ମଧ୍ୟପ୍ରାଚ୍ୟରେ ଇରାନ ଓ ଆମେରିକା ମଧ୍ୟରେ ବଢ଼ୁଥିବା ଉତ୍ତେଜନା ଏବେ ଏକ ବଡ଼ ସାମରିକ ସଂଘର୍ଷର ରୂପ ନେଇଛି। ମଙ୍ଗଳବାର ପ୍ରତ୍ୟୁଷରେ ଇରାନ ସେନା କୁଏତରେ ଥିବା ଆମେରିକାର ପ୍ରମୁଖ ସାମରିକ ଘାଟି 'କ୍ୟାମ୍ପ ଆରିଫଜାନ' ଉପରେ କ୍ଷେପଣାସ୍ତ୍ର ଆକ୍ରମଣ କରିଥିବା ଦାବି କରିଛି।

ଆକ୍ରମଣ ପରେ ଇରାନର ରାଷ୍ଟ୍ରପତି ମାସୁଦ ପେଜେଶକିୟାନ କହିଛନ୍ତି ଯେ, ଇରାନ ଏବେ ଆମେରିକା ବିରୋଧରେ ପୂର୍ଣ୍ଣାଙ୍ଗ ଯୁଦ୍ଧରେ ସାମିଲ ହୋଇଛି। ଦେଶବାସୀଙ୍କୁ ସମ୍ବୋଧିତ କରି ସେ କହିଛନ୍ତି, ବର୍ତ୍ତମାନ ପଛକୁ ଫେରିବାର କୌଣସି ସୁଯୋଗ ନାହିଁ ଏବଂ ଦେଶକୁ ଯେକୌଣସି ପରିସ୍ଥିତି ପାଇଁ ପ୍ରସ୍ତୁତ ରହିବାକୁ ପଡ଼ିବ।

ଇରାନର ସରକାରୀ ସମାଚାର ସଂସ୍ଥା ଆଇଆରଏନଏ (IRNA) ଅନୁଯାୟୀ, ଦକ୍ଷିଣ କୁଏତରେ ଥିବା ଏହି ଆମେରିକୀୟ ଘାଟିକୁ ଟାର୍ଗେଟ କରିବା ସହ ଆମେରିକାର ଆଧୁନିକ ହିମାର୍ସ (HIMARS) କ୍ଷେପଣାସ୍ତ୍ର ପ୍ରଣାଳୀକୁ ମଧ୍ୟ ଲକ୍ଷ୍ୟ କରାଯାଇଥିଲା। ଇରାନ ଦାବି କରିଛି ଯେ, ଏହି ଆକ୍ରମଣରେ ଆମେରିକାର କ୍ଷେପଣାସ୍ତ୍ର କ୍ଷମତାକୁ କ୍ଷତି ପହଞ୍ଚିଛି।

ଅନ୍ୟପଟେ କୁଏତ ସରକାର ଏହି ଆକ୍ରମଣକୁ କଡ଼ା ନିନ୍ଦା କରିବା ସହ ଦେଶର ବାୟୁ ପ୍ରତିରକ୍ଷା ବ୍ୟବସ୍ଥାକୁ ସତର୍କ ଅବସ୍ଥାରେ ରଖିଛି।

ଏହି ଆକ୍ରମଣ ପରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ କଡ଼ା ପ୍ରତିକ୍ରିୟା ଦେଇଛନ୍ତି। ସେ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ଲେଖିଛନ୍ତି ଯେ, ଯଦି କୌଣସି ଆମେରିକୀୟ ସୈନିକଙ୍କ କ୍ଷତି ହୁଏ, ତେବେ ଇରାନକୁ ତାହାର ଗୁରୁତର ପରିଣାମ ଭୋଗିବାକୁ ପଡ଼ିବ। ସେ ଇରାନର ବିଦ୍ୟୁତ୍ କେନ୍ଦ୍ର ଓ ପ୍ରମୁଖ ସେତୁଗୁଡ଼ିକୁ ଲକ୍ଷ୍ୟ କରାଯାଇପାରେ ବୋଲି ମଧ୍ୟ ଚେତାବନୀ ଦେଇଛନ୍ତି।

ଏପରିସ୍ଥିତିରେ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ତୈଳ ପରିବହନ ମାର୍ଗ ହର୍ମୁଜ୍ ପ୍ରଣାଳୀ ଉପରେ ଇରାନ ନିଜର ନିୟନ୍ତ୍ରଣକୁ ଆହୁରି କଡ଼ା କରିଛି। ଏହା ଫଳରେ ତୈଳ ଓ ପ୍ରାକୃତିକ ଗ୍ୟାସ୍ ଯୋଗାଣ ବାଧାପ୍ରାପ୍ତ ହେବାର ଆଶଙ୍କା ବଢ଼ିଛି।

ଗତ ସପ୍ତାହରେ ଆମେରିକା ଇରାନର ତୈଳ ରପ୍ତାନିକୁ ଅଟକାଇବା ପାଇଁ ସମୁଦ୍ରପଥରେ କଡ଼ା ନଜରଦାରି କରିଥିଲା। ଆମେରିକୀୟ ସେନା ଅନୁଯାୟୀ, ଏପର୍ଯ୍ୟନ୍ତ ସାତଟି ଇରାନୀ ଜାହାଜକୁ ସ୍ଥାନାନ୍ତର କରାଯାଇଛି। ବର୍ତ୍ତମାନ ହର୍ମୁଜ୍ ପ୍ରଣାଳୀ ଦେଇ ବାଣିଜ୍ୟିକ ପରିବହନ ପ୍ରାୟ ଠପ୍ ହୋଇଯାଇଥିବାରୁ ବିଶ୍ୱ ତୈଳ ବଜାରରେ ଅନିଶ୍ଚିତତା ବଢ଼ିଛି।