କର୍ଣ୍ଣାଟକର ବ୍ୟସ୍ତବହୁଳବେଙ୍ଗାଲୁରୁ-ମହୀଶୂର ଏକ୍ସପ୍ରେସୱେରେ ଏକ ପରିବାର ଉପରେ ହୋଇଥିବା ଆକ୍ରମଣର ଭିଡିଓ ସୋସିଆଲ ମିଡିଆରେ ଭାଇରାଲ୍ ହୋଇଛି। ଘଟଣାଟି ରାଜପଥରେ ବଢ଼ୁଥିବା ରୋଡ୍ ରେଜ୍ ଏବଂ ଗୁଣ୍ଡାରାଜକୁ ନେଇ ପୁଣିଥରେ ପ୍ରଶ୍ନ ଉଠାଇଛି।

ଘଟଣାଟି ପଛରେ ଆସୁଥିବା ଏକ କାରରଡ୍ୟାସକ୍ୟାମ୍ରେ କଏଦ ହୋଇଛି। ଭିଡିଓରେ ଦେଖାଯାଉଛି ଯେ, କିଛି ଯୁବକ ଏକ ନୀଳ ରଙ୍ଗର କାରକୁ ଅଟକାଇ ଜୋରଜବରଦସ୍ତି କାରର ଦ୍ୱାର ଖୋଲି ଡ୍ରାଇଭରଙ୍କୁ ବାରମ୍ବାର ଆକ୍ରମଣ କରୁଛନ୍ତି।

ମହିଳା ଓ ଶିଶୁଙ୍କ ସାମ୍ନାରେ ମାଡ଼

ସୂଚନା ଅନୁସାରେ, କାରରେ ଜଣେ ମହିଳା, ଜଣେ ଶିଶୁ ସମେତ ଚାରିରୁ ପାଞ୍ଚ ଜଣ ଥିଲେ। ଭିଡିଓରେ ଜଣେ ଆକ୍ରମଣକାରୀ ଏକ ଛୋଟ ଲୁହା ରଡ୍ରେ ଡ୍ରାଇଭରଙ୍କୁ ଆକ୍ରମଣ କରୁଥିବା ମଧ୍ୟ ଦେଖାଯାଇଛି।

ଆକ୍ରମଣ ସମୟରେ କାରରେ ଥିବା ଜଣେ ମହିଳା ବାହାରକୁ ଆସି ଆକ୍ରମଣକାରୀଙ୍କୁ ନିବୃତ୍ତ ହେବାକୁ ଅନୁରୋଧ କରୁଥିବା ବେଳେ ରାସ୍ତାରେ ଯାଉଥିବା କିଛି ଲୋକ ମଧ୍ୟ ପରିସ୍ଥିତି ଶାନ୍ତ କରିବାକୁ ଉଦ୍ୟମ କରୁଥିବା ଦେଖାଯାଇଛି।

ଓଭରଟେକିଂକୁ ନେଇ ବିବାଦ ସନ୍ଦେହ

ରିପୋର୍ଟ ଅନୁସାରେ, ଘଟଣାଟିମାଦ୍ଦୁର ଅଞ୍ଚଳରେ ରବିବାର ରାତି ପ୍ରାୟ ୯ଟା ୫୮ ମିନିଟ୍ସମୟରେ ଘଟିଥିଲା। ପ୍ରାଥମିକ ସୂଚନା ଅନୁଯାୟୀ,ଓଭରଟେକିଂକୁ କେନ୍ଦ୍ର କରି ଆରମ୍ଭ ହୋଇଥିବା ବିବାଦ ପରେ ହିଂସାତ୍ମକ ରୂପ ନେଇଥିଲା।

ପୁଲିସର ପ୍ରତିକ୍ରିୟା ଅପେକ୍ଷାରେ

ଘଟଣାର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ସ୍ଥାନୀୟ ପୁଲିସ ପକ୍ଷରୁ ଏପର୍ଯ୍ୟନ୍ତ ଆକ୍ରମଣକାରୀଙ୍କ ପରିଚୟ କିମ୍ବା ଗିରଫ ସମ୍ପର୍କରେ କୌଣସି ଔପଚାରିକ ସୂଚନା ଜାରି କରାଯାଇନାହିଁ। ତେବେ ଭାଇରାଲ୍ ଭିଡିଓକୁ ଆଧାର କରି ଘଟଣାର ତଦନ୍ତ ଚାଲିଥିବା ସୂଚନା ମିଳିଛି।