯୁକ୍ତ ଦୁଇ ପରୀକ୍ଷାରେ ମୟୂରଭଞ୍ଜ ଜିଲ୍ଲାର ଟପ୍ପର ହୋଇଥିଲେ। ଏହାସହ ସେ ସମଗ୍ର ଓଡ଼ିଶାର ଅନୁସୂଚିତ ଜନଜାତି (ST) ବର୍ଗର ଟପ୍ପର ଭାବେ ମଧ୍ୟ ସ୍ୱୀକୃତି ପାଇଥିଲେ।

ସାଗ୍ରାମ କହିଛନ୍ତି, “ଛାତ୍ରଛାତ୍ରୀମାନେ ଆରମ୍ଭରୁ ନିଜର ଲକ୍ଷ୍ୟ ସ୍ଥିର କରିବା ଉଚିତ। ମୋର ପ୍ରଥମ ବର୍ଷରୁ ହିଁ IIT ପ୍ରତି ଆଗ୍ରହ ଥିଲା। IIT ପରୀକ୍ଷା ବହୁତ କଠିନ ହୋଇଥିବାରୁ ଏଥିରେ ସଫଳତା ପାଇ ମୁଁ ବହୁତ ଖୁସି। ମୁଁ ୬୮ ମାର୍କ ରଖି ୮୧୮ତମ ସ୍ଥାନ ହାସଲ କରିଛି।”

ସେ ନିଜ ସଫଳତାର ଶ୍ରେୟ ତାଙ୍କ ପିତାମାତା ଏବଂ ଶିକ୍ଷକମାନଙ୍କୁ ଦେଇଛନ୍ତି। ତାଙ୍କ ପିତା ହାଜାମ ମାରାଣ୍ଡି କହିଛନ୍ତି, “ତାଙ୍କ ଇଚ୍ଛାଶକ୍ତି ଆଗରେ ମୁଁ ମଧ୍ୟ ନତମସ୍ତକ। ତାଙ୍କର ପରିଶ୍ରମ ଓ ଦୃଢ଼ ସଂକଳ୍ପ ହିଁ ତାଙ୍କୁ ଏହି ସଫଳତା ଦେଇଛି। ମୁଁ ଏପରି ସଫଳତା ଆଶା କରିନଥିଲି, କିନ୍ତୁ ଆଜି ମୁଁ ବହୁତ ଗର୍ବିତ।”

ସାଗ୍ରାମ ନିଜ ଗାଁର ଅନ୍ୟ ଛାତ୍ରଛାତ୍ରୀଙ୍କୁ ମଧ୍ୟ ପରିଶ୍ରମ, ଆତ୍ମବିଶ୍ୱାସ ଓ ଲକ୍ଷ୍ୟ ପ୍ରତି ନିଷ୍ଠା ରଖିବାକୁ ପରାମର୍ଶ ଦେଇଛନ୍ତି। ଭବିଷ୍ୟତରେ ସେ ଜଣେ ସଫଳ ସିଭିଲ୍ ଇଞ୍ଜିନିୟର୍ ହୋଇ ଦେଶ ଓ ସମାଜ ପାଇଁ କାମ କରିବାକୁ ଇଚ୍ଛା ପ୍ରକାଶ କରିଛନ୍ତି।