ଭାରତରେ ଇ-୨୦ ପେଟ୍ରୋଲ୍ ବ୍ୟବହାରକୁ ନେଇ ଚର୍ଚ୍ଚା ଚାଲିଥିବା ବେଳେ ପଡ଼ୋଶୀ ଦେଶ ଭୁଟାନ ଏହାକୁ ଗ୍ରହଣ କରିବାକୁ ମନା କରିଛି। ଭୁଟାନ ଭାରତୀୟ ତୈଳ କମ୍ପାନିମାନଙ୍କୁ ସାଧାରଣ ପେଟ୍ରୋଲ୍ ଯୋଗାଣ ଜାରି ରଖିବାକୁ ଅନୁରୋଧ କରିଛି।

ଭୁଟାନର ଏହି ନିଷ୍ପତ୍ତି ପଛରେ ମୁଖ୍ୟ କାରଣ ହେଉଛି ଦେଶର ପୁରୁଣା ଇନ୍ଧନ ସଂରକ୍ଷଣ ବ୍ୟବସ୍ଥା ଓ ପାହାଡ଼ିଆ ଭୌଗୋଳିକ ପରିସ୍ଥିତି। ଭୁଟାନର ଅଧିକାଂଶ ଇନ୍ଧନ ଟାଙ୍କି ଭୂତଳ ତଳେ ଥିବାରୁ ସେଥିରେ ପାଣି ପଶିବାର ଆଶଙ୍କା ରହିଛି।

ବିଶେଷଜ୍ଞଙ୍କ କହିବା ଅନୁସାରେ, ଇ-୨୦ ପେଟ୍ରୋଲ୍‌ରେ ଇଥାନଲ୍ ଥିବାରୁ ଏହା ସହଜରେ ପରିବେଶର ଆର୍ଦ୍ରତା ଶୋଷଣ କରିଥାଏ। ଯଦି ଟାଙ୍କିରେ ପାଣି ପଶିଯାଏ, ତେବେ ଇନ୍ଧନର ଗୁଣବତ୍ତା କମିଯାଏ ଏବଂ ଇଞ୍ଜିନରେ ସମସ୍ୟା ସୃଷ୍ଟି ହୋଇପାରେ। ଏହା ସହ ଟାଙ୍କି ଓ ପାଇପରେ କ୍ଷୟ ମଧ୍ୟ ବଢ଼ିପାରେ।

ଭୁଟାନର ଅଧିକାଂଶ ଇନ୍ଧନ ଭଣ୍ଡାର ପାହାଡ଼ିଆ ଓ ଅଧିକ ଆର୍ଦ୍ରତା ଥିବା ଅଞ୍ଚଳରେ ଅବସ୍ଥିତ। ଏପରି ସ୍ଥାନରେ ଇଥାନଲ୍ ମିଶ୍ରିତ ପେଟ୍ରୋଲ୍ ସଂରକ୍ଷଣ କରିବା ଅଧିକ ଚ୍ୟାଲେଞ୍ଜ ସୃଷ୍ଟି କରିପାରେ ବୋଲି ଭୁଟାନ ସରକାର କହିଛନ୍ତି।

ଏହା ସହ ପାହାଡ଼ିଆ ରାସ୍ତାରେ ଚଳାଚଳ କରୁଥିବା ଯାନବାହନ ପାଇଁ ଅଧିକ ଶକ୍ତିର ଆବଶ୍ୟକତା ରହିଥାଏ। ତେଣୁ ଇ-୨୦ ପେଟ୍ରୋଲ୍ ସବୁ ସ୍ଥିତିରେ ଆବଶ୍ୟକ କାର୍ଯ୍ୟଦକ୍ଷତା ଦେଇପାରିବ କି ନାହିଁ, ସେନେଇ ମଧ୍ୟ ଭୁଟାନ ଚିନ୍ତା ପ୍ରକାଶ କରିଛି।

ବର୍ତ୍ତମାନ ଭୁଟାନ ନିଜର ସମସ୍ତ ପେଟ୍ରୋଲ୍ ଓ ଡିଜେଲ୍ ଭାରତରୁ ଆମଦାନି କରୁଛି। ଭାରତ ଭବିଷ୍ୟତରେ ଇଥାନଲ୍‌ର ପରିମାଣ ଆହୁରି ବଢ଼ାଇଲେ ପୂର୍ବରୁ ସୂଚନା ଦେବାକୁ ଭୁଟାନ ଅନୁରୋଧ କରିଛି। ସେହିପରି ଲିକ୍ ନ ହେଉଥିବା ଆଧୁନିକ ଇନ୍ଧନ ଟାଙ୍କି ଯୋଗାଇବାକୁ ମଧ୍ୟ ପ୍ରସ୍ତାବ ଦେଇଛି।

ଏପଟେ ଭାରତରେ ଇ-୨୦ ପେଟ୍ରୋଲ୍‌କୁ ନେଇ ମତଭେଦ ଜାରି ରହିଛି। କେତେକ ଗ୍ରାହକ ମାଇଲେଜ୍ କମିବା ଓ ରକ୍ଷଣାବେକ୍ଷଣ ଖର୍ଚ୍ଚ ବଢ଼ିବା ଅଭିଯୋଗ କରୁଥିବା ବେଳେ, ସରକାର ଏହା ପରିବେଶ ପାଇଁ ଉପକାରୀ ବୋଲି କହୁଛନ୍ତି।