ହଙ୍ଗେରୀରେ ଏକ ଚାଞ୍ଚଲ୍ୟକର ଏବଂ ଅତ୍ୟନ୍ତ ଅସ୍ୱାଭାବିକ ମାମଲା ସାମ୍ନାକୁ ଆସିଛି। ଜଣେ ୩୦ ବର୍ଷ ବୟସ୍କ ହସ୍ପିଟାଲ କର୍ମଚାରୀଙ୍କୁ ନରଭକ୍ଷୀ ଅଭିଯୋଗରେ ଗିରଫ କରିଛି ହଙ୍ଗେରୀ ପୁଲିସ। ଅଭିଯୋଗ ଅନୁଯାୟୀ, ସେ ହସ୍ପିଟାଲରୁ ମୃତ ମାନବ ଶରୀରର ଅଂଶ ଚୋରି କରି ନିଜ ଆପାର୍ଟମେଣ୍ଟରେ ରଖୁଥିଲେ ଏବଂ ସେଥିରୁ କିଛି ଅଂଶ ରାନ୍ଧି ଖାଉଥିଲେ।

ସନ୍ଦିଗ୍ଧ ବ୍ୟକ୍ତି ଜଣକ ହସ୍ପିଟାଲରେ ରୋଗୀ ପରିବହନକାରୀ ଭାବେ କାର୍ଯ୍ୟରତ ଥିବା ଜଣାପଡ଼ିଛି। ତାଙ୍କୁ ହଙ୍ଗେରୀର ଜାତୀୟ ତଦନ୍ତ ବ୍ୟୁରୋ ଗିରଫ କରି ହେପାଜତକୁ ନେଇଛି।

ତଦନ୍ତକାରୀମାନଙ୍କ କହିବା ଅନୁଯାୟୀ, ଗତ ସପ୍ତାହରେ ତାଙ୍କ ଆପାର୍ଟମେଣ୍ଟରେ କରାଯାଇଥିବା ତଲାସୀ ସମୟରେ ମାନବ ଶରୀରର ବିଭିନ୍ନ ଅଙ୍ଗ ଜବତ କରାଯାଇଥିଲା। ଜବତ ସାମଗ୍ରୀ ମଧ୍ୟରେ ମାନବ ମୁଖର ଅଂଶ, ଚର୍ମ, ତଳ ଗୋଡ, ମସ୍ତିଷ୍କ, ହାତ, ଏକାଧିକ ଖପୁରୀ, ସୁଟକେସ୍ରେ ରଖାଯାଇଥିବା ହାଡ଼ ଏବଂ ଏକ ଜାର୍ରେ ସଂରକ୍ଷିତ ହୃଦୟ ରହିଥିବା ସୂଚନା ମିଳିଛି।

ଫରେନସିକ୍ ବିଶେଷଜ୍ଞମାନେ ଜାର୍ରେ ମିଳିଥିବା ହୃଦୟଟି ମଣିଷର ନା ପଶୁର ତାହା ନିର୍ଣ୍ଣୟ କରିବା ପାଇଁ ପରୀକ୍ଷା କରୁଛନ୍ତି।

ପଚରାଉଚରା ବେଳେ ଅଭିଯୁକ୍ତ ସ୍ୱୀକାର କରିଛନ୍ତି ଯେ, ତାଙ୍କର ମାନବ ଶରୀରର କିଛି ଅଂଶ ଖାଇବା ପ୍ରତି ଆଗ୍ରହ ଥିଲା। ସେ କିଛି ଅବଶେଷକୁ ରାନ୍ଧି ଖାଇଥିବା କଥା ମଧ୍ୟ ତଦନ୍ତକାରୀଙ୍କୁ କହିଛନ୍ତି।

ପୁଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତଙ୍କର ମାନବ ଶରୀର ଗଠନ ବିଜ୍ଞାନ (ଆନାଟୋମି) ଏବଂ ରୋଗବିଜ୍ଞାନ (ପାଥୋଲୋଜି) ପ୍ରତି ଦୀର୍ଘଦିନ ଧରି ଆଗ୍ରହ ଥିଲା। ସେ ପ୍ରାଣୀମାନଙ୍କ ବ୍ୟବଚ୍ଛେଦ କାର୍ଯ୍ୟରେ ମଧ୍ୟ ରୁଚି ରଖୁଥିବା ସୂଚନା ମିଳିଛି।

ତଦନ୍ତକାରୀମାନଙ୍କ ସନ୍ଦେହ ଯେ, ଜବତ ହୋଇଥିବା ମାନବ ଅବଶେଷଗୁଡ଼ିକ ଅଭିଯୁକ୍ତ କାର୍ଯ୍ୟ କରୁଥିବା ହସ୍ପିଟାଲ କିମ୍ବା ହଙ୍ଗେରୀ ଏବଂ ପଡ଼ୋଶୀ ସ୍ଲୋଭାକିଆର କିଛି ପରିତ୍ୟକ୍ତ ଶ୍ମଶାନରୁ ଚୋରି କରାଯାଇଥାଇପାରେ।

ବର୍ତ୍ତମାନ ମୃତଦେହର ଅଂଶଗୁଡ଼ିକ କେଉଁ ବ୍ୟକ୍ତିଙ୍କର ତାହା ଚିହ୍ନଟ କରିବାକୁ ପ୍ରୟାସ ଚାଲିଛି। ଏହାସହ ଅଧିକ ତଦନ୍ତ ପାଇଁ ପୁଲିସ ଅଭିଯୁକ୍ତଙ୍କ କମ୍ପ୍ୟୁଟର, ଲାପଟପ୍, ମୋବାଇଲ ଫୋନ୍, ସିମ୍ କାର୍ଡ ଓ ଅନ୍ୟାନ୍ୟ ଡିଜିଟାଲ ଉପକରଣ ଜବତ କରିଛି। ଘଟଣାର ତଦନ୍ତ ଜାରି ରହିଛି।