ଆମ ଆଦମୀ ପାର୍ଟି (AAP) ନେତା ଅରବିନ୍ଦ କେଜରିୱାଲ, ମନୀଷ ସିସୋଦିଆ ଏବଂ ଅନ୍ୟାନ୍ୟ ନେତାଙ୍କ ବିରୋଧରେ ଅବମାନନା ମାମଲା ଆରମ୍ଭ କରିବା ପାଇଁ ଦାଖଲ ହୋଇଥିବା ଏକ ଜନସ୍ୱାର୍ଥ ମାମଲା (PIL) ଉପରେ ବୁଧବାର ଦିଲ୍ଲୀ ହାଇକୋର୍ଟରେ ଶୁଣାଣି ହୋଇଛି।

ଏହି ମାମଲାଟି ମୁଖ୍ୟ ବିଚାରପତି ଦେବେନ୍ଦ୍ର କୁମାର ଉପାଧ୍ୟାୟ ଓ ବିଚାରପତି ତେଜସ କାରିଆ ଙ୍କୁ ନେଇ ଗଠିତ ଖଣ୍ଡପୀଠ ସମ୍ମୁଖରେ ତାଲିକାଭୁକ୍ତ ହୋଇଥିଲା। କିନ୍ତୁ ବିଚାରପତି ତେଜସ କାରିଆ ଏହି ମାମଲାରୁ ନିଜକୁ ହଟାଇ ନେଇଥିବାରୁ, ଗୁରୁବାର ଏହାର ଶୁଣାଣି ଏକ ଭିନ୍ନ ଖଣ୍ଡପୀଠରେ କରାଯିବ ବୋଲି ଜଣାପଡ଼ିଛି।

PILରେ କଣ ଅଭିଯୋଗ ହୋଇଛି?

ଆବେଦନରେ ଅଭିଯୋଗ କରାଯାଇଛି ଯେ, ପୂର୍ବତନ ମୁଖ୍ୟମନ୍ତ୍ରୀ କେଜରିୱାଲଙ୍କ ଆବେଦନ ସମ୍ପର୍କିତ ଏକ କୋର୍ଟ ଶୁଣାଣିର ଭିଡିଓକୁ ଅନଧିକୃତ ଭାବେ ଅପଲୋଡ୍ ଏବଂ ସେୟାର କରାଯାଇଥିଲା। ଏହି ଭିଡିଓ ମାଧ୍ୟମରେ ଉତ୍ପାଦ ନୀତି ମାମଲାରୁ ବିଚାରପତି ସ୍ୱର୍ଣ୍ଣ କାନ୍ତା ଶର୍ମାଙ୍କୁ ବାହାର କରିବା ପାଇଁ ଦାବି ଉଠାଯାଇଥିଲା।

PILରେ ଯୁକ୍ତି ରଖାଯାଇଛି ଯେ, ସୋସିଆଲ ମିଡିଆରେ କୋର୍ଟ କାର୍ଯ୍ୟର ଅନଧିକୃତ ରେକର୍ଡିଂ ପ୍ରସାର କରିବା ନ୍ୟାୟପାଳିକାର ସ୍ୱାଧୀନତାକୁ କ୍ଷୁର୍ଣ୍ଣ କରିପାରେ ଏବଂ ଏହା ହାଇକୋର୍ଟ ନିୟମ ଅନୁଯାୟୀ ନିଷିଦ୍ଧ।

ଏପ୍ରିଲ ୧୩ରେ ରେକର୍ଡିଂ କରାଯାଇଥିଲା: ଆବେଦନର ଦାବି

PILରେ ଦାବି କରାଯାଇଛି ଯେ,ଏପ୍ରିଲ ୧୩, ୨୦୨୬ ତାରିଖରେ ଜଷ୍ଟିସ ଶର୍ମାଙ୍କ ସମ୍ମୁଖରେ କେଜରିୱାଲଙ୍କ ହାଜର ସମୟର କୋର୍ଟ କାର୍ଯ୍ୟକୁ ଏକ ସୁଚିନ୍ତିତ ରଣନୀତିର ଅଂଶ ଭାବେ ରେକର୍ଡ କରାଯାଇଥିଲା।

ଆବେଦନରେ କୁହାଯାଇଛି ଯେ, ଏହି ଭିଡିଓକୁ ସୋସିଆଲ ମିଡିଆରେ ପ୍ରସାର କରି ଜନସାଧାରଣଙ୍କ ଦୃଷ୍ଟିରେ କୋର୍ଟର ଛବିକୁ କ୍ଷତିଗ୍ରସ୍ତ କରିବା ଉଦ୍ଦେଶ୍ୟ ଥିଲା।

SIT ଗଠନ ଓ ଅବମାନନା ମାମଲା ଦାବି

ଆବେଦନରେ ଅଭିଯୋଗ କରାଯାଇଛି ଯେ କେଜରିୱାଲ ଏବଂ ତାଙ୍କ ଦଳର କିଛି ସଦସ୍ୟ ମିଶି ଏକ ଷଡ଼ଯନ୍ତ୍ର ରଚି କୋର୍ଟ କାର୍ଯ୍ୟକୁ ରେକର୍ଡ କରିଥିଲେ।

PILରେ ଏହି ଘଟଣାର ତଦନ୍ତ ପାଇଁ ଏକ ସ୍ୱତନ୍ତ୍ର ତଦନ୍ତ ଦଳ (SIT) ଗଠନ କରିବାକୁ ମଧ୍ୟ ଦାବି କରାଯାଇଛି।

ସେହିପରି ଏପ୍ରିଲ ୧୩ର ଭିଡିଓକୁ ଯେଉଁମାନେ ଅପଲୋଡ୍, ପୁନଃପୋଷ୍ଟ କିମ୍ବା ଫରୱାର୍ଡ କରିଛନ୍ତି ସେମାନଙ୍କ ବିରୋଧରେ ମଧ୍ୟ ଅବମାନନା ମାମଲା ଆରମ୍ଭ କରିବା ପାଇଁ କୋର୍ଟକୁ ଅନୁରୋଧ କରାଯାଇଛି।

PILରେ ସୋସିଆଲ ମିଡିଆରୁ ଏହି ସମସ୍ତ ବିଷୟବସ୍ତୁକୁ ହଟାଇବା ପାଇଁ ମଧ୍ୟ ଦାବି ରହିଛି।