ବଙ୍ଗୋପସାଗରରେ ସୃଷ୍ଟ ବାତ୍ୟା ‘ଆର୍ଣ୍ଣବ’ର ପ୍ରଭାବକୁ ନେଇ ଓଡ଼ିଶାରେ ସତର୍କତା ବଢ଼ିଛି। ବିଶେଷକରି ଦକ୍ଷିଣ ଓଡ଼ିଶାର ସମ୍ଭାବ୍ୟ ପ୍ରଭାବିତ ଅଞ୍ଚଳରେ ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଇଛି।

ବାତ୍ୟା ପ୍ରଭାବ ଦୃଷ୍ଟିରୁ ନବରଙ୍ଗପୁର ଓ ରାୟଗଡ଼ାରେ ମଙ୍ଗଳବାର ଏବଂ ୨୮ ତାରିଖରେ ସ୍କୁଲ୍ ଓ ଅଙ୍ଗନବାଡ଼ି କେନ୍ଦ୍ର ବନ୍ଦ ରହିବ। ସେହିପରି କୋରାପୁଟ ଓ ଗଞ୍ଜାମରେ ଅକ୍ଟୋବର ୨୭ରୁ ୨୯ ତାରିଖ ପର୍ଯ୍ୟନ୍ତ ଶିକ୍ଷାନୁଷ୍ଠାନ ଓ ଅଙ୍ଗନବାଡ଼ି କେନ୍ଦ୍ର ବନ୍ଦ ରଖାଯାଇଛି। ତେବେ ଶିକ୍ଷକ ଓ ଅନ୍ୟ କର୍ମଚାରୀମାନଙ୍କୁ ଆବଶ୍ୟକତାନୁସାରେ ଉପସ୍ଥିତ ରହିବାକୁ କୁହାଯାଇଛି।

୮ଟି ଟ୍ରେନ୍ ବାତିଲ୍

ବାତ୍ୟାକୁ ଦୃଷ୍ଟିରେ ରଖି ରେଳବାଇ ଯାତ୍ରୀ ସୁରକ୍ଷା ପାଇଁ ଭିଜାଗ୍‌-କିରାଣ୍ଡୁଲ୍ ଓ ଭିଜାଗ୍‌-କୋରାପୁଟ ରୁଟ୍‌ରେ ଚାଲୁଥିବା ମୋଟ ୮ଟି ଟ୍ରେନ୍ ବାତିଲ୍ କରିଛି। ଏଥିରେ ଭିଜାଗ୍‌-କିରାଣ୍ଡୁଲ୍ ନାଇଟ୍ ଏକ୍ସପ୍ରେସ୍, ଭିଜାଗ୍‌-କୋରାପୁଟ ପାସେଞ୍ଜର, କୋରାପୁଟ-ଭିଜାଗ୍‌ ପାସେଞ୍ଜର, ଭିଜାଗ୍‌-କୋରାପୁଟ ଇଣ୍ଟରସିଟି ଏକ୍ସପ୍ରେସ୍ ଏବଂ ଭିଜାଗ୍‌-କିରାଣ୍ଡୁଲ୍ ପାସେଞ୍ଜରର ଉଭୟ ଦିଗର ସେବା ଅନ୍ତର୍ଭୁକ୍ତ।

ହିରାଖଣ୍ଡ ଏକ୍ସପ୍ରେସ୍‌ରେ ପରିବର୍ତ୍ତନ

ବାତ୍ୟା ପ୍ରଭାବ ଯୋଗୁଁ ଭୁବନେଶ୍ୱର-ଜଗଦଲପୁର ହିରାଖଣ୍ଡ ଏକ୍ସପ୍ରେସ୍ (୧୮୪୪୭) ଅକ୍ଟୋବର ୨୭ରୁ ୩୦ ପର୍ଯ୍ୟନ୍ତ ରାୟଗଡ଼ାରେ ଯାତ୍ରା ସମାପ୍ତ କରିବ। ଏହାର ଫେରନ୍ତା ଟ୍ରେନ୍ ୧୮୪୪୮ ଜଗଦଲପୁର-ଭୁବନେଶ୍ୱର ହିରାଖଣ୍ଡ ଏକ୍ସପ୍ରେସ୍ ଅକ୍ଟୋବର ୨୮ରୁ ୩୧ ପର୍ଯ୍ୟନ୍ତ କୋରାପୁଟ ବଦଳରେ ରାୟଗଡ଼ାରୁ ଚଳାଚଳ ଆରମ୍ଭ କରିବ।

ଯାତ୍ରୀମାନଙ୍କୁ ଯାତ୍ରା ପୂର୍ବରୁ ନିଜ ଟ୍ରେନ୍‌ର ଚଳାଚଳ ସ୍ଥିତି ଓ ସମୟସୂଚୀ ଯାଞ୍ଚ କରିବାକୁ ପରାମର୍ଶ ଦିଆଯାଉଛି। ବାତ୍ୟା ସମ୍ପର୍କିତ ଅଧିକୃତ ଅପଡେଟ୍ ପାଇଁ IMD ଓ ସରକାରୀ ପ୍ରଶାସନର ସୂଚନାକୁ ଅନୁସରଣ କରିବା ଉଚିତ।