ଇରାନର ପୂର୍ବତନ ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ଅନ୍ତିମ ସଂସ୍କାରର କିଛି ଘଣ୍ଟା ପରେ ଦେଶର ବିଭିନ୍ନ ଅଞ୍ଚଳରେ ବିସ୍ଫୋରଣ ଶବ୍ଦ ଶୁଣାଯିବାରୁ ପୁଣିଥରେ ମଧ୍ୟପ୍ରାଚ୍ୟରେ ଉତ୍ତେଜନା ବଢ଼ିଛି। ଗୁରୁବାର ବିଳମ୍ବିତ ରାତିରେ ପରମାଣୁ କେନ୍ଦ୍ର ପାଇଁ ପରିଚିତ ବୁଶେହର, ନିକଟସ୍ଥ ଚୋଘଡାକ ଏବଂ ଦକ୍ଷିଣ ଇରାନର କୋନାରାକ ଅଞ୍ଚଳରେ ଏକାଧିକ ବିସ୍ଫୋରଣ ଘଟିଥିବା ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି।

ତେବେ ଏହି ବିସ୍ଫୋରଣକୁ ନେଇ ଆମେରିକାର ସଂପୃକ୍ତି ଥିବା ଚର୍ଚ୍ଚାକୁ ଖଣ୍ଡନ କରିଛି ଆମେରିକା ସେଣ୍ଟ୍ରାଲ କମାଣ୍ଡ (CENTCOM)। ସେଣ୍ଟକମ୍ ପକ୍ଷରୁ କୁହାଯାଇଛି ଯେ ଗତ କିଛି ଘଣ୍ଟା ମଧ୍ୟରେ ଇରାନ ଉପରେ କୌଣସି ସାମରିକ ଆକ୍ରମଣ କରାଯାଇନାହିଁ।

ମେହର ନ୍ୟୁଜ୍ ଏଜେନ୍ସି ବିସ୍ଫୋରଣର କାରଣ, କ୍ଷୟକ୍ଷତି କିମ୍ବା ମୃତାହତଙ୍କ ସମ୍ପର୍କରେ କୌଣସି ସ୍ପଷ୍ଟ ସୂଚନା ଦେଇନାହିଁ। ପୂର୍ବରୁ ବନ୍ଦର ଆବାସରେ ବିସ୍ଫୋରଣ ଘଟିଥିବା ଖବରକୁ ମଧ୍ୟ ସଂସ୍ଥା ପରେ ଅସ୍ୱୀକାର କରିଛି।

ବୁଶେହରର ରାଜନୈତିକ ଓ ସୁରକ୍ଷା ବ୍ୟାପାର ବିଭାଗର ଉପ-ରାଜ୍ୟପାଳ ଏହସାନ ଜାହାନିୟାନ କହିଛନ୍ତି ଯେ ବିସ୍ଫୋରଣର ଶବ୍ଦ ବାୟୁ ପ୍ରତିରକ୍ଷା ପ୍ରଣାଳୀ ସକ୍ରିୟ ହେବା ଫଳରେ ହୋଇଥିଲା। ସେ କହିଛନ୍ତି ଯେ ବୁଶେହର ଉପକଣ୍ଠରେ ଥିବା ଏକ ସାମରିକ ସ୍ଥାପନା ଉପରେ ପ୍ରୋଜେକ୍ଟାଇଲ୍ ମାଡ଼ କରାଯାଇଥିଲା।

ଏପଟେ ବିସ୍ଫୋରଣ ଘଟଣା ପରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ କହିଛନ୍ତି ଯେ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଟେଲିଫୋନ୍ ଯୋଗେ ଆଲୋଚନା କରିଛନ୍ତି। ଦୁଇ ଦେଶ ଭବିଷ୍ୟତରେ ସୁରକ୍ଷା ଓ ସାମରିକ କ୍ଷେତ୍ରରେ ସମନ୍ୱୟ ବଜାୟ ରଖିବାକୁ ସହମତ ହୋଇଛନ୍ତି।

ଦକ୍ଷିଣ ଇସ୍ରାଏଲର ହାଟଜେରିମ୍ ବାୟୁସେନା ଘାଟିରେ ଆୟୋଜିତ ଏକ ସମାରୋହରେ ନେତାନ୍ୟାହୁ କହିଛନ୍ତି ଯେ ଇରାନ ସହ ସଂଘର୍ଷ ଏପର୍ଯ୍ୟନ୍ତ ଶେଷ ହୋଇନାହିଁ ଏବଂ ନୂଆ ସୁରକ୍ଷା ଚ୍ୟାଲେଞ୍ଜ ରହିଛି। ଇସ୍ରାଏଲ ସେନା ମୁଖ୍ୟ ଇୟାଲ ଜମିର୍ ମଧ୍ୟ କହିଛନ୍ତି ଯେ ଇରାନ ବିରୋଧୀ ସାମରିକ ଅଭିଯାନ ଏବେ ବି ସମାପ୍ତ ହୋଇନାହିଁ।

ଏହି ମଧ୍ୟରେ ଇସ୍ରାଏଲର ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଜ୍ କହିଛନ୍ତି ଯେ ଆବଶ୍ୟକ ହେଲେ ଇରାନ ବିରୋଧରେ ପୁଣିଥରେ ସାମରିକ କାର୍ଯ୍ୟାନୁଷ୍ଠାନ ନେବାକୁ ତାଙ୍କ ଦେଶ ପ୍ରସ୍ତୁତ ରହିଛି।

ସୂଚନାଯୋଗ୍ୟ, ହର୍ମୁଜ୍ ପ୍ରଣାଳୀରେ ବାଣିଜ୍ୟିକ ଜାହାଜ ଉପରେ ଆକ୍ରମଣକୁ କେନ୍ଦ୍ର କରି ଆମେରିକା ଓ ଇରାନ ମଧ୍ୟରେ ପୁଣିଥରେ ଉତ୍ତେଜନା ବଢ଼ିଥିଲା। ଯୁଦ୍ଧବିରତି ଚୁକ୍ତି ସତ୍ତ୍ୱେ ଉଭୟ ଦେଶ ପରସ୍ପର ବିରୋଧରେ କଠୋର ଅବସ୍ଥାନ ଜାରି ରଖିଛନ୍ତି।