ଆସାମରେ ମଣିଷ-ହାତୀ ସଂଘର୍ଷ ଦିନକୁ ଦିନ ଗୁରୁତର ରୂପ ନେଉଛି। ରାଜ୍ୟ ବିଧାନସଭାର ବଜେଟ୍ ଅଧିବେଶନରେ ଉପସ୍ଥାପିତ ତଥ୍ୟ ଅନୁଯାୟୀ, ବିଗତ ଏକ ଦଶନ୍ଧି ମଧ୍ୟରେ ଏହି ସଂଘର୍ଷ ଯୋଗୁଁ ୧,୧୪୭ ଜଣ ଲୋକଙ୍କ ମୃତ୍ୟୁ ଘଟିଥିବା ବେଳେ ୨୪୬ଟି ହାତୀ ମଧ୍ୟ ପ୍ରାଣ ହରାଇଛନ୍ତି।

ଆସାମର ପରିବେଶ ଓ ବନମନ୍ତ୍ରୀ ଜୟନ୍ତ ମଲ୍ଲବରୁଆ ବିଧାନସଭାରେ କହିଛନ୍ତି ଯେ, ହାତୀଙ୍କ ମୃତ୍ୟୁର ପ୍ରମୁଖ କାରଣ ବିଦ୍ୟୁତ ଆଘାତ, ଟ୍ରେନ୍ ଦୁର୍ଘଟଣା ଓ କେତେକ କ୍ଷେତ୍ରରେ ବିଷ ପ୍ରୟୋଗ। ଏହି ସମସ୍ୟାକୁ ରୋକିବା ପ୍ରଶାସନ ପାଇଁ ଏବେ ବି ବଡ଼ ଚ୍ୟାଲେଞ୍ଜ ହୋଇ ରହିଛି।

ସରକାରୀ ତଥ୍ୟ ଅନୁଯାୟୀ, ୨୦୨୫ ମସିହାରେ ସର୍ବାଧିକ ୧୩୮ ଜଣ ଲୋକ ମଣିଷ-ହାତୀ ସଂଘର୍ଷରେ ପ୍ରାଣ ହରାଇଥିଲେ। ଚଳିତ ବର୍ଷ ୨୦୨୬ରେ ବର୍ତ୍ତମାନ ସୁଦ୍ଧା ୫୩ ଜଣଙ୍କ ମୃତ୍ୟୁ ଘଟିସାରିଛି।

ରାଜ୍ୟ ବନ ବିଭାଗର ରିପୋର୍ଟ ଅନୁଯାୟୀ, ବକ୍ସା, ଧନସିରି, ନଗାଓଁ, ସୋନିତପୁର ୱେଷ୍ଟ, ଗୋଆଲପଡ଼ା ଓ ଗୋଲାଘାଟ ଅଞ୍ଚଳ ସବୁଠାରୁ ଅଧିକ ପ୍ରଭାବିତ। କେବଳ ଗୋଆଲପଡ଼ାରେ ୨୦୧୬ ପରଠାରୁ ୧୯୫ ଜଣ ଏବଂ ଧନସିରିରେ ୧୪୩ ଜଣ ଲୋକଙ୍କ ଜୀବନ ଯାଇଛି।

ସେହିପରି ବିଗତ ୧୦ ବର୍ଷରେ ୨୪୬ଟି ହାତୀଙ୍କ ମୃତ୍ୟୁ ହୋଇଛି। ୨୦୧୭ରେ ସର୍ବାଧିକ ୪୨ଟି, ୨୦୨୫ରେ ୩୬ଟି ଏବଂ ୨୦୨୪ରେ ୨୭ଟି ହାତୀ ପ୍ରାଣ ହରାଇଥିଲେ। ଚଳିତ ବର୍ଷ ୫ଟି ହାତୀଙ୍କ ମୃତ୍ୟୁ ଘଟିଛି। ସେଥିମଧ୍ୟରୁ ୪ଟି ବିଦ୍ୟୁତ ଆଘାତରେ ଓ ଗୋଟିଏ ଶିକାରୀଙ୍କ ଗୁଳିରେ ମୃତ୍ୟୁବରଣ କରିଛି।

ବନମନ୍ତ୍ରୀ ଆହୁରି ସୂଚନା ଦେଇଛନ୍ତି ଯେ, ଆସାମର ୧୮,୩୩,୫୯୨ ହେକ୍ଟର ସଂରକ୍ଷିତ ଜଙ୍ଗଲ ମଧ୍ୟରୁ ପ୍ରାୟ ୩,୧୫,୯୯୭ ହେକ୍ଟର ଜମି ଜବରଦଖଲରେ ରହିଛି। ଏପର୍ଯ୍ୟନ୍ତ ୨୫,୫୮୮ ହେକ୍ଟର ଜମିକୁ ଉଚ୍ଛେଦ ଅଭିଯାନ ମାଧ୍ୟମରେ ମୁକ୍ତ କରାଯାଇଛି।

ରେଳଧାରଣା ନିକଟରେ ୩୩ଟି ହାତୀ କରିଡର ଚିହ୍ନଟ କରାଯିବା ସହ ସୋଲାର ଫେନ୍ସିଂ ବ୍ୟବସ୍ଥା କରାଯାଇଥିଲେ ମଧ୍ୟ ମଣିଷ-ହାତୀ ସଂଘର୍ଷ ସମ୍ପୂର୍ଣ୍ଣ ଭାବେ କମିପାରିନାହିଁ। ବିଶେଷଜ୍ଞମାନଙ୍କ ମତରେ, ବନ୍ୟଜନ୍ତୁଙ୍କ ପ୍ରାକୃତିକ ବାସସ୍ଥାନ ସୁରକ୍ଷା ଓ ମାନବ ବସତି ସହ ସନ୍ତୁଳନ ରକ୍ଷା କରିବା ହିଁ ଏହି ସମସ୍ୟାର ଦୀର୍ଘମିଆଦି ସମାଧାନ।