ଭାରତୀୟ ସିନେମାରେ ଆନିମେସନ୍ର ଦୁନିଆ ଦ୍ରୁତ ଭାବେ ବଡ଼ ହେଉଛି। ପୌରାଣିକ କାହାଣୀ ଓ ଲୋକପ୍ରିୟ ଚରିତ୍ରଙ୍କୁ ନୂଆ ଟେକ୍ନୋଲୋଜି ସହ ପରଦାକୁ ଆଣିବା ପାଇଁ ନିର୍ମାତାମାନେ ପ୍ରସ୍ତୁତି ଚଳାଇଛନ୍ତି। ୨୦୨୬ ଓ ୨୦୨୭ ମଧ୍ୟରେ ଏଭଳି ୫ଟି ବଡ଼ ଆନିମେଟେଡ୍ ଫିଲ୍ମ ଦର୍ଶକଙ୍କୁ ମିଳିବ।

୧. ମହାବତାର ପର୍ଶୁରାମ:ହୋମ୍ବଲେ ଫିଲ୍ମସ୍ ଓ କ୍ଲିମ୍ ପ୍ରଡକ୍ସନ୍ସ ପକ୍ଷରୁ ଆସୁଛି ‘ମହାବତାର ପର୍ଶୁରାମ’। ଆଶ୍ୱିନ କୁମାରଙ୍କ ନିର୍ଦ୍ଦେଶିତ ଏହି ପୌରାଣିକ ଆକ୍ସନ୍ ଫିଲ୍ମରେ ଭଗବାନ ବିଷ୍ଣୁଙ୍କ ଯୋଦ୍ଧା ଅବତାର ପର୍ଶୁରାମଙ୍କ କାହାଣୀ ଦେଖିବାକୁ ମିଳିବ। ଫିଲ୍ମଟି ୨୦୨୭ ଡିସେମ୍ବରରେ ରିଲିଜ୍ ହେବାର ଯୋଜନା ରହିଛି।

୨. ମହାଦେବୀ ଆଦିଶକ୍ତି – ଦ ଲିଜେଣ୍ଡ ଅଫ୍ ମା’ ଦୁର୍ଗା:ମା’ ଦୁର୍ଗାଙ୍କ ବିଭିନ୍ନ ରୂପ ଓ ମହିଷାସୁରମର୍ଦ୍ଦିନୀ ଏବଂ ମା’ କାଳୀଙ୍କ କାହାଣୀକୁ ନେଇ ଏହି ଆନିମେଟେଡ୍ ଫିଲ୍ମ ତିଆରି ହେଉଛି। ମିଲିନ୍ଦ ନନ୍ଦନୱାରଙ୍କ ନିର୍ଦ୍ଦେଶନାରେ ତିଆରି ହେଉଥିବା ଫିଲ୍ମଟି ୨୦୨୭ ଫେବ୍ରୁଆରୀରେ ବିଶ୍ୱବ୍ୟାପୀ ଥିଏଟ୍ରିକାଲ୍ ରିଲିଜ୍ ପାଇଁ ଯୋଜନା କରାଯାଇଛି।

୩. ବାହୁବଳୀ: ଦ ଇଟର୍ନାଲ୍ ୱାର୍ – ପାର୍ଟ ୧:‘ବାହୁବଳୀ’ ଫ୍ରାଞ୍ଚାଇଜ୍ର ଆନିମେଟେଡ୍ ବିସ୍ତାର ହେବାକୁ ଯାଉଛି। ଇଶାନ ଶୁକ୍ଳାଙ୍କ ନିର୍ଦ୍ଦେଶନାରେ ତିଆରି ହେଉଥିବା ଏହି ଦୁଇ ଭାଗର ଗାଥାରେ ଅମରେନ୍ଦ୍ର ବାହୁବଳୀଙ୍କୁ କେନ୍ଦ୍ର କରି ଦେବତା ଓ ଦାନବଙ୍କ ମଧ୍ୟରେ ୧୪ଟି ଲୋକକୁ ନେଇ ଏକ ବିଶାଳ ସଂଘର୍ଷର କାହାଣୀ ରହିଛି। ଫିଲ୍ମଟି ୨୦୨୭ରେ ଆସିବାକୁ ଯାଉଛି।

୪. ଶିବ: ଦ ଆଦିଯୋଗୀ:ଗ୍ରାଫିକ୍ ଇଣ୍ଡିଆ ଓ ସଦ୍ଗୁରୁଙ୍କ ସହଯୋଗରେ ତିଆରି ହେଉଛି ‘ଶିବ: ଦ ଆଦିଯୋଗୀ’। ଏହି ଫିଲ୍ମରେ ଶିବଙ୍କୁ ଆଦିଯୋଗୀ ଓ ପ୍ରଥମ ଯୋଗୀ ଭାବେ ଦର୍ଶାଇବା ସହ ଯୋଗର ଉତ୍ପତ୍ତିକୁ କାହାଣୀର ଅଂଶ କରାଯାଇଛି। ୨୦୨୭ରେ ଏହାର ବିଶ୍ୱବ୍ୟାପୀ ଥିଏଟ୍ରିକାଲ୍ ରିଲିଜ୍ ଯୋଜନା ରହିଛି।

୫. ଚିରଞ୍ଜୀବୀ ହନୁମାନ – ଦ ଇଟର୍ନାଲ୍:ରାମାୟଣ ଓ ପୁରାଣରୁ ପ୍ରେରଣା ନେଇ ଭଗବାନ ହନୁମାନଙ୍କୁ କେନ୍ଦ୍ର କରି ତିଆରି ହେଉଛି ‘ଚିରଞ୍ଜୀବୀ ହନୁମାନ – ଦ ଇଟର୍ନାଲ୍’। ରାଜେଶ ମାପୁସ୍କରଙ୍କ ନିର୍ଦ୍ଦେଶିତ ଏହି ଫିଲ୍ମ ‘Made-in-AI, Made-in-India’ ପ୍ରଯୁକ୍ତି ଆଭିମୁଖ୍ୟରେ ତିଆରି ହେଉଛି। ୨୦୨୬ର ଶେଷ ଭାଗରେ ଏହା ଥିଏଟରକୁ ଆସିବାର ଆଶା ରହିଛି।

ଏହି ଫିଲ୍ମଗୁଡ଼ିକ ମାଧ୍ୟମରେ ଭାରତୀୟ ପୌରାଣିକ କାହାଣୀ ଓ ଚରିତ୍ରଗୁଡ଼ିକୁ ଆନିମେସନ୍ ଏବଂ ନୂଆ ଭିଜୁଆଲ୍ ଟେକ୍ନୋଲୋଜି ସହ ବିଶ୍ୱ ଦର୍ଶକଙ୍କ ପାଖରେ ପହଞ୍ଚାଇବାର ଉଦ୍ୟମ ହେଉଛି।