କଟକ:ମହାନଦୀର ଜଳସ୍ତର ବଢ଼ୁଥିବା ଓ ବନ୍ୟା ଆଶଙ୍କା ମଧ୍ୟରେ ବୋଲବମ୍ ଭକ୍ତଙ୍କ ସୁରକ୍ଷାକୁ ନେଇ କଟକ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଶ୍ରାବଣ ସୋମବାର ପାଇଁ ଗଡ଼ଗଡ଼ିଆ ଘାଟରୁ ପବିତ୍ର ଜଳ ସଂଗ୍ରହ କରୁଥିବା କାଉଁଡ଼ିଆଙ୍କ ସୁରକ୍ଷାକୁ ସର୍ବାଧିକ ଗୁରୁତ୍ୱ ଦିଆଯାଇଛି।
ମହାନଦୀରେ ଜଳସ୍ତର ବଢ଼ୁଥିବାରୁ ଗଡ଼ଗଡ଼ିଆ ଘାଟରେ ବ୍ୟାରିକେଡ୍ ଲଗାଯାଇଛି। ସାଧାରଣ ଲୋକଙ୍କ ପାଇଁ ଘାଟରେ ପ୍ରବେଶକୁ ସୀମିତ କରାଯାଇଥିବା ବେଳେ କେବଳ କାଉଁଡ଼ିଆଙ୍କୁ କଡ଼ା ନଜରଦାରୀ ମଧ୍ୟରେ ନଦୀରୁ ଜଳ ସଂଗ୍ରହ କରିବାକୁ ଅନୁମତି ଦିଆଯାଉଛି।
ସୁରକ୍ଷା ବ୍ୟବସ୍ଥାକୁ ଆହୁରି କଡ଼ା କରିବା ପାଇଁ କମିଶନରେଟ୍ ପୁଲିସ ସହ ODRAF, NDRF ଓ ଅଗ୍ନିଶମ ବାହିନୀର ଟିମ୍କୁ ନଦୀକୂଳରେ ମୁତୟନ କରାଯାଇଛି। ଟ୍ୱିନ୍ ସିଟି ପୁଲିସ କମିଶନର ସୁରେଶ ଦେବ ଦତ୍ତ ସିଂହଙ୍କ ସୂଚନା ଅନୁସାରେ, ଗଡ଼ଗଡ଼ିଆ ଘାଟରେ ୮ ପ୍ଲାଟୁନ୍ ପୁଲିସ ମୁତୟନ ହୋଇଛନ୍ତି।
କାଉଁଡ଼ିଆଙ୍କ ସୁରକ୍ଷା ପାଇଁ ପ୍ରତିଫଳକ ଟେପ୍ ବଣ୍ଟନ କରାଯାଇଛି। ଏହାସହ ପ୍ରତ୍ୟେକ ଦଳକୁ ଦୁଇଟି ଲେଖାଏଁ ରିଫ୍ଲେକ୍ଟିଭ୍ ଜ୍ୟାକେଟ୍ ଦିଆଯାଇଛି। ବିଶେଷକରି ସନ୍ଧ୍ୟା ସମୟରେ ଗାଡ଼ିର ଆଲୋକରେ ଏହି ଜ୍ୟାକେଟ୍ ଓ ଟେପ୍ ଚମକିବା ଦ୍ୱାରା ଦୁର୍ଘଟଣା ଆଶଙ୍କା କମାଇବାକୁ ପଦକ୍ଷେପ ନିଆଯାଇଛି।
ପୁଲିସ କମିଶନର କହିଛନ୍ତି ଯେ କାଉଁଡ଼ିଆଙ୍କ ସୁରକ୍ଷା, ଆଇନଶୃଙ୍ଖଳା ଓ ଯାତାୟାତ ବ୍ୟବସ୍ଥାକୁ ସୁଚାରୁ ରଖିବା ପାଇଁ ବ୍ୟାପକ ବ୍ୟବସ୍ଥା ହୋଇଛି। ତୀବ୍ର ଗତିରେ ଗାଡ଼ି ଚଳାଚଳ ରୋକିବା ପାଇଁ ବିଭିନ୍ନ ସ୍ଥାନରେ ଯାନବାହନ ଯାଞ୍ଚ କରାଯିବ। ଏହାସହ ରାସ୍ତାକୁ ସମ୍ପୂର୍ଣ୍ଣ ଅବରୋଧ ନକରି ଭକ୍ତମାନେ ଗୋଟିଏ ଧାଡ଼ିରେ ଚାଲିବାକୁ ପୁଲିସ ଅନୁରୋଧ କରିଛି।
