କନ୍ଧମାଳ: ଗଞ୍ଜାମ-କନ୍ଧମାଳ ସୀମାନ୍ତ ଗିଡ଼ିପାବଳି ଗାଁରେ ଭୂସ୍ଖଳନ ଦୁର୍ଘଟଣାକୁ ନେଇ ଆସିଛି ଆଉ ଏକ ଦୁଃଖଦ ଖବର। ଦୀର୍ଘ ୬ ଦିନ ଧରି ଚାଲିଥିବା ଉଦ୍ଧାର କାର୍ଯ୍ୟରେ ଆଉ ୫ ଜଣଙ୍କ ମୃତଦେହ ଉଦ୍ଧାର ହୋଇଛି। ଏହା ସହ ଏହି ଭୟାବହ ଭୂସ୍ଖଳନରେ ମୃତ୍ୟୁସଂଖ୍ୟା ୭କୁ ବୃଦ୍ଧି ପାଇଛି। ଉଦ୍ଧାର ହୋଇଥିବା ସମସ୍ତ ୫ ଜଣ ଗୋଟିଏ ପରିବାରର ସଦସ୍ୟ ବୋଲି ଜଣାପଡ଼ିଛି।

ନଭେମ୍ବର ୫ ତାରିଖରେ କନ୍ଧମାଳ ଜିଲ୍ଲାପାଳ ବେଦଭୂଷଣ ଏହି ସୂଚନା ଦେଇଛନ୍ତି। ଲଗାତାର ଷଷ୍ଠ ଦିନରେ ଚାଲିଥିବା ସର୍ଚ୍ଚ ଅପରେସନ୍ ସମୟରେ ଏହି ମୃତଦେହଗୁଡ଼ିକୁ ଉଦ୍ଧାର କରାଯାଇଛି।

ଘଟଣାସ୍ଥଳରେ ହେବ ଶେଷକୃତ୍ୟ:

ମୃତକଙ୍କ ପରିବାର ସଦସ୍ୟମାନେ ମୃତଦେହ ଉଦ୍ଧାର ସମୟରେ ଘଟଣାସ୍ଥଳରେ ଉପସ୍ଥିତ ଥିଲେ। ପରିବାରର ଇଚ୍ଛା ଏବଂ ସହମତିକୁ ସମ୍ମାନ ଜଣାଇ ଜିଲ୍ଲା ପ୍ରଶାସନ ପକ୍ଷରୁ ଘଟଣାସ୍ଥଳରେ ହିଁ ୫ ଜଣଙ୍କ ଶେଷକୃତ୍ୟ ସମ୍ପନ୍ନ କରିବାର ବ୍ୟବସ୍ଥା କରାଯାଇଛି।

ଜିଲ୍ଲାପାଳ କହିଛନ୍ତି ଯେ, ଶେଷକୃତ୍ୟ ସମ୍ପନ୍ନ କରିବାର ସମସ୍ତ ଦାୟିତ୍ୱ ପ୍ରଶାସନ ନେଇଛି। ଏଥିସହ ମୃତକଙ୍କ ପରିବାର ପ୍ରତି ଗଭୀର ସମବେଦନା ଜଣାଇଛନ୍ତି। ଅନ୍ୟପଟେ ଉଦ୍ଧାର ଓ ରିଲିଫ୍ କାର୍ଯ୍ୟ ବନ୍ଦ ହେବ ନାହିଁ। ଆଗକୁ ମଧ୍ୟ ସର୍ଚ୍ଚ ଅପରେସନ୍ ଜାରି ରହିବ ବୋଲି ପ୍ରଶାସନ ସ୍ପଷ୍ଟ କରିଛି।

ଅକ୍ଟୋବର ୨୮ରେ ଘଟିଥିଲା ଭୟଙ୍କର ଭୂସ୍ଖଳନ:

ସୂଚନା ଅନୁସାରେ, ଅକ୍ଟୋବର ୨୮ ତାରିଖରେ ବାତ୍ୟା ଅର୍ଣ୍ଣବ ପ୍ରଭାବରେ ହୋଇଥିବା ପ୍ରବଳ ବର୍ଷା ପରେ ଏହି ଭୂସ୍ଖଳନ ଘଟିଥିଲା। ଗଞ୍ଜାମ ଜିଲ୍ଲାର ଭଞ୍ଜନଗର ବ୍ଲକ୍ ଅନ୍ତର୍ଗତ ବାଇବାଲି ପଞ୍ଚାୟତର ଗିଡ଼ିପାବଳି ଗାଁରେ ପାହାଡ଼ ଉପରୁ ବଡ଼ ବଡ଼ ପଥର, ମାଟି ଏବଂ ଉପୁଡ଼ି ପଡ଼ିଥିବା ଗଛ ତଳକୁ ଖସି ଆସିଥିଲା।

ଏହି ଭୂସ୍ଖଳନରେ ଅନେକ ଘର ଭାଙ୍ଗିଯିବା ସହ ଘର ଭିତରେ ଥିବା ଲୋକମାନେ ମାଟି ଓ ପଥର ତଳେ ଚାପି ହୋଇ ରହିଯାଇଥିଲେ।

ଉଦ୍ଧାର କାର୍ଯ୍ୟରେ ନିୟୋଜିତ ODRAF ଓ NDRF ଟିମ୍:

ଘଟଣା ପରଠାରୁ ଓଡ଼ିଶା ବିପର୍ଯ୍ୟୟ ଦ୍ରୁତ କାର୍ଯ୍ୟାନୁଷ୍ଠାନ ବଳ (ODRAF), ଜାତୀୟ ବିପର୍ଯ୍ୟୟ ପ୍ରଶମନ ବଳ (NDRF), ଅଗ୍ନିଶମ ବିଭାଗ ଏବଂ ଅନ୍ୟାନ୍ୟ ଉଦ୍ଧାରକାରୀ ଟିମ୍ ନିୟୋଜିତ ଅଛନ୍ତି।

ତେବେ ପାହାଡ଼ରୁ ଖସିଥିବା ବିଶାଳ ପଥର ଓ ପ୍ରତିକୂଳ ପାଣିପାଗ ଯୋଗୁଁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହେଉଛି। ଏହା ସତ୍ତ୍ୱେ ଉଦ୍ଧାରକାରୀ ଟିମ୍ ନିରନ୍ତର ଭାବେ ସର୍ଚ୍ଚ ଅପରେସନ୍ ଜାରି ରଖିଛନ୍ତି।

ଗିଡ଼ିପାବଳିର ଏହି ହୃଦୟବିଦାରକ ଘଟଣା ସମଗ୍ର ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।