ସୁବର୍ଣ୍ଣପୁର ଜିଲ୍ଲାର ବିନିକା କମ୍ୟୁନିଟି ହେଲ୍ଥ ସେଣ୍ଟର (CHC) ବର୍ଷାଜଳ ଜମି ରହିବାରୁ ସମ୍ପୂର୍ଣ୍ଣ ଜଳମଗ୍ନ ହୋଇପଡ଼ିଛି। ଡ୍ରେନେଜ୍ ବ୍ୟବସ୍ଥା ଅଚଳ ଥିବାରୁ ହସ୍ପିଟାଲ ପରିସରର ବିଭିନ୍ନ ସ୍ଥାନରେ ପାଣି ଜମି ରହିଛି। ଏହାଫଳରେ ରୋଗୀ, ସେମାନଙ୍କ ସମ୍ପର୍କୀୟ ଏବଂ ସ୍ୱାସ୍ଥ୍ୟକର୍ମୀମାନେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି।

ସୂଚନା ଅନୁସାରେ, ହସ୍ପିଟାଲ ପରିସରରେ ଥିବା ଡ୍ରେନେଜ୍ ବ୍ୟବସ୍ଥା ଦୀର୍ଘଦିନ ଧରି ଅକାର୍ଯ୍ୟକ୍ଷମ ଥିବାରୁ ବର୍ଷାଜଳ ନିଷ୍କାସନ ହୋଇପାରୁନାହିଁ। ଫଳରେ ଟିକାକରଣ କେନ୍ଦ୍ର, ନର୍ସମାନଙ୍କ ଆବାସ ଓ ଅନ୍ୟାନ୍ୟ କାର୍ଯ୍ୟାଳୟରେ ପାଣି ପଶିଯାଇଛି।

ପ୍ରତିଦିନ ଚିକିତ୍ସା ପାଇଁ ଆସୁଥିବା ରୋଗୀମାନେ ଆଣ୍ଠୁଏ ପାଣି ଭିତରେ ଚାଲି ହସ୍ପିଟାଲକୁ ଯିବାକୁ ବାଧ୍ୟ ହେଉଛନ୍ତି। ଜଳବନ୍ଦୀ ସ୍ଥିତି ଯୋଗୁଁ ବୃଦ୍ଧ, ମହିଳା ଓ ଶିଶୁମାନେ ଅଧିକ ସମସ୍ୟାର ସମ୍ମୁଖୀନ ହେଉଛନ୍ତି।

ହସ୍ପିଟାଲର ଜଣେ ନର୍ସ କହିଛନ୍ତି ଯେ, ନର୍ସ କ୍ୱାର୍ଟର ସମ୍ମୁଖରେ ମଧ୍ୟ ପାଣି ଜମି ରହିଥିବାରୁ ବାହାରକୁ ବାହାରିବା କଷ୍ଟକର ହୋଇପଡ଼ିଛି। ଡ୍ରେନେଜ୍ ସଫା କରାଗଲେ ଏହି ସମସ୍ୟାର ସମାଧାନ ହୋଇପାରିବ ବୋଲି ସେ କହିଛନ୍ତି।

ସ୍ଥାନୀୟ ବାସିନ୍ଦାମାନେ ମଧ୍ୟ ତୁରନ୍ତ ଡ୍ରେନେଜ୍ ବ୍ୟବସ୍ଥାର ମରାମତି ଏବଂ ପରିସରରୁ ପାଣି ନିଷ୍କାସନ ପାଇଁ ପ୍ରଶାସନଙ୍କ ହସ୍ତକ୍ଷେପ ଦାବି କରିଛନ୍ତି। ରୋଗୀମାନଙ୍କ ସୁବିଧା ଓ ସ୍ୱାସ୍ଥ୍ୟ ସେବା ସ୍ୱାଭାବିକ କରିବା ପାଇଁ ଶୀଘ୍ର ପଦକ୍ଷେପ ନେବାକୁ ସେମାନେ ଅନୁରୋଧ କରିଛନ୍ତି।