ଅନ୍ୟପଟେ ହୀରାକୁଦ ଜଳଭଣ୍ଡାରର ୨୨ଟି ଗେଟ୍ ଖୋଲାଯାଇଥିବାରୁ ଏହାର ବନ୍ୟାଜଳ ମୁଣ୍ଡଳୀରେ ପହଞ୍ଚିବା ପରେ ମହାନଦୀର ଜଳସ୍ତର ପୁଣି ଉପରମୁହାଁ ହୋଇଛି। ସକାଳ ୯ଟା ସୁଦ୍ଧା ମୁଣ୍ଡଳୀରେ ପ୍ରାୟ୫,୭୩,୪୭୫ କ୍ୟୁସେକ୍ପାଣି ପ୍ରବାହିତ ହେଉଥିଲା। ଏହି ସମୟରେ ଅପ୍ଷ୍ଟ୍ରିମ୍ ଜଳସ୍ତର ୮୯.୧୦ ଫୁଟ୍ ଓ ଡାଉନ୍ଷ୍ଟ୍ରିମ୍ ଜଳସ୍ତର ୮୬.୫୦ ଫୁଟ୍ ରେକର୍ଡ ହୋଇଥିଲା।
ହୀରାକୁଦର ଗେଟ୍ ଖୋଲାଯିବାର ପ୍ରାୟ ୪୦ ଘଣ୍ଟା ପରେ ବନ୍ୟାଜଳ ମୁଣ୍ଡଳୀରେ ପହଞ୍ଚିଥିବାରୁ ନଦୀର ବିଭିନ୍ନ ସମ୍ବେଦନଶୀଳ ଅଞ୍ଚଳରେ ପ୍ରଶାସନ ପକ୍ଷରୁ ନଜରଦାରୀ ବଢ଼ାଯାଇଛି। ଏହାସହ ଆପତ୍କାଳୀନ ପରିସ୍ଥିତି ପାଇଁ ଉଦ୍ଧାରକାରୀ ଦଳଗୁଡ଼ିକୁ ସଜାଗ ରଖାଯାଇଛି।
ମହାନଦୀରେ ବନ୍ୟାଜଳ ବଢ଼ିବା ପରେ କଟକ ଜିଲ୍ଲାର ପ୍ରସିଦ୍ଧଅନ...
ବଲିଉଡ୍ରେ ଚର୍ଚ୍ଚାରେ ଥିବା ସୂରଜ ବଡ଼ଜାତ୍ୟାଙ୍କ ନୂଆ ଫିଲ୍...
ମୁମ୍ବାଇ: ବଲିଉଡ୍ ଓ ଟେଲିଭିଜନର ଲୋକପ୍ରିୟ ଅଭିନେତ୍ରୀ କରି...
ମୁମ୍ବାଇ: ନିତେଶ ତିୱାରୀଙ୍କ ନିର୍ଦ୍ଦେଶିତ ବହୁ ପ୍ରତୀକ୍ଷି...
SS ରାଜାମୌଲିଙ୍କ ଆଗାମୀ ବଡ଼ ବଜେଟ୍‌ ଫିଲ୍ମ **&lsqu...
ମହାନଦୀରେ ଜଳସ୍ତର ବୃଦ୍ଧି ପାଇବା ସହ କଟକ ଜିଲ୍ଲାର ବିଭିନ୍...
ଦେଶରେ ମୌସୁମୀର ପ୍ରଭାବ ଆହୁରି ତୀବ୍ର ହେବାର ଆଶଙ୍କା। ଅଗଷ...
ସୁବର୍ଣ୍ଣପୁର ଜିଲ୍ଲାର ବିନିକା କମ୍ୟୁନିଟି ହେଲ୍ଥ ସେଣ୍ଟର...
