୨୦୨୬ର ପୋଷ୍ଟ-ମୌସୁମୀ ଋତୁକୁ ନେଇ ବାତ୍ୟା କାର୍ଯ୍ୟକଳାପର ଏକ ଗୁରୁତ୍ୱପୂର୍ଣ୍ଣ ଋତୁକାଳୀନ ଆକଳନ ସାମ୍ନାକୁ ଆସିଛି। ଅକ୍ଟୋବରରୁ ଡିସେମ୍ବର ମଧ୍ୟରେ ଉତ୍ତର ଭାରତ ମହାସାଗରରେ ପ୍ରାୟ ୩ଟି ଟ୍ରପିକାଲ୍ ସାଇକ୍ଲୋନ୍ ସୃଷ୍ଟି ହୋଇପାରେ ବୋଲି ISROର Space Applications Centre ସମ୍ପର୍କିତ ଋତୁକାଳୀନ ଆକଳନରେ ସଙ୍କେତ ମିଳିଛି।

PDIକୁ ନେଇ ଗୁରୁତ୍ୱପୂର୍ଣ୍ଣ ସଙ୍କେତ

ଏହି ଆକଳନରେ Power Dissipation Index (PDI) ମଧ୍ୟ ବିଶେଷ ଗୁରୁତ୍ୱ ବହନ କରୁଛି। ୨୦୨୬ ପୋଷ୍ଟ-ମୌସୁମୀ ଋତୁ ପାଇଁ PDI ପ୍ରାୟ ୧୩.୦୬ × ୧୦⁶ knots³ ରହିପାରେ। ଅନ୍ୟପକ୍ଷରେ ୧୯୮୨ରୁ ୨୦୨୫ ପର୍ଯ୍ୟନ୍ତ ତଥ୍ୟର ହାରାହାରି PDI ପ୍ରାୟ ୭.୧୫ × ୧୦⁶ knots³ ଥିବା ରିପୋର୍ଟ ହୋଇଛି। ଅର୍ଥାତ୍ ଆକଳନ ଅନୁଯାୟୀ ଏହି ଋତୁରେ ସାଇକ୍ଲୋନ୍ କାର୍ଯ୍ୟକଳାପର ସାମଗ୍ରିକ ଶକ୍ତି ସାଧାରଣ ହାରାହାରିଠାରୁ ଅଧିକ ରହିପାରେ।

PDI କ’ଣ?
Power Dissipation Index ହେଉଛି ଟ୍ରପିକାଲ୍ ସାଇକ୍ଲୋନ୍‌ର ସାମଗ୍ରିକ ତୀବ୍ରତା ଓ ଅବଧିକୁ ମିଶାଇ ଏହାର ଶକ୍ତି ବ୍ୟୟକୁ ମାପିବାର ଏକ ସୂଚକ। ସରଳ ଭାବେ କହିଲେ, ବାତ୍ୟାର ସର୍ବାଧିକ ସ୍ଥାୟୀ ପବନର ବେଗ ଯେତେ ଅଧିକ ଏବଂ ବାତ୍ୟା ଯେତେ ଦୀର୍ଘ ସମୟ ରହେ, PDI ସେତେ ବଢ଼ିପାରେ।

ଏହାର ଅର୍ଥ ୧୯୯୯ ମହାବାତ୍ୟାଠାରୁ ବଡ଼ ବାତ୍ୟା ଆସିବ କି?

ଏଠାରେ ଏକ କଥା ସ୍ପଷ୍ଟ ଭାବେ ବୁଝିବା ଜରୁରୀ। PDI ଅଧିକ ରହିବାର ଅର୍ଥ ଏହା ନୁହେଁ ଯେ ୨୦୨୬ରେ ଆସିବାକୁ ଥିବା ପ୍ରତ୍ୟେକ ବାତ୍ୟା ୧୯୯୯ ଓଡ଼ିଶା ମହାବାତ୍ୟାଠାରୁ ଅଧିକ ଶକ୍ତିଶାଳୀ ହେବ। PDI ଏକ ଋତୁକାଳୀନ ସାମଗ୍ରିକ ସୂଚକ। ତେଣୁ ଏହି ଆକଳନରୁ କୌଣସି ନିର୍ଦ୍ଦିଷ୍ଟ ବାତ୍ୟାର ଶକ୍ତି, ଗତିପଥ କିମ୍ବା ଲ୍ୟାଣ୍ଡଫଲ୍ ସ୍ଥାନ ନିର୍ଦ୍ଧାରଣ କରାଯାଇପାରିବ ନାହିଁ।

ଓଡ଼ିଶା ପାଇଁ କେତେ ବିପଦ?

ଉତ୍ତର ଭାରତ ମହାସାଗରରେ ବଙ୍ଗୋପସାଗର ଓ ଆରବ ସାଗର ଦୁଇଟି ପ୍ରମୁଖ ସବ୍-ବେସିନ୍ ରହିଛି। ତେଣୁ ଆକଳନ କରାଯାଇଥିବା ୩ଟି ସାଇକ୍ଲୋନ୍‌ର ସବୁଟି ବଙ୍ଗୋପସାଗରରେ ସୃଷ୍ଟି ହେବ କିମ୍ବା ଓଡ଼ିଶାରେ ଲ୍ୟାଣ୍ଡଫଲ୍ କରିବ—ଏଭଳି କୌଣସି ନିଷ୍କର୍ଷ ଏବେ ନେବା ଠିକ୍ ନୁହେଁ।

ବାତ୍ୟାର ପ୍ରକୃତ ଗତିପଥ, ତୀବ୍ରତା ଓ ଲ୍ୟାଣ୍ଡଫଲ୍ ସମ୍ପର୍କରେ ଅଧିକ ସ୍ପଷ୍ଟତା ସେତେବେଳେ ମିଳିବ, ଯେତେବେଳେ ସମୁଦ୍ରରେ ନିର୍ଦ୍ଦିଷ୍ଟ ଲୋ-ପ୍ରେସର୍ ସିଷ୍ଟମ୍ କିମ୍ବା ଡିପ୍ରେସନ୍ ସୃଷ୍ଟି ହେବ। ସେ ସମୟରେ IMDର ଅପଡେଟ୍ ଓ ଅଲ୍ପମିଆଦୀ ପୂର୍ବାନୁମାନ ଅଧିକ ପ୍ରାସଙ୍ଗିକ ହେବ।