ଆମେରିକାର ମଧ୍ୟସ୍ଥତା ଓ ସହଯୋଗରେ ଇସ୍ରାଏଲ ଏବଂ ଲେବାନନ ମଧ୍ୟରେ ଏକ ଐତିହାସିକ ଢାଞ୍ଚାଗତ (Framework) ଚୁକ୍ତି ସ୍ୱାକ୍ଷରିତ ହୋଇଛି। ଆମେରିକାର ବିଦେଶମନ୍ତ୍ରୀ ମାର୍କୋ ରୁବିଓ ଶୁକ୍ରବାର (ସ୍ଥାନୀୟ ସମୟ) ଏହି ଘୋଷଣା କରି କହିଛନ୍ତି ଯେ, ଏହା ସ୍ଥାୟୀ ଶାନ୍ତି ଓ ସୁରକ୍ଷା ପ୍ରତିଷ୍ଠା ଦିଗରେ ପ୍ରଥମ ପଦକ୍ଷେପ।

ଏହି ଚୁକ୍ତି ଅନୁସାରେ ଉଭୟ ପକ୍ଷ ମଧ୍ୟରେ ଯୁଦ୍ଧବିରତି କାର୍ଯ୍ୟକାରୀ ହେବ। ତେବେ ଏହା ପାଇଁ ହିଜବୁଲ୍ଲାହକୁ ସମସ୍ତ ପ୍ରକାର ଗୁଳିବର୍ଷା ଓ ଆକ୍ରମଣ ବନ୍ଦ କରିବା ସହ ଦକ୍ଷିଣ ଲେବାନନରୁ ପ୍ରତ୍ୟାହାର କରିବାକୁ ହେବ।

ଆମେରିକା ବିଦେଶ ବିଭାଗ ପକ୍ଷରୁ ସାମାଜିକ ମାଧ୍ୟମ 'X'ରେ କୁହାଯାଇଛି ଯେ, ଏହି ଚୁକ୍ତି ଲେବାନନର ସାର୍ବଭୌମ ସରକାର ଓ ଇସ୍ରାଏଲ ସରକାର ମଧ୍ୟରେ ଆମେରିକାର ମଧ୍ୟସ୍ଥତାରେ ସମ୍ପନ୍ନ ହୋଇଛି।

ମାର୍କୋ ରୁବିଓ କହିଛନ୍ତି ଯେ, ଶାନ୍ତିର ପଥ ସହଜ ନୁହେଁ ଏବଂ ଏଥିପାଇଁ ଅନେକ ସମୟ ଓ ପ୍ରୟାସ ଆବଶ୍ୟକ। ତଥାପି ଆଜିର ଏହି ଚୁକ୍ତି ସେହି ଯାତ୍ରାର ପ୍ରଥମ ପଦକ୍ଷେପ। ତାଙ୍କ କହିବା ଅନୁସାରେ, ଉତ୍ତର ଇସ୍ରାଏଲର ଲୋକମାନେ ଦୀର୍ଘଦିନ ଧରି ଲେବାନନ ଭୂଖଣ୍ଡରୁ ହୋଇଆସୁଥିବା ଆକ୍ରମଣ ଯୋଗୁଁ ଅସୁରକ୍ଷିତ ପରିସ୍ଥିତିରେ ବଞ୍ଚୁଥିଲେ।

ସେ କହିଛନ୍ତି ଯେ, ସାଇରେନ ବାଜିଲେ ଛାତ୍ରଛାତ୍ରୀଙ୍କୁ ପାଠପଢ଼ା ବନ୍ଦ କରି ବଙ୍କରକୁ ଦୌଡ଼ିବାକୁ ପଡ଼ୁଥିଲା। ଏପରି ପରିସ୍ଥିତିର ଅବସାନ ଘଟାଇବା ଏହି ଚୁକ୍ତିର ମୂଳ ଲକ୍ଷ୍ୟ ବୋଲି ସେ କହିଛନ୍ତି।

ଆମେରିକାରେ ଲେବାନନର ରାଷ୍ଟ୍ରଦୂତ ନାଦା ହାମାଦେହ ଆଲୋଚନା ସଫଳ କରିଥିବା ସମସ୍ତ ପକ୍ଷଙ୍କୁ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି ଯେ, ରାଷ୍ଟ୍ରପତି ଜୋସେଫ ଆଉନ୍, ପ୍ରଧାନମନ୍ତ୍ରୀ ନୱାଫ ସଲାମ୍, କୂଟନୀତିଜ୍ଞ ଏବଂ ଲେବାନନ ସଶସ୍ତ୍ର ବାହିନୀଙ୍କ ପ୍ରୟାସ ଯୋଗୁଁ ଏହି ଐତିହାସିକ ସଫଳତା ସମ୍ଭବ ହୋଇଛି।

ଆମେରିକାରେ ଇସ୍ରାଏଲର ରାଷ୍ଟ୍ରଦୂତ ୟେଚିଏଲ୍ ଲେଇଟର କହିଛନ୍ତି ଯେ, ଏହି ଚୁକ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ "Peace Through Strength" ନୀତିକୁ ଆଗକୁ ବଢ଼ାଇଛି। ସେ ଇସ୍ରାଏଲ ପ୍ରତିରକ୍ଷା ବାହିନୀ (IDF)ର ସୈନିକମାନଙ୍କ ତ୍ୟାଗ ଓ ସାହସର ମଧ୍ୟ ପ୍ରଶଂସା କରିଛନ୍ତି।

ଆମେରିକା ବିଦେଶ ବିଭାଗ କହିଛି ଯେ, ଇସ୍ରାଏଲ ଓ ଲେବାନନ ଦୁଇଟି ପ୍ରାଚୀନ ସଭ୍ୟତାର ଉତ୍ତରାଧିକାରୀ। କିନ୍ତୁ ଦୀର୍ଘ ଦଶନ୍ଧି ଧରି ଆତଙ୍କବାଦୀ ଗୋଷ୍ଠୀ ଓ ପ୍ରକ୍ସି ସଂଗଠନମାନଙ୍କ କାରଣରୁ ଏହି ଦୁଇ ଦେଶ ସଂଘର୍ଷରେ ଜଡ଼ିତ ରହିଆସିଛନ୍ତି। ନୂଆ ଚୁକ୍ତି ଏହି ପରିସ୍ଥିତିରେ ପରିବର୍ତ୍ତନ ଆଣିବ ବୋଲି ଆଶା କରାଯାଉଛି।