ଆମେରିକାରେ ଆଗାମୀ ମଧ୍ୟବର୍ତ୍ତୀକାଳୀନ ନିର୍ବାଚନକୁ ନେଇ ରାଜନୈତିକ ଉଷ୍ମତା ବଢ଼ିଛି। ଓହାୟୋ ଓ ମିଶିଗାନରେ ଡେମୋକ୍ରାଟିକ୍ ପ୍ରାର୍ଥୀଙ୍କ ପାଇଁ ପ୍ରଚାର କରିବା ସମୟରେ ପୂର୍ବତନ ରାଷ୍ଟ୍ରପତି ବାରାକ ଓବାମା ରିପବ୍ଲିକାନ୍ ଦଳ ଓ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଟାର୍ଗେଟ୍ କରିଛନ୍ତି। ଟ୍ରମ୍ପ ଓ ତାଙ୍କ ସହଯୋଗୀଙ୍କ ରାଜନୈତିକ ଆଚରଣକୁ ସେ ‘ନିଷ୍ଠୁର’ ଓ ‘ଅଶାଳୀନ’ ବୋଲି ସମାଲୋଚନା କରିଛନ୍ତି।

ଓହାୟୋରେ ରିପବ୍ଲିକାନ୍ ଗଭର୍ଣ୍ଣର ପ୍ରାର୍ଥୀ ବିବେକ ରାମସ୍ୱାମୀଙ୍କ ଏକ ନିର୍ବାଚନୀ ବିଜ୍ଞାପନକୁ ନେଇ ବିବାଦ ଉପୁଜିଛି। ଏହି ବିଜ୍ଞାପନରେ ଡେମୋକ୍ରାଟିକ୍ ପ୍ରାର୍ଥୀ ଡକ୍ଟର ଏମି ଆକ୍ଟନଙ୍କ ମାଆ ଡୋନା ଆର୍ଥରଙ୍କୁ ଦେଖାଯାଇଥିବା ଦାବି କରାଯାଇଛି। ବିଜ୍ଞାପନରେ ଏମି ଆକ୍ଟନଙ୍କ ବ୍ୟକ୍ତିଗତ ଜୀବନ ଓ ମାନସିକ ସ୍ୱାସ୍ଥ୍ୟକୁ ନେଇ ପ୍ରଶ୍ନ ଉଠାଯାଇଥିବାରୁ ଏହାକୁ ନେଇ ବିରୋଧ ଦେଖାଦେଇଛି।

ଓବାମା ଏହି ବିଜ୍ଞାପନକୁ ନେଇ ରାମସ୍ୱାମୀଙ୍କୁ ସମାଲୋଚନା କରି କହିଛନ୍ତି ଯେ ରାଜନୈତିକ ଲାଭ ପାଇଁ ଜଣେ ପ୍ରାର୍ଥୀଙ୍କ ବ୍ୟକ୍ତିଗତ ଓ ଯନ୍ତ୍ରଣାଦାୟକ ଅତୀତକୁ ରାଜନୈତିକ ଅସ୍ତ୍ର ଭାବେ ବ୍ୟବହାର କରିବା ନିନ୍ଦନୀୟ। ତାଙ୍କ ମତରେ, ରାଜନୀତିରେ ଏଭଳି ଆକ୍ରମଣ ନିର୍ବାଚନୀ ଆଲୋଚନାର ସ୍ତରକୁ ନିମ୍ନଗାମୀ କରୁଛି।

ଡେମୋକ୍ରାଟିକ୍ ପ୍ରାର୍ଥୀ ଏମି ଆକ୍ଟନ ମଧ୍ୟ ରାମସ୍ୱାମୀଙ୍କୁ ସମାଲୋଚନା କରିଛନ୍ତି। ତାଙ୍କ ଅଭିଯୋଗ ଅନୁସାରେ, ନିଜର ନିର୍ବାଚନୀ ପ୍ରଚାରକୁ ମଜବୁତ କରିବା ପାଇଁ ତାଙ୍କ ପିଲାଦିନର ଦୁଃଖଦ ଅନୁଭୂତିକୁ ବ୍ୟବହାର କରାଯାଉଛି।

ଅନ୍ୟପଟେ, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରାମସ୍ୱାମୀଙ୍କ ବିଜ୍ଞାପନକୁ ସମର୍ଥନ କରିଛନ୍ତି। ବିଜ୍ଞାପନକୁ ହଟାଇବା ପାଇଁ ଓହାୟୋର କିଛି ରିପବ୍ଲିକାନ୍ ନେତା ଦାବି କରିଥିବା ସତ୍ତ୍ୱେ ଟ୍ରମ୍ପ ଓ ଉପରାଷ୍ଟ୍ରପତି ଜେଡି ଭାନ୍ସ ଏହାର ସମର୍ଥନରେ ରହିଥିବା ଖବର ଆସିଛି।

ଏହି ମଧ୍ୟରେ ମିଶିଗାନରେ ଡେମୋକ୍ରାଟିକ୍ ସିନେଟ୍ ପ୍ରାର୍ଥୀ ଅବଦୁଲ ଏଲ୍-ସୟଦଙ୍କ ସମର୍ଥନରେ ଓବାମା ପ୍ରଚାର କରିଛନ୍ତି। ତାଙ୍କ ନାମ ଓ ଧର୍ମକୁ ନେଇ ହେଉଥିବା ରାଜନୈତିକ ଆକ୍ରମଣକୁ ମଧ୍ୟ ଓବାମା ନିନ୍ଦା କରିଛନ୍ତି।

ଆଗାମୀ ନିର୍ବାଚନ ଆମେରିକାରେ ରାଜନୈତିକ କ୍ଷମତାର ସନ୍ତୁଳନ ଉପରେ ପ୍ରଭାବ ପକାଇବାକୁ ଥିବାରୁ ଉଭୟ ଡେମୋକ୍ରାଟିକ୍ ଓ ରିପବ୍ଲିକାନ୍ ଦଳ ପକ୍ଷରୁ ପ୍ରଚାର ଜୋରଦାର ହୋଇଛି। ଫଳରେ ଟ୍ରମ୍ପ ଓ ଓବାମାଙ୍କ ମଧ୍ୟରେ ରାଜନୈତିକ ବାକ୍ଯୁଦ୍ଧ ଆମେରିକାର ନିର୍ବାଚନୀ ପରିବେଶକୁ ଆହୁରି ତୀବ୍ର କରିଛି।