କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବିଏସଇ) ଦଶମ ଶ୍ରେଣୀର ଛାତ୍ରଛାତ୍ରୀଙ୍କ ପାଇଁ ତୃତୀୟ ଭାଷାକୁ ନେଇ ଏକ ଗୁରୁତ୍ୱପୂର୍ଣ୍ଣ ନୂଆ ନିୟମ ଜାରି କରିଛି। ନୂଆ ନିୟମ ଅନୁଯାୟୀ, ୨୦୨୭-୨୮ ଶିକ୍ଷାବର୍ଷରୁ ଦଶମ ପାସ୍ ସାର୍ଟିଫିକେଟ୍ ପାଇବା ପାଇଁ ତୃତୀୟ ଭାଷାର ସ୍କୁଲ୍-ଆଧାରିତ ଆଭ୍ୟନ୍ତରୀଣ ମୂଲ୍ୟାଙ୍କନରେ ପାସ୍ ହେବା ବାଧ୍ୟତାମୂଳକ ହେବ।

ସିବିଏସଇ ସ୍ପଷ୍ଟ କରିଛି ଯେ, ତୃତୀୟ ଭାଷା ପାଇଁ କୌଣସି ବୋର୍ଡ ପରୀକ୍ଷା ଆୟୋଜନ କରାଯିବ ନାହିଁ। ଏହାର ମୂଲ୍ୟାଙ୍କନ ସମ୍ପୂର୍ଣ୍ଣ ଭାବେ ସମ୍ପୃକ୍ତ ସ୍କୁଲ୍‌ ଦ୍ୱାରା କରାଯିବ। ତେବେ ଏହି ଆଭ୍ୟନ୍ତରୀଣ ମୂଲ୍ୟାଙ୍କନରେ ପାସ୍ ନ କଲେ ଛାତ୍ରଛାତ୍ରୀଙ୍କୁ ସିବିଏସଇ ଦଶମ ପାସ୍ ସାର୍ଟିଫିକେଟ୍ ପ୍ରଦାନ କରାଯିବ ନାହିଁ।

ଏହି ନୂଆ ନିୟମ ୨୦୨୬-୨୭ ଶିକ୍ଷାବର୍ଷରେ ନବମ ଶ୍ରେଣୀରେ ଅଧ୍ୟୟନ କରୁଥିବା ଛାତ୍ରଛାତ୍ରୀଙ୍କ ଉପରେ ଲାଗୁ ହେବ। ଯଦି କୌଣସି ଛାତ୍ର ନବମ ଶ୍ରେଣୀରେ ତୃତୀୟ ଭାଷାରେ ପାସ୍ କରିପାରିବେ ନାହିଁ, ତେବେ ସେ ଦଶମ ଶ୍ରେଣୀକୁ ପଦୋନ୍ନତି ପାଇବେ। କିନ୍ତୁ ଦଶମରେ ପଢ଼ୁଥିବା ସମୟରେ ବାକି ଥିବା ମୂଲ୍ୟାଙ୍କନରେ ସଫଳ ହେବା ଆବଶ୍ୟକ।

ସିବିଏସଇ କହିଛି ଯେ, ଏହି ପଦକ୍ଷେପ ଜାତୀୟ ଶିକ୍ଷା ନୀତି (NEP) ୨୦୨୦ ଅନୁଯାୟୀ ବହୁଭାଷୀ ଶିକ୍ଷାକୁ ପ୍ରୋତ୍ସାହନ ଦେବା ଲକ୍ଷ୍ୟରେ ନିଆଯାଇଛି।

ନୂଆ ନିୟମ ଅନୁସାରେ, ଛାତ୍ରଛାତ୍ରୀମାନେ ପଢ଼ୁଥିବା ତିନୋଟି ଭାଷା ମଧ୍ୟରୁ ଅତି କମରେ ଦୁଇଟି ଭାରତୀୟ ଭାଷା ହେବା ଆବଶ୍ୟକ ବୋଲି ସିବିଏସଇ ସ୍ପଷ୍ଟ କରିଛି।