ପାକିସ୍ତାନରେ ଇମ୍ରାନ୍ ଖାନଙ୍କୁ ନେଇ ରାଜନୈତିକ ତଣାପୋଡ଼ ମଧ୍ୟରେ ତାଙ୍କ ଭଉଣୀ ଆଲିମା ଖାନଙ୍କୁ ପୋଲିସ ଗିରଫ କରିଛି। ରବିବାର ଲାହୋରସ୍ଥିତ ତାଙ୍କ ବାସଭବନରୁ ତାଙ୍କୁ ହାଜତକୁ ନିଆଯାଇଥିବା PTI ପକ୍ଷରୁ କୁହାଯାଇଛି।

ଏହି ଗିରଫ ଏପରି ସମୟରେ ହୋଇଛି, ଯେତେବେଳେ ଇମ୍ରାନ୍ ଖାନଙ୍କ ମୁକ୍ତି ଦାବିରେ ତାଙ୍କ ଦଳ Pakistan Tehreek-e-Insaf (PTI) ସେପ୍ଟେମ୍ବର ୨୭ରେ ଏକ ବଡ଼ ବିକ୍ଷୋଭ ମାର୍ଚ୍ଚ ଆୟୋଜନ କରିବାକୁ ଯୋଜନା କରିଛି।

ରଏଟର୍ସ ଅନୁଯାୟୀ, ଆଲିମାଙ୍କ ଗିରଫ ସମ୍ପର୍କରେ PTIର ପଞ୍ଜାବ ମୁଖପାତ୍ର ସୂଚନା ଦେଇଥିଲେ। ତେବେ ଗିରଫ ସମୟରେ ସରକାରୀ ମୁଖପାତ୍ର ଓ ପୋଲିସ ପକ୍ଷରୁ ରଏଟର୍ସର ମତାମତ ଅନୁରୋଧର ତତ୍କାଳ ଉତ୍ତର ମିଳିନଥିଲା।

ଭାରତ ଟୁଡେ ରିପୋର୍ଟ ଅନୁସାରେ, ଆଲିମା ଖାନଙ୍କୁ Punjab Maintenance of Public Order Ordinance, 1960 ଅଧୀନରେ ୩୦ ଦିନ ପାଇଁ ହାଜତରେ ରଖାଯାଇଛି ଏବଂ ତାଙ୍କୁ Kot Lakhpat Jailକୁ ସ୍ଥାନାନ୍ତର କରାଯାଇଥିବା ସୂଚନା ମିଳିଛି।

ଏହା ସହିତ ଇସଲାମାବାଦରେ ମଧ୍ୟ PTIର କିଛି କାର୍ଯ୍ୟକର୍ତ୍ତାଙ୍କୁ ପୋଲିସ ହାଜତକୁ ନେଇଥିବା ଡନ୍ ରିପୋର୍ଟ କରିଛି। ପୋଲିସ କହିଛି ଯେ ଏହି ଗିରଫଗୁଡ଼ିକ ଭିନ୍ନ ଅଭିଯୋଗ ଆଧାରରେ କରାଯାଇଛି।

ସେପ୍ଟେମ୍ବର ୨୭ର ବିକ୍ଷୋଭକୁ ଦୃଷ୍ଟିରେ ରଖି ଇସଲାମାବାଦ ପୋଲିସ ଓ ପ୍ରଶାସନ ସୁରକ୍ଷା ବ୍ୟବସ୍ଥା ନେଇ ପ୍ରସ୍ତୁତି ଆରମ୍ଭ କରିଛି। ଡନ୍ ଅନୁଯାୟୀ, ଗେଷ୍ଟ ହାଉସ୍, ବସ୍ ଟର୍ମିନାଲ୍ ଏବଂ ପ୍ରଦର୍ଶନକାରୀଙ୍କ ପାଇଁ ଖାଦ୍ୟ, ପାଣି, ରହିବା ଓ ପରିବହନ ବ୍ୟବସ୍ଥା କରିପାରୁଥିବା ସଂସ୍ଥା ଉପରେ ମଧ୍ୟ ନଜର ରଖାଯାଉଛି।

PTI ଇମ୍ରାନ୍ ଖାନଙ୍କ ମୁକ୍ତି ଦାବିରେ ଆନ୍ଦୋଳନ ପାଇଁ ପ୍ରସ୍ତୁତି ବଢ଼ାଇଥିବା ଡନ୍ ମଧ୍ୟ ରିପୋର୍ଟ କରିଛି।