ହର୍ମୁଜ୍ ସ୍ଟ୍ରେଟ୍‌ରେ ବୁଧବାର ଇରାନର ଇସ୍ଲାମିକ ରେଭଲୁଶନାରୀ ଗାର୍ଡ କର୍ପ୍ସ (IRGC) ଦୁଇଟି ବିଦେଶୀ ଝଣ୍ଡାବାହୀ କାର୍ଗୋ ଜାହାଜକୁ ଆକ୍ରମଣ କରି ଜବତ କରିଥିବା ଖବର ମିଳିଛି। ଏହା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦ୍ୱାରା ଦୁଇ ସପ୍ତାହର ବିରତି ବଢ଼ାଇବା ଘୋଷଣା ପରେ ଘଟିଛି।

ଜବତ ହୋଇଥିବା ଦୁଇଟି ଜାହାଜ ହେଉଛି ପାନାମା ଝଣ୍ଡାବାହୀ ‘MSC Francesca’ ଓ ଲିବେରିଆ ଝଣ୍ଡାବାହୀ ‘Epaminodes’। ଏହି ଦୁଇଟି ଜାହାଜକୁ ଇରାନ ନିଜ ନିୟନ୍ତ୍ରଣରେ ନେଇ ଦେଶଭିତରକୁ ନେଇଯାଇଛି ବୋଲି ରାଷ୍ଟ୍ରୀୟ ଟିଭି ସୂଚନା ଦେଇଛି। ତୃତୀୟ ଜାହାଜ ‘Euphoria’ ଉପରେ ମଧ୍ୟ ଲକ୍ଷ୍ୟବାଣ ହୋଇଥିବା ଓ ସେହି ଜାହାଜ ବର୍ତ୍ତମାନ ଇରାନ କୂଳରେ ଅଟକି ରହିଛି।

ମାରିଟାଇମ୍ ଟ୍ରାଫିକ ତଥ୍ୟ ଅନୁଯାୟୀ, ‘Epaminodes’ ଦୁବାଇରୁ ଗୁଜରାଟର ମୁନ୍ଦ୍ରା ବନ୍ଦରକୁ ଯାଉଥିଲା। ଇରାନ ନୌସେନା କହିଛି ଯେ ଜାହାଜଗୁଡ଼ିକ ପ୍ରୟୋଜନୀୟ ଅନୁମତି ବିନା ଯାଉଥିଲେ ଓ ନେଭିଗେସନ୍ ପ୍ରଣାଳୀକୁ ମାନିପୁଲେଟ୍ କରି ସମୁଦ୍ର ସୁରକ୍ଷାକୁ ବିପଦରେ ପକାଇଥିଲେ।

ଏହା ପୂର୍ବରୁ, ଗତ ସପ୍ତାହରେ ଭାରତୀୟ ଝଣ୍ଡାବାହୀ ଦୁଇଟି ଜାହାଜ ଉପରେ ମଧ୍ୟ ଆକ୍ରମଣ ହୋଇଥିଲା। ହର୍ମୁଜ୍ ସ୍ଟ୍ରେଟ୍ ଏକ ମୁଖ୍ୟ ଉର୍ଜା ମାର୍ଗ ଥିବାରୁ ଏଠାରେ ତଣାପୋଡ଼ ବୃଦ୍ଧି ପାଇଲେ ତେଲ ଯୋଗାଣ ଓ ଦାମରେ ପ୍ରଭାବ ପଡ଼ିପାରେ।

ଏହି ଘଟଣାକୁ ଆମେରିକା ନୌସେନା ଦ୍ୱାରା ଗଲ୍ଫ ଅଫ୍ ଓମାନ୍ ନିକଟରେ ଦୁଇଟି ଇରାନୀ ଝଣ୍ଡାବାହୀ ଜାହାଜ ଜବତ କରାଯିବାର ପ୍ରତିଶୋଧମୂଳକ ପଦକ୍ଷେପ ଭାବେ ଦେଖାଯାଉଛି। ଆମେରିକା ଦ୍ୱାରା ଇରାନୀ ବନ୍ଦରଗୁଡ଼ିକୁ ନୌ-ନିଷେଧ ଜାରି ରହିବାକୁ ଟ୍ରମ୍ପ ସ୍ପଷ୍ଟ କରିଛନ୍ତି।