ମଧ୍ୟପ୍ରାଚ୍ୟରେ ଯୁଦ୍ଧବିରତି ପାଇଁ ଜୋରଦାର ପ୍ରୟାସ ଚାଲିଥିବା ସତ୍ତ୍ୱେ ପରିସ୍ଥିତି ସମ୍ପୂର୍ଣ୍ଣ ଶାନ୍ତ ହୋଇନାହିଁ। ହର୍ମୁଜ୍ ପ୍ରଣାଳୀକୁ ପୁନଃ ଖୋଲିବା ପାଇଁ ଆଲୋଚନା ଚାଲିଥିବା ବେଳେ ଇରାନର ଭୂତଳ କ୍ଷେପଣାସ୍ତ୍ର ଭଣ୍ଡାର ଆମେରିକା ଓ ତାହାର ମିତ୍ର ଦେଶମାନଙ୍କ ପାଇଁ ଗୁରୁତର ଚିନ୍ତାର ବିଷୟ ହୋଇଉଠିଛି।

ଆମେରିକୀୟ ଗୁପ୍ତଚର ସଂସ୍ଥାମାନଙ୍କ ଆକଳନ ଅନୁଯାୟୀ, ଆକ୍ରମଣ ସମୟରେ ଇରାନ ଭାରି କ୍ଷତି ସହିଥିଲେ ମଧ୍ୟ ତାହାର କ୍ଷେପଣାସ୍ତ୍ର କ୍ଷମତା ସମ୍ପୂର୍ଣ୍ଣ ନଷ୍ଟ ହୋଇନାହିଁ। ଅନେକ ବାଲିଷ୍ଟିକ୍ କ୍ଷେପଣାସ୍ତ୍ର ଭୂତଳ ଗୁପ୍ତ ସଂରକ୍ଷଣ ସ୍ଥଳରେ ରହିଛି, ଯାହାକୁ ଆବଶ୍ୟକ ହେଲେ ପୁନଃ ସକ୍ରିୟ କରାଯାଇପାରିବ।

ରିପୋର୍ଟ ଅନୁଯାୟୀ, ଆକ୍ରମଣରେ ଇରାନର ଅନେକ କ୍ଷେପଣାସ୍ତ୍ର ଲଞ୍ଚର ନଷ୍ଟ କିମ୍ବା କ୍ଷତିଗ୍ରସ୍ତ ହୋଇଥିଲା, କିନ୍ତୁ ଗଭୀର ଭୂତଳ ସୁଡ଼ଙ୍ଗରେ ରହିଥିବା ବ୍ୟବସ୍ଥାଗୁଡ଼ିକୁ ସମ୍ପୂର୍ଣ୍ଣ ଧ୍ୱଂସ କରିବା ସମ୍ଭବ ହୋଇନାହିଁ। ଏହା ଇରାନକୁ ଆଗାମୀ ସମୟରେ ପୁନଃ ଆକ୍ରମଣ କ୍ଷମତା ଦେଇପାରେ।

ଯୁଦ୍ଧ ପୂର୍ବରୁ ଇରାନ ପାଖରେ ପ୍ରାୟ ୨,୫୦୦ ମଧ୍ୟମ ଦୂରତାର କ୍ଷେପଣାସ୍ତ୍ର ଥିବା ଆକଳନ ଥିଲା, ଯାହାରୁ ଏବେ ବି ୧,୦୦୦ରୁ ଅଧିକ କ୍ଷେପଣାସ୍ତ୍ର ଅବଶିଷ୍ଟ ଥିବା ସମ୍ଭାବନା ରହିଛି।

ଡ୍ରୋନ୍ କ୍ଷମତାରେ କ୍ଷୟ ହୋଇଥିଲେ ମଧ୍ୟ ଇରାନ ରୁଷ ଭଳି ମିତ୍ର ଦେଶରୁ ନୂତନ ପ୍ରଯୁକ୍ତି ଓ ସହଯୋଗ ପାଇପାରେ ବୋଲି ଆମେରିକୀୟ ଅଧିକାରୀମାନେ ଆଶଙ୍କା କରୁଛନ୍ତି।

ଯୁଦ୍ଧ ସମୟରେ ଆମେରିକା ଓ ଇସ୍ରାଏଲ ୧୩,୦୦୦ରୁ ଅଧିକ ଅସ୍ତ୍ରଶସ୍ତ୍ର ବ୍ୟବହାର କରିଥିଲେ ଓ ଇରାନର ଅନେକ ସାମରିକ ସଂସ୍ଥାକୁ ଲକ୍ଷ୍ୟ କରିଥିଲେ। ତଥାପି, ଇରାନର ଆକ୍ରମଣ କ୍ଷମତା ସମ୍ପୂର୍ଣ୍ଣ ଶେଷ ହୋଇନାହିଁ।

ଏହି ପରିସ୍ଥିତି ଆମେରିକା ପାଇଁ ଏକ “କୋକୁଆ ଭୟ” ସୃଷ୍ଟି କରିଛି, ଯାହା ମଧ୍ୟପ୍ରାଚ୍ୟର ସ୍ଥିରତା ଓ ଶାନ୍ତି ପ୍ରକ୍ରିୟାକୁ ପ୍ରଭାବିତ କରୁଛି।