ଭୁବନେଶ୍ୱର: ବଙ୍ଗୋପସାଗରରେ ପୁଣି ଏକ ନୂଆ ପାଣିପାଗ ପ୍ରଣାଳୀ ସକ୍ରିୟ ହେବାକୁ ଯାଉଛି। ଦକ୍ଷିଣ-ପୂର୍ବ ବଙ୍ଗୋପସାଗର ଓ ସଂଲଗ୍ନ ଦକ୍ଷିଣ ଆଣ୍ଡାମାନ ସାଗର ଅଞ୍ଚଳରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଧୀରେ ଧୀରେ ଘନୀଭୂତ ହେଉଛି। ଏହାର ପ୍ରଭାବରେ ନଭେମ୍ବର ୧୩ ତାରିଖ ସୁଦ୍ଧା ଦକ୍ଷିଣ-ପୂର୍ବ ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇପାରେ। ପରବର୍ତ୍ତୀ ସମୟରେ ଏହା ୧୪ ତାରିଖରେ ସ୍ପଷ୍ଟ ଚିହ୍ନିତ ଲଘୁଚାପ ଏବଂ ୧୫ ତାରିଖରେ ଅବପାତରେ ପରିଣତ ହେବାର ସମ୍ଭାବନା ରହିଛି।

ବାତ୍ୟା ହେବ କି ନାହିଁ, ଏବେ ଅନିଶ୍ଚିତତା

ଏହି ପାଣିପାଗ ପ୍ରଣାଳୀକୁ ନେଇ ବାତ୍ୟା ଆଶଙ୍କା ଚର୍ଚ୍ଚା ହେଉଥିଲେ ମଧ୍ୟ ଏହା ଘୂର୍ଣ୍ଣିବାତ୍ୟାର ରୂପ ନେବ ବୋଲି ଭାରତୀୟ ପାଣିପାଗ ବିଭାଗ (IMD) ପକ୍ଷରୁ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ଦିଆଯାଇନାହିଁ। ଏହାର ତୀବ୍ରତା ଓ ଗତିପଥ ଅବପାତ ପରେ କିପରି ରହିବ, ତାହା ଏବେ ଅନିଶ୍ଚିତ। ତେଣୁ ଆଗାମୀ ଦିନରେ ପାଣିପାଗ ବିଭାଗ ଏହା ଉପରେ ନଜର ରଖିବ।

ଓଡ଼ିଶା ଉପରେ ସିଧାସଳଖ ପ୍ରଭାବ କମ୍

ଭୁବନେଶ୍ୱର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ନିର୍ଦ୍ଦେଶକ ଡ. ମନୋରମା ମହାନ୍ତିଙ୍କ ସୂଚନା ଅନୁସାରେ, ଲଘୁଚାପ ଓ ପରବର୍ତ୍ତୀ ଅବପାତ ସୃଷ୍ଟି ହେବାର ସମ୍ଭାବନା ଥିଲେ ମଧ୍ୟ ଏହାର ଓଡ଼ିଶା ଉପରେ ବିଶେଷ ପ୍ରଭାବ ପଡ଼ିବାର ଆଶଙ୍କା କମ୍। ପ୍ରାରମ୍ଭିକ ଆକଳନ ଅନୁସାରେ, ପାଣିପାଗ ପ୍ରଣାଳୀର କେନ୍ଦ୍ର ଓଡ଼ିଶା ଉପକୂଳଠାରୁ ପ୍ରାୟ ୫୦୦ରୁ ୭୦୦ କିଲୋମିଟର ଦକ୍ଷିଣରେ ରହିପାରେ।

ଏହାର ପ୍ରଭାବରେ ରାଜ୍ୟରେ ଶୁଷ୍କ ପାଗ ସହ ସକାଳେ ଥଣ୍ଡା ଓ କୁହୁଡ଼ି ଜାରି ରହିବାର ସମ୍ଭାବନା ରହିଛି।

୧୯ରୁ ଦକ୍ଷିଣ ଓଡ଼ିଶାରେ ବର୍ଷା ସମ୍ଭାବନା

ସୋଆର ଜଳବାୟୁ ଓ ପରିବେଶ କେନ୍ଦ୍ର (CEC) ନିର୍ଦ୍ଦେଶକ ଡ. ଶରତ ଚନ୍ଦ୍ର ସାହୁଙ୍କ ଆକଳନ ଅନୁସାରେ, ଏହି ପ୍ରଣାଳୀ ଆଗକୁ ଘୂର୍ଣ୍ଣିବାତ୍ୟାର ରୂପ ନେଇପାରେ। ନଭେମ୍ବର ୧୯ ତାରିଖରୁ ବର୍ଷା ଆରମ୍ଭ ହେବାର ସମ୍ଭାବନା ରହିଛି। ୧୯ ତାରିଖ ରାତି କିମ୍ବା ୨୦ ତାରିଖ ସକାଳେ ଦକ୍ଷିଣ ଆନ୍ଧ୍ରପ୍ରଦେଶର କାବାଲି ଓ ମଚ୍ଛଲିପଟନମ୍ ମଧ୍ୟବର୍ତ୍ତୀ ଅଞ୍ଚଳ ଦେଇ ଏହା ସ୍ଥଳଭାଗ ଛୁଇଁପାରେ ବୋଲି ସେ ଆକଳନ କରିଛନ୍ତି।

ଏହି ପରିସ୍ଥିତି ସୃଷ୍ଟି ହେଲେ ଓଡ଼ିଶାର କୋରାପୁଟ, ମାଲକାନଗିରି, ଗଜପତି, ରାୟଗଡ଼ା ଓ ନବରଙ୍ଗପୁର ଜିଲ୍ଲାରେ ପ୍ରଭାବ ପଡ଼ିପାରେ। ବିଶେଷକରି କୋରାପୁଟ, ମାଲକାନଗିରି ଓ ନବରଙ୍ଗପୁରରେ ଅତି ପ୍ରବଳ ବର୍ଷା ଏବଂ ଅନ୍ୟ ଅଞ୍ଚଳରେ ହାଲୁକାରୁ ମଧ୍ୟମ ବର୍ଷା ହୋଇପାରେ ବୋଲି ତାଙ୍କ ଆକଳନ।

ଏବେ ଭୟ ନୁହେଁ, ନଜର ରଖିବା ଜରୁରୀ

ପାଣିପାଗ ବିଶେଷଜ୍ଞଙ୍କ ମତରେ, ଏବେ ଓଡ଼ିଶା ପାଇଁ ସିଧାସଳଖ ବାତ୍ୟା ଭୟ ନାହିଁ। ତେବେ ପ୍ରଣାଳୀର ତୀବ୍ରତା ଓ ଗତିପଥ ବଦଳିବାର ସମ୍ଭାବନା ଥିବାରୁ ଏହା ଉପରେ ନିୟମିତ ନଜର ରଖାଯାଉଛି। ତେଣୁ ଆଗାମୀ ଦିନରେ IMDର ନୂଆ ପାଣିପାଗ ବୁଲେଟିନ୍ ଓ ସରକାରୀ ସତର୍କ ସୂଚନାକୁ ଅନୁସରଣ କରିବା ଜରୁରୀ।