ଆଫଗାନିସ୍ତାନର ସାଧାରଣ ଲୋକଙ୍କ ପାଇଁ ଭାରତ ପୁଣିଥରେ ମାନବିକ ସହାୟତାର ହାତ ବଢ଼ାଇଛି। ପାକିସ୍ତାନରୁ ନିଜ ଦେଶକୁ ଫେରୁଥିବା ଶରଣାର୍ଥୀଙ୍କ ରହିବା ଏବଂ ପୁନର୍ବାସକୁ ସହଜ କରିବା ପାଇଁ ଭାରତ ସରକାର ଆଫଗାନିସ୍ତାନକୁ ବହୁ ସଂଖ୍ୟାରେ ତମ୍ବୁ (Tents) ପଠାଇଛନ୍ତି।

ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ ସୋସିଆଲ ମିଡିଆ ପ୍ଲାଟଫର୍ମ'ଏକ୍ସ' (X)ରେ ଏହି ସୂଚନା ଦେଇଛି। ମନ୍ତ୍ରଣାଳୟ କହିଛି ଯେ, ଆଫଗାନିସ୍ତାନର ଲୋକଙ୍କ ପ୍ରତି ଭାରତର ମାନବିକ ସହାୟତା ଜାରି ରହିଛି। ଏହି ସହାୟତା ଅଧୀନରେ ଆଫଗାନିସ୍ତାନର ଶରଣାର୍ଥୀ ଏବଂ ପୁନର୍ବାସ ମନ୍ତ୍ରଣାଳୟକୁ ପରିବାରଗୁଡ଼ିକ ପାଇଁ ତମ୍ବୁ ହସ୍ତାନ୍ତର କରାଯାଇଛି।

ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ ହେଉଛି ପାକିସ୍ତାନରୁ ଫେରୁଥିବା ଆଫଗାନ ଶରଣାର୍ଥୀଙ୍କୁ ଅସ୍ଥାୟୀ ବାସସ୍ଥାନ ଯୋଗାଇବା ଏବଂ ସେମାନଙ୍କ ପୁନର୍ବାସ ପ୍ରକ୍ରିୟାକୁ ସହଜ କରିବା।

ବର୍ତ୍ତମାନ ପାକିସ୍ତାନରୁ ବହୁ ସଂଖ୍ୟାରେ ଆଫଗାନ ନାଗରିକ ନିଜ ଦେଶକୁ ଫେରୁଛନ୍ତି। ପାକିସ୍ତାନ ସରକାର ବୈଧ ଦଲିଲ ନଥିବା ପ୍ରବାସୀ ଏବଂ ଶରଣାର୍ଥୀଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ତୀବ୍ର କରିଛନ୍ତି। ବୈଧ ଭିସା ନଥିବା ଲୋକଙ୍କୁ ଜୁଲାଇ ୧୦ ସୁଦ୍ଧା ସ୍ୱଇଚ୍ଛାରେ ଦେଶ ଛାଡ଼ିବାକୁ ସମୟ ଦିଆଯାଇଥିଲା। ସମୟସୀମା ଶେଷ ହେବା ପରେ କଡ଼ା ପଦକ୍ଷେପ ଗ୍ରହଣ କରାଯାଉଛି।

ରିପୋର୍ଟ ଅନୁସାରେ, ଗତ ସପ୍ତାହରେ କେବଳ ୨୪ ଘଣ୍ଟା ମଧ୍ୟରେ ୪,୦୦୦ରୁ ଅଧିକ ଆଫଗାନ ନାଗରିକଙ୍କୁ ପାକିସ୍ତାନରୁ ଫେରାଇ ଦିଆଯାଇଛି। ପାକିସ୍ତାନୀ ଖବରକାଗଜ'ଡନ୍'ଅନୁସାରେ, ଲାଣ୍ଡି କୋଟାଲ ସ୍ଥିତ ହାମଜା ବାବା ଟ୍ରାଞ୍ଜିଟ୍ ପଏଣ୍ଟରେ ପ୍ରତିଦିନ ୧୦,୦୦୦ରୁ ଅଧିକ ଲୋକ ଆଫଗାନିସ୍ତାନକୁ ଫେରୁଛନ୍ତି।

ଏହି ପରିସ୍ଥିତିକୁ ନେଇ ଜାତିସଂଘ ଶରଣାର୍ଥୀ ଉଚ୍ଚାୟୁକ୍ତ (UNHCR) ମଧ୍ୟ ଚିନ୍ତା ପ୍ରକାଶ କରିଛି। ସଂସ୍ଥାର ମୁଖପାତ୍ର କୈସର ଖାନ୍ ଆଫ୍ରିଦି କହିଛନ୍ତି ଯେ, ଶରଣାର୍ଥୀଙ୍କୁ ଜବରଦସ୍ତି ଫେରାଇବା ଗମ୍ଭୀର ବିଷୟ। ବିଶେଷକରି ମହିଳା ଓ ଶିଶୁମାନଙ୍କ ସୁରକ୍ଷା ଏବଂ ମାନବାଧିକାରକୁ ନେଇ ଚିନ୍ତା ବଢ଼ିଛି।

ଏପରି ମାନବିକ ସଙ୍କଟ ସମୟରେ ଭାରତର ଏହି ସହାୟତା ଆଫଗାନିସ୍ତାନର ସାଧାରଣ ଲୋକଙ୍କ ପାଇଁ ବଡ଼ ଆଶ୍ୱସ୍ତି ଆଣିଛି।