ଭୁଟାନରେ ଗ୍ଲେସିୟର ହ୍ରଦରୁ ହଠାତ୍ ବିପୁଳ ପରିମାଣର ଜଳ ନିର୍ଗତ ହେବା ପରେ ଭାରତର ଉତ୍ତର ବଙ୍ଗ ଓ ଆସାମର କିଛି ଅଞ୍ଚଳରେ ବନ୍ୟା ଆଶଙ୍କା ବଢ଼ିଛି। ଏହାକୁ ନେଇ ପ୍ରଶାସନ ପକ୍ଷରୁ ସତର୍କତା ଜାରି କରାଯିବା ସହ ନଦୀକୂଳରେ ରହୁଥିବା ଲୋକଙ୍କୁ ସୁରକ୍ଷିତ ସ୍ଥାନକୁ ଯିବାକୁ ପରାମର୍ଶ ଦିଆଯାଇଛି।

ଶିନ୍ତାଫୁ ହ୍ରଦରୁ ଜଳ ନିର୍ଗତ, ବଢ଼ିପାରେ ନଦୀର ଜଳସ୍ତର

ରିପୋର୍ଟ ଅନୁଯାୟୀ, ଭୁଟାନର ଗାସା ଜିଲ୍ଲାରେ ଥିବା ଶିନ୍ତାଫୁ ହ୍ରଦରେ ଅକ୍ଟୋବର ୨୯ ତାରିଖ ସନ୍ଧ୍ୟାରେ ଗ୍ଲେସିୟର ହ୍ରଦ ଉଛୁଳିବା ଘଟଣା ସାମ୍ନାକୁ ଆସିଥିଲା। ଏହାର ଜଳ ମୋ ଚୁ (Mo Chhu) ନଦୀ ପ୍ରଣାଳୀ ଦେଇ ସଙ୍କୋଶ ନଦୀରେ ପ୍ରବାହିତ ହେଉଥିବାରୁ ତଳମୁଣ୍ଡରେ ଜଳସ୍ତର ହଠାତ୍ ବଢ଼ିବା ନେଇ ଆଶଙ୍କା ପ୍ରକାଶ ପାଇଛି। କିଛି ରିପୋର୍ଟରେ ପ୍ରାୟ ୭୪ ଲକ୍ଷ ଘନମିଟର ଜଳ ନିର୍ଗତ ହୋଇଥିବା ଉଲ୍ଲେଖ ରହିଛି।

ପଶ୍ଚିମବଙ୍ଗ ଓ ଆସାମରେ ସତର୍କତା

ପଶ୍ଚିମବଙ୍ଗର ଅଲିପୁରଦୁଆର, କୁଚବିହାର ଓ ଜଳପାଇଗୁଡ଼ି ଅଞ୍ଚଳ ସହ ଆସାମର ଧୁବରୀ ଜିଲ୍ଲାରେ ପ୍ରଶାସନ ସଜାଗ ରହିଛି। ବିଶେଷକରି ସଙ୍କୋଶ ନଦୀକୂଳରେ ଥିବା ଗାଁଗୁଡ଼ିକର ବାସିନ୍ଦାଙ୍କୁ ତୁରନ୍ତ ସୁରକ୍ଷିତ ସ୍ଥାନକୁ ଯିବାକୁ ଆହ୍ୱାନ କରାଯାଇଛି। କେତେକ ଅଞ୍ଚଳରେ ସାଇରନ୍ ଓ ଲାଉଡ୍ସ୍ପିକର ମାଧ୍ୟମରେ ସତର୍କ କରାଯାଉଛି। NDRF ଓ SDRF ଉଦ୍ଧାରକାରୀ ଦଳକୁ ମଧ୍ୟ ସଜାଗ ରଖାଯାଇଛି।

ଭାରତ-ଭୁଟାନ ସୀମାରେ ବଢ଼ିପାରେ ଜଳସ୍ତର

ପ୍ରାରମ୍ଭିକ ଆକଳନ ଅନୁଯାୟୀ, ଉପରମୁଣ୍ଡରୁ ଆସୁଥିବା ଜଳରାଶି ଭାରତ-ଭୁଟାନ ସୀମାରେ ପହଞ୍ଚିଲେ ସଙ୍କୋଶ ନଦୀର ଜଳସ୍ତର ଦ୍ରୁତ ବୃଦ୍ଧି ପାଇପାରେ। ଏହା ଦ୍ୱାରା ନଦୀକୂଳିଆ ବସତି, ଚାଷଜମି, ରାସ୍ତା ଓ ପୋଲ ପ୍ରଭାବିତ ହେବାର ଆଶଙ୍କା ରହିଛି। ତେବେ ବନ୍ୟାର ପ୍ରକୃତ ପ୍ରଭାବ ଜଳପ୍ରବାହ ଓ ନଦୀର ଜଳସ୍ତର ଉପରେ ନିର୍ଭର କରିବ।

କ’ଣ ଏହି ଗ୍ଲେସିୟର ହ୍ରଦ ଉଛୁଳିବା ଘଟଣା?

ହିମବାହର ବରଫ ତରଳିବାରୁ ସୃଷ୍ଟି ହୋଇଥିବା ହ୍ରଦରେ ଜମା ଜଳ ଯେତେବେଳେ ପ୍ରାକୃତିକ ବନ୍ଧ ଭାଙ୍ଗିବା କିମ୍ବା ଅସ୍ଥିର ହେବା କାରଣରୁ ହଠାତ୍ ବାହାରି ଆସେ, ତାହାକୁ Glacial Lake Outburst Flood (GLOF) କୁହାଯାଏ। ଏପରି ଜଳପ୍ରବାହ ପାହାଡ଼ିଆ ଉପତ୍ୟକା ଦେଇ ଦ୍ରୁତ ଗତିରେ ଆସି ତଳମୁଣ୍ଡରେ ବନ୍ୟା ଓ ଭୂସଂରଚନାର କ୍ଷତି ଘଟାଇପାରେ